Наймдугаар сарын 20-нд үргэлжилсэн борооны улмаас Хүннү 2222, Жапан таун орчимд “Авто зам дээр их хэмжээний ус тогтсон” гэсэн дуудлагын дагуу холбогдох албаныхан өчигдөр оройн 20:00 цагт ус зайлуулах системийн хэвийн ажиллагааг хангуулж ажиллалаа.
Тухайн байршилд нийслэлийн Засаг даргын нэгдүгээр орлогч Т.Даваадалай, Геодези, усны барилга, байгууламжийн газрын дарга Б.Бямбасайхан нар ажилласан юм.
Т.Даваадалай “Нийслэлийн авто замын ус зайлуулах шугам хоолой руу барилгын компаниуд, ялангуяа шинээр баригдаж байгаа барилгууд хөрсний усаа шахах асуудал их гардаг.
Үүний улмаас борооны ус зайлуулах шугам ачааллаа дийлэхгүй болох тохиолдлууд үүсэж байна. Иймд анхнаас нь барилгуудыг борооны ус зайлуулах шугамаа шийдэж явах, уялдаатай холбоотой ажиллах хэрэгтэй” гэв.
Нийслэлийн хэмжээнд Нарны гүүрний урд тал, Энхтайваны гүүрний дор, Ажилчдын гудамж, Саппоро зэрэг их хэмжээгээр ус тогтдог байсан 24 байршилд үе шаттай ус зайлуулах шугам угсарч байна. Энэ жил 10 гаруй байршилд шугам угсралтын ажлыг ирэх сарын 30-ны дотор дуусгахаар ажиллаж буй.
Ирэх жил ус их ихээр тогтдог үлдсэн байршлуудын шугам угсралтын ажлыг дуусгана. Наймдугаар сарын 20-21-ний бороо орж байгаа өдрүүдэд нийслэл, дүүргийн Онцгой комиссын шуурхай штабт мэргэжлийн байгууллагуудын нийт 95 албан хаагч 24 цагаар үүрэг гүйцэтгэн ажиллаж байна.
Эх сурвалж: НЗДТГ
