Өмнөд Солонгосын ерөнхийлөгч асан Юн Сүк Ёл, тэргүүн хатагтай асан Ким Кон Хи нар гэмт хэргийн сэжигтнээр татагдаж, шоронд хоригдсоноор тэдний зургаан нохой, таван муурыг асрамжлах хүнгүй болсон байна.
Одоогоор тэднийг экс тэргүүн хосын туслахууд асарч байгаа гэнэ.
Тухайлбал Ким Кон Хигийн уран зургийн үзэсгэлэн зохион байгуулагч “Kobana Contents” компанид ажиллаж байсан туслахууд болон Юн Сүк Ёлын тамгын газарт ажиллаж байсан туслахууд энэ үүргийг түр гүйцэтгэж байгаа талаар хэвлэлүүд мэдээлжээ.
Гэхдээ экс тэргүүн хосын цаашдын хувь заяа тодорхойгүй байгаа тул ийм шийдлээр удаан явах боломжгүй гэж ажиглагчид үзэж байна.
Амьтанд хайртайгаараа алдартай хос Юн Сүк Ёлыг ерөнхийлөгч болохоос өмнө гэртээ нохой, мууртай байсан бөгөөд бүрэн эрхийнхээ хугацаанд хэд хэдийг нэмж тэжээх болжээ.
Долдугаар сард Юн Сүк Ёлыг баривчилсны дараа тэргүүн хатагтай асан амьтдаа асарч байсан юм. Гэвч наймдугаар сарын 12-нд түүнийг баривчлахад тэжээвэр амьтад нь эзэнгүй үлджээ.
Зарим хүмүүс хуулийн дагуу экс ерөнхийлөгчийн хамгаалалтын алба амьтдыг халамжлах ёстой гэж үзэж байна. Тэд ерөнхийлөгчийн бүрэн эрхийн хугацаа дууссаны дараа гэр бүлийг нь болон тэдний эд хөрөнгийг хамгаалах үүрэгтэй байдаг.
Тэжээвэр амьтдыг ерөнхийлөгч асны эд хөрөнгө, өмч гэж үзвэл ингэж болох юм байна.
Гэхдээ хамгаалалтын албаныхан олон нийт үүнд хэрхэн хандахаас болгоомжилж байгаа гэсэн мэдээлэл бий.
Тэргүүн хос асны гэр бүл тэжээвэр амьтдаа чин сэтгэлээсээ асарч халамжилдаг байсан гэдэг.
Энэ оны нэгдүгээр сард баривчлагдахынхаа өмнөхөн Юн Сүк Ёл өөрийн Тори нэртэй нохойтой 10 орчим минут салах ёс гүйцэтгэснийг гэрчүүд мэдээлж байв.
Тавдугаар сард тэр суллагдсаныхаа дараа нохойнуудаа салхилуулан явж байгаад олны нүдэнд өртөж байжээ.
Түүний өмнөх ерөнхийлөгч Мүүн Жэ Ин бүрэн эрхийнхээ хугацааг дууссаны дараа Умард Солонгосын удирдагч Ким Жон Уны бэлэглэсэн Пунсан үүлдрийн хоёр нохойгоо улсын асрамжийн газарт шилжүүлсэн юм. Том биетэй эдгээр нохдын тэжээх зардлыг хувиасаа санхүүжүүлэхэд хүрсэн тул тэр ийм арга хэмжээ авч байжээ.
Тухайн үед Юн Сүк Ёл “ноход эзэнтэйгээ байх ёстой” хэмээн уг алхмыг шүүмжилж байсан юм.
Эх сурвалж: Korea Times
