Ерөнхийлөгчид санаархагч-5 Лу.Болд Гипс Болд болсон түүх

 

 

Манайхан урга барилдахдаа ч удам судар харцгаадаг хүмүүс. Тэр үүднээсээ бол
гоо зүйн нэрт эрдэмтэн Лувсанвандангийн хүү Болд бол ерөнхийлөгч болох гэж
тэмүүлцгээж буй хүмүүсийн дотор хамгийн угсаа гарвал сайтай нэгэн. Үүргийн
наймаагаар хөлжиж, зайсанд амьдарч, ланд унасан төдийгөөр өөрсдийгөө элит
хэмээн мунхаглан сэтгэх зарим нэгний дэргэд мэдлэг боловсрол гээд юм юмаараа
толгой цохидог энэ эрхэм гарцаа байхгүй элит мөн. Гэхдээ цаг үе цахим орчны
нөлөөгөөр бужигнаж, Монголчууд мэдлэг боловсролоос илүү хоосон амлалтад итгэж,
сайн нэртэй нэгнээс илүү муугаар ч хамаагүй олны анхаарлыг татдаг нэгэнд \”автомат”-аар
шахуу саналаа өгнө. Лу.Болд энэ бүхнийг өнгөрсөн жилүүдэд овоо сайн ойлгож
авчээ. Популист хэмээгдэн өөрсдөд нь ад үзэгдэгсэд ард олны хайртай баатар болж
хувирдаг гэдгийг Х.Баттулга, Г.Уянга, С.Ганбаатар гэх мэт танхимын олон \”найзууд”
нь хангалттай харуулсан. Тиймийн тул Лу.Болд популист болохоор аажим аажмаар
гэтэн буй. Таг дуугүй шахуу имиж нь гэнэт ингэж өөрчлөгдвөл ардын баатар болох
хүсэл нь замхарч сэтгэцийн өвчтөн гэж хочлуулна гэдгээ ч мэдэж буй тул ийнхүү
гэтэж байна. Түүний олон нийтийн анхаарлыг татах популизм эхлээгүй байгаа ч
ерөнхийлөгч болсон үед нь жинтэй \”сэдрэх” магадлалтай. Ямартаа ч тэрээр өөр шиг
нь мэдлэг боловсролтой нэгний хувьд төдийлөн гаргаад байдаггүй сонин сонин
үйлдэл өнгөрсөн засгийн үед нэлээд гаргаад авсан байна лээ. Түүний хийсэн
этгээд үйлдлүүд нь гол төлөв олонд нэрээ хоногшуулах гэсэн улс төрийн хуучин
арга барилаас үүдэлтэй. Нам нэгт нөхөр бидон Ганбаагаас суралцаж өөрийн гэсэн
нэртэй зүйлсийг айл өрхүүдээр тараасан байдаг.

 

 

 

 

 

 

 

 

2015 оны сүүл 2016 оны өмнөхөн Лу.Болд, дээрээ соёмботой, доор нь нэрээ
бичсэн гипсэн баримал ХУД-ийн сонгогч нартаа \”бэлэглэж байх” юм. Сувинер гэхэд
хэцүү, төрийн бэлгэдэл гээд хадгалах гэхээр ур хийц муутай, дээр нь гипс
хадгалалтын ая даах биш, тэгээд мань хүний нэрийг хоймортоо нандигнаад байх нь
ч утгагүй. Нэг талд нь бас Хан-Уул дүүрэг 50 жил гээд биччихжээ. Юм мэдэхгүй
гадаад хүн бол Хан-Уул дүүргийн 50-н жилийн түүхэнд их хувь нэмэр оруулсан, энэ
дүүргийг бүтээн босгосон хүн байна гэж харахаар. Хамгийн гол нь Хан-Уул
дүүргийн өрхүүдэд ийм хэрэгтэй хэрэггүй юм хийж тараах гэж хэчнээн төгрөг
салхинд үргүй хийсгэсэн бэ гэдэгт нь л халаглаад байгаа юм. Энэ хэрэггүй гипсэн
баримлын дэргэд ядаж Д.Ганбат гишүүний бидон бол хамаагүй хэрэгтэй эд юм даа.
Энэ бүхэн бол нэрээ сонгогчдод хоногшуулж дараагийн сонгуульд сэтгэл зүйн хувьд
сонголтондоо хэт автомат хандлагатай болгоход чиглэж байгаа үйлдэл юм. Тухайн
хүний зургийг байнга харж, нэрийг нь уншаад байхаар, реклам үзсэн худалдан
авагч эргэлзээгүй тухайн бараа бүтээгдэхүүнийг сонгодог шиг үр дүн үзүүлнэ. Энэ
бол батлагдсан гэхдээ ядарсан арга. Нэг тиймэрхүү тулалдах чадваргүй тулаанчдын
башир заль мэх төдийхөн юм.

Лу.Болдод итгэх итгэлийг үүнээс гадна унагасан нэг зүйл бол бизнесийн
түнштэйгээ хийсэн түүний маргаан юм. Олон жилийн турш бизнес хийж, хамтарч
ажиллаж ирсэн хоёр эрхэм салж, компаниа хуваах нь байж бололгүй л яахав. Дэлхий
дээр ч ийм үзэгдэл зөндөө л болдог. Гэхдээ маргааны эхнээс л нөгөөхөө муучилж,
өөрийнхөө эрхэлж байсан бизнесийг эрсдэлд оруулахуйц мэдэгдэл гаргаж байсан нь
хүнийх нь хувьд хэн бэ гэдгийг таниулаад өгөх шиг болсон. Сенсааци дэгдээж өөрт
нь буулт хийлгүүлэх гэсэн оролдлого гэдгийг ч Д.Баясгалан захирал сүүлд нь
өгсөн ярилцлагадаа хэлсэн байсан. Гипсэн баримал, ном товхимол, сенсаацитай
маргаан, зурагт календарь зэргийг нь бодохоор эзэн Чингис хааны хэлсэн \”Их
хүссэн хүнээр төрийн жолоог бүү атгуул” гэсэн үг санаанд ороод байх юм.
Ерөнхийлөгч болгоход энэ \”элит” арай ч бэлэн биш юм уу даа. Эцэг эхээрээ овоглох сайхан. Хийсэн үйлдэл, хийж буй ажлаараа ч овоглох сайхан. Энэ үүднээсээ түүнийг Лу.Болд биш Гипс Болдоо ч гэж дуудсан болно биз. Намын \”найз\” Ганбаа нь аль хэдийн бидон хочтой болсон байхад болохгүй юу байх билээ. Ингэхэд ерөнхийлөгч болж гэмээ нь арай Монголын айл өрх бүрт ийм гипс тараана гэж зүтгэхгүй байгаа даа энэ Лу. Болд…

С.Амаржаргал