Энэ хичээлийн жилд 4200 орчим багш дутахаар байгааг БШУЯ өнгөрсөн наймдугаар сард зарласан.
Энэ хомсдолыг шийдэхээр гадаад, дотоодын сайн сургуулийг амжилттай төгссөн залууст багшлах эрхийн зөвшөөрлийг уян хатан байдлаар, богино хугацааны сургалтад хамруулан олгох ажлыг эхлүүлсэн. Энэ нь багшийн орон тоог түр хугацаанд, хурдан нөхөх арга юм.
Тэгвэл багшийн орон тоог урт хугацаанд хэрхэн нөхөх вэ?
БШУЯ дараах төлөвлөгөөг гаргаж, Засгийн газрын хуралдаанаар хэлэлцүүлжээ.
Зургаан багц ажил:
1. Багш мэргэжлээр төгссөн боловч мэргэжлээрээ ажилладаггүй багш нарыг татах,
2. Тэтгэвэрт гарсан багш нарыг бага цагаар ажиллуулах,
3. Шинжлэх ухааны чиглэлээр их, дээд сургуульд 80-аас дээш үнэлгээтэй суралцаж буй оюутнуудыг багшлуулах,
4. Сургалтын цагийн норм 19 цагтаа хүрээгүй бол зарим багш нарт ижил төстэй хичээл заалгах,
5. Багш бэлтгэх их, дээд сургуулийн оюутнуудыг дадлагажигч багшаар ажиллуулах,
6. Цахим сургалтыг илүү эрчимтэй хэрэгжүүлэх
Багш мэргэжлээр сурах оюутнуудын тоог өсгөх зорилгоор энэ хичээлийн жилээс эхлэн МУБИС-ийг үнэ төлбөргүй болгосон. Энэ шийдвэрийн дараа шинээр элссэн оюутнуудын тоо 20 хувиар өссөн юм. Мөн Засгийн газраас багшийн хүүхдийн их , дээд сургуулийн төлбөрийг төрөөс хариуцах шийдвэрийг 2024 оны төсвийн хуулийг батлахдаа гаргасан.
Гэвч энэ нь хангалтгүй тул УИХ-ын гишүүн Д.Бум-Эрдэнэ ипотекийн зээлийн залуу багш нарт олговол багшийн хомстолыг шийдэхэд хувь нэмэр оруулна гэв.
Харин МҮЭ-ийн Боловсрол, шинжлэх ухааны үйлдвэрчний эвлэлийн холбооны дарга З.Цогтгэрэл энэ сарын 25-нд “Хэдийгээр цагшийн цалинг ирэх оны эхнээс 6 хувиар нэмэх ч энэ нь ердөө л инфляцтай холбоотой. Боловсролын салбарын хөрөнгө оруулалтыг нэмэх шаардлагатай. Бид УИХ-ын 126 гишүүнээс их зүйл хүлээж байна.
Улсын дундаж цалин 2.5 сая төгрөгт хүрсэн. Багш, шинжлэх ухааны салбарын ажилтуудын цалинг улсын дундажтай тэнцүүлэх ёстой. Багш нарын ачаалал өндөр байна. Ачаалал өндөр тул өвчлөх, ажлаас чөлөө авах, ажлаасаа гарах нь их.
Багшийн ажиллах нөхцөлийг нь ханган, ахуйн асуудлыг нь шийдэх хэрэгтэй байна. Сангийн сайд маш хариуцлагагүй байна. Багш нар илүү цаг, томилолтын мөнгөө авч чадахгүй байна. Эдгээр шаардлагыг биелүүлэхгүй бол бид ажил хаяна” гэсэн юм.
