Монголбанк ээлжит бус хуралдаанаараа инфляцыг тогтоон барьж, зээлийг хумих бодлогоо бататгасан шийдвэрүүдээ танилцууллаа.
Мягмар гарагт Монголбанкны Мөнгөний бодлогын хорооны ээлжит бус хурлын шийдвэрээ зарлаж, бодлогын хүүг 10 хувьд хэвээр үлдээж, банкнуудын төгрөгийн болон гадаад валютын заавал байлгах нөөцийн хувь хэмжээг хоёр нэгж хувиар тус тус нэмэгдүүлж, 13 хувь болон 18 хувь болгосноо мэдэгдлээ. Түүнчлэн хүлээлтийн дагуу энэ онд мөнгөний хатуу бодлогоо хадгалах дохио өгч, цахилгаан дулааны үнийн өсөлт, бэлэн мөнгө тараалт, төсвийн тэлэлтээс үүдэлтэй инфляцын дарамт үргэлжлэн нэмэгдэх эрсдэлтэйг тодотгосон байна.
Жилийн турш Монголбанкны зорилтот түвшинд хадгалагдаж байсан инфляц 2024 оны 12 дугаар сард 9.0 хувьтай гарч, хагас жил гаруйхны дотор бараг дөрвөн нэгж хувиар нэмэгдээд буй. Мөн 2024 онд Монгол Улсын экспорт 3.9 хувиар өссөн бол импорт 25.5 хувиар өсөж, гадаад худалдааны ашиг өмнөх оноосоо 30 хувиар буурсан зэрэг үзүүлэлтээс харвал Төв банкны инфляцын эсрэг тэмцэл энэ онд нэлээд хүнд байх төлөвтэй.
Халалт ба ханш
Монголбанк бодлогын хүүгийн нөлөөллийг хязгаарлаж буй банкнуудын зээл олголт, мөнгөний нийлүүлэлтийг хумих үүднээс заавал байлгах нөөцийн хувь хэмжээгээ сүүлийн хоёр хурал дараалан нэмэгдүүлж байна.
Өнгөрсөн оны 10 дугаар сарын байдлаар банкны систем дэх нийт зээлийн өсөлт 31.4 хувьд хүрч эрчимжиж, зээлийн нийлбэр дүн 35 их наяд төгрөг болжээ.
Мягмар гарагт төгрөгийн ханш ам.долларын эсрэг үргэлжлэн суларч, 3426 болсон нь сүүлийн 13 сар орчмын доод түвшин боллоо.
Харин мөнгөний нийлүүлэлт 12 дугаар сарын урьдчилсан гүйцэтгэлээр 43.3 их наяд төгрөг болж, өмнөх оноос 15.2 хувиар өссөн байна. Оны эхний хагаст 30 хувь давж байсантай нь харьцуулахад мөнгөний нийлүүлэлт саарсан ч иргэдийн зарцуулалт нэмэгдэж, инфляц өсөхөд түлхэц болдог “эдийн засгийн халалт”-ын эрсдэл байсаар байна.
Хөгжиж буй орнуудын Төв банкны шийдвэрт ихээхэн нөлөөтэй АНУ-ын Холбооны нөөцийн банк бодлогын хүүгээ одоогийн түвшинд удаан хадгалж, инфляц хангалттай түвшинд саарсан гэдэгт итгэлтэй болсон үедээ л бууруулах дохио саяхан өгөөд байна. 11 дүгээр сард АНУ-ын суурь инфляц жилийн дүнгээр 2.8 хувьтай гарч, Төв банкны хоёр хувийн зорилтоос дээгүүр хадгалагдсан юм.
Холбооны Нөөцийн банк хэрэв хүүгээ зоригтой бууруулбал Монголбанкны бодлогын хүүгээс зөрүү нь улам тэлж, төгрөгийн ам.доллартой харьцах ханшид дарамт нэмэгдэх эрсдэл бий. Мөн Ерөнхийлөгчөөр сонгогдсон Дональд Трамп амлалтынхаа дагуу гаалийн тариф нэмэгдүүлбэл ам.долларын ханш улам чангарахад нөлөөлнө гэж “Wall Street”-ийн томоохон банкнууд таамаглаж буй.
Мягмар гарагт төгрөгийн ханш ам.долларын эсрэг үргэлжлэн суларч, 3426 болсон нь сүүлийн 13 сар орчмын доод түвшин боллоо.
Б.Бат-Очир
Bloomberg Tv Mongolia
