Нийслэлийн Прокурорын Газрын хэрэг бүртгэх, мөрдөн байцаах ажиллагаанд хяналт тавих 2-р хэлтсийн дарга, ахлах прокурор Г.Гэрэлтуяа УИХ-ын гишүүн С.Ганбаатарын холбогдон шалгагдаж буй хэргийн талаар мэдээлэл өгчээ.
-Өнгөрсөн баасан гарагт УИХ-ын гишүүн С.Ганбаатарт прокурорын мэдэгдэх хуудсыг гардуулж өгөхөөр АТГ-ын нэр бүхий хоёр ажилтан Төрийн ордонд очсон талаар мэдээлэл гарсан. Энэ чухам юу болсон юм бэ?
-Юуны өмнө УИХ-ын гишүүн Сайнхүүгийн Ганбаатартай холбоотой шалгагдаж буй гэмт хэргийн талаар холбогдох мэдээллийг хүргэе ээ. Мөрдөх байгууллагаас өнгөрсөн 8 сарын эхээр Улсын Их Хурлын гишүүн С.Ганбаатарт холбогдох эрүүгийн хэрэгт мөрдөн шалгах ажиллагаа явуулж дуусган, хэргийг шүүхэд шилжүүлэх саналтайгаар прокурорт ирүүлсэн. Прокурорын байгууллага мөрдөгчийн ирүүлсэн саналыг хянан үзэж үндэслэлтэй байна гэж дүгнэн, хэрэгт цугларсан нотлох баримтуудад тулгуурлан хэд хэдэн хэрэгт яллах дүгнэлт үйлдсэн байдаг.
Сайнхүүгийн Ганбаатарт:
1 дүгээрт Эрүүгийн хуулийн 22.1-т заасан “Эрх мэдэл, албан тушаалын байдлаа урвуулан ашигласан” буюу өөрийн гэр бүлийн хамаарал бүхий хүмүүст давуу байдал бий болгосон,
2 дугаарт, Эрүүгийн хуулийн 22.4 дүгээр зүйлд заасан, “хахууль авсан”,
3 дугаарт, 18.6 дугаар зүйлд заасан “Мөнгө угаасан”,
4 дүгээрт, 22.10 дугаар зүйлд заасан, “Үндэслэлгүйгээр хөрөнгөжсөн” зэрэг нийт 6 хэрэгт холбогдуулан яллах дүгнэлт үйлдээд байна.
Яллагдагч С.Ганбаатар нь мөрдөн шалгах ажиллагааны явцад мэдүүлэг өгөхгүй, ямар нэгэн мөрдөн шалгах ажиллагаанд оролцохгүй, зөвхөн хэрэг шүүхэд шилжиж очсон үед шүүхэд өөрөө мэдүүлэг өгнө гэсэн байдаг.
Өнгөрсөн хугацаанд мөрдөгч түүнд яллагдагчаар татсан тогтоолыг танилцуулахаар удаа дараа дуудсан боловч хүндэтгэн үзэх шалтгаангүйгээр ирээгүй тул прокурорын мэдэгдэх хуудсаар дуудахад ч мөн хүрэлцэн ирээгүй байдаг.
Мөн яллах дүгнэлтийг С.Ганбаатарт гардуулахаар дуудан ирүүлэх тухай мэдэгдэх хуудсыг 3 удаа хүргүүлсэн боловч хүндэтгэн үзэх шалтгаангүйгээр удаа дараа ирээгүй тул Нийслэлийн прокурорын газрын хяналтын прокуророос шийдвэр танилцуулахаар 2025 оны 9 дүгээр сарын 19-ний өдөр Эрүүгийн хэрэг хянан шийдвэрлэх тухай хуулийн 12.1 дүгээр зүйлийн 2 дахь хэсэгт заасны дагуу дуудан ирүүлэх мэдэгдэх хуудсыг үйлдэн, С.Ганбаатарт хүргүүлэхийг мөрдөгчид даалгасан. Үүний дагуу түүнд прокурорын дуудан ирүүлэх мэдэгдэх хуудсыг хүргүүлэх ажлыг мөрдөх байгууллага хэрэгжүүлж өнгөрсөн Баасан гарагт түүнд хүргүүлэхээр ажилласан байсан. Энэ бол Эрүүгийн хэрэг хянан шийдвэрлэх тухай хуульд заасны дагуу явуулдах ажиллагаа юм.
-Улсын Их Хурлын гишүүн С.Ганбаатар ямар гэмт хэрэгт холбогдон шалгагдсан бэ?
Улсын Их Хурлын гишүүн С.Ганбаатарт холбогдуулан шалгаж буй 6 хэргийн талаар би өмнө товч мэдээлсэн. Өөрөөр хэлбэл, Албан тушаалын байдлаа урвуулан ашиглах, хахууль авах, үндэслэлгүйгээр хөрөнгөжих, мөнгөн угаасан зэрэгт олон зүйл ангиудаар яллагдаж байна.
Эдгээр хэргүүд нь одоо хэрэг хянан шийдвэрлэх ажиллагааны явцад байгаа тул хуульд заасны дагуу дэлгэрэнгүй мэдээллийг өгөх боломжтой. Эрүүгийн хэрэг хянан шийдвэрлэх тухай хуулийн 32.10 дугаар зүйлийн 6-д зааснаар яллагдагчид яллах дүгнэлтийг гардуулсны дараа хавтаст хэргийг шүүхэд шилжүүлдэг иймд уг хэргийг хуульд заасан журмын дагуу прокурорын байгууллага хяналт тавин ажиллаж байна.
