УИХ дахь МАН-ын бүлэг өнөөдөр /2025.10.06/ ээлжит хуралдаан хийх ёстой байсан ч хуралдсангүй.
МАН-ын даргыг сонгох сонгуулиас эхтэй зөрчилдөөн УИХ дахь МАН-ын бүлгийн гишүүдийг хоёр хуваан, ээлжит хуралдаанаа хийх боломжгүйд хүргээд байна гэж үзэж болохоор буй.
Тус бүлгийн гишүүн П.Сайнзориг өнөөдөр мэдээлэл хийж, Ерөнхий сайд Г.Занданшатарыг огцруулах шаардлага үүссэн гэж мэдэгдсэн. Ингэхдээ тус Засгийн газар нь 100 хоног ажиллах хугацаанд Монгол Улсын эдийн засгийг элгээр нь хэвтүүлсэн атлаа зориудаар олон нийтэд буруу мэдээлэл өгсөн зэрэг хэд, хэдэн алдаа гаргасан тул огцрох ёстой гэж үзэж буй. Мөн Төрийн сангийн үйл ажиллагаа доголдож эхэлсэн гэдэг мэдээллийг онцолсон.
Харин Сангийн сайд Б.Жавхлангийн хувьд “Төрийн сангийн үйл ажиллагаа хэвийн. Манай эдийн засаг эмзэг эмзэг гэхэд гурван сар дотор элгээрээ хэвтэх хэмжээний биш. Монголбанкин дахь валютын нөөц 5 тэрбум 874 сая төгрөг байна. Энэ нь дөрвөөс таван сарын импортын хэрэгцээг хангах нөөц юм. Ирэх долоо хоногт би Олон улсын валютын сангийн намрын хуралд явна. П.Сайнзориг гишүүн цуг яваад Монгол Улсыг олон улсад яаж харж байна вэ гэдгийг сонсоосой гэж бодож байна. Улс орнуудын зээлжих зэрэглэлийг үнэлдэг гурван том компани бий. Түүний нэг болох Fitch агентлагаас Монгол Улсын зээлжих зэрэглэлийг +B буюу тогтвортой гэж өнгөрсөн жил үнэлсэн. Энэ жил ч энэ үнэлгээгээ хэвээр хадгалж болно гэдгийг олон улсад зарласан. Дараагийн хоёр агентлагууд нь ажлаа хийж байна. Ирэх арав, арваннэгдүгээр сард дүнгүүд нь гарна. Гадаад нөхцөл байдал тун ойлгомжгүй ,тогтворгүй байна. Хятадын зээлжих зэрэглэл нэг оноогоор буурсан. Гэтэл Монгол Улс БНХАУ-тай эдийн засгийн өндөр хамааралтай боловч зээлжих зэрэглэлээ хэвээр хадгалж үлдлээ. АНУ-ын зээлжих зэрэглэл мөн унасан. Манайтай ижил төстэй жижиг одоо эдийн засагтай улсуудын зээлжих зэрэглэлүүд нь мөн унасан үзүүлэлттэй байна. Харин манайх тогтвортой байж чадсан. Эдгээр үзүүлэлтүүдийг бид өөрсдөө гаргаж ирчихээд хэлээд байгаа юм биш. Олон улс Монгол Улсыг ингэж дүгнэж байна” гэж мэдэгдсэн юм.
УИХ ирэх арваннэгдүгээр сарын 15-наас урьтаж Монгол Улсын 2026 оны төсвийн төслийг баталсан байх хуультай. Ийм ч учраас энэ долоо хоногт УИХ-ын төвшинд 2026 оны төсөвтэй холбоотойгоор ажлын хэсэг байгуулагдах учиртай.
Гэвч улс төрд үүссэн зөрчил тэмцэлдээнээс болж төсвийн асуудал ч эгзэгтэй байдалд давхар орж эхэлжээ.
