Хотын дарга Х.Нямбаатар Төрийн ордонд сэтгүүлчдийн асуултад хариулав.
Тэрээр “Төрийн албан хаагчдыг есөн хувиар цомхтгож, нийслэлийн төсвийг тодотгоно. Одоогоор хотын төсөв улсын төсөв шиг их хэмжээгээр тасалдаагүй байна.
Нийслэлд хэрэгжүүлэх 24 мега төслийн талыг төр хувийн хэвшлийн түншлэлээр хэрэгжүүлнэ. Иймд 24 төслөөс танахгүй. Санхүүжилтийн баталгаагаа шийдээгүй гурван төсөл бий. Тойрог зам, метро, трамвайн ТЭЗҮ, байгаль орчны нарийвчилсан үнэлгээг хийж дууслаа.
Зарим төслийн санхүүжилтийг холимог байдлаар шийднэ. Туулын хурдны замын төсвийг хот өөрөөсөө гаргана.Тойрог замын тухайд 15 хувийн санхүүжилтийг нь хот, үлдсэн 85 хувийг Экзим банкны зээл байна. Энэ зээлийг авахад Засгийн газрын 500 сая ам.долларын баталгаа шаардлагатай.
Туулын болон тойрог хурдны зам ашиглалтад орсноор түгжрэлийг 50 хувиар бууруулах тул их чухал. Эргэн төлөлтөө замын сангийн хураамжаас 10-аад жилийн турш төлнө.
Ерөнхийлөгч У.Хүрэлсүх Чех Улсад айлчлахад бид тус улсын компанитай Хамтран ажиллах санамж бичиг байгуулсан. Энэ төслийг болж өгвөл төр-хувийн хэвшлийн түншлэлээр үргэлжлүүлнэ.
ТЭЦ5 бидний амин чухал төсөл боллоо. Дөрвөн ААН тендерт санал өглөө. Өнгөрсөн амралтын өдөр бид станц байгуулах талбайд ажиллаж, сонирхсон талуудад хөрсний шинжилгээний үр дүнг өгсөн. Бурхны авралаар өнгөрсөн онд хот хэдэн төгрөг босгож, эрчим хүчинд хөрөнгө оруулсан. Үүний үр дүнд ирэх арванхоёгудаар сар гэхэд эрчим хүчний суурилагдан хүчин чадал 350 МВт болно.
Бөөрөлжүүт станцынхан ирэх өвөл төлөвлөсөн хугацаандаа дараагийн үе шатаа дуусгана гэсэн. Ирэх өвөл цахилгааны асуудал үүсэхгүй. Харин дулаан хүнд байна. Сая шатсан 9-р турбины зуух бүтэн шатаагүй тул зуухны технологийн горимыг өөрчлөн, 1500 тонн халуун ус эргүүлэх замаар энэ өвлийг давна. Араас нь турбин генератораа захиална гэв.
