Сүхбаатар дүүргийн Нэгдсэн эмнэлгийн тусламж, үйлчилгээний чанар, хүртээмжийг сайжруулах зорилгоор хийгдсэн мэс заслын хэсгийн иж бүрэн шинэчлэлтийн ажил дуусаж, Улсын комисс хүлээн авлаа. Дүүргийн төсвийн хөрөнгө оруулалтаар хийсэн тус ажил нь эмнэлгийн тавдугаар давхрын 413.95 м.кв талбайг бүхэлд нь хамарч, орчин үеийн “вакум” шийдлийг нэвтрүүлжээ.
Шинэчлэлийн хүрээнд мэс заслын өрөөнүүдийг зэрэглэл тогтоон, зориулалтын дагуу дараах байдлаар төлөвлөжээ:
-
Нэгдүгээр зэрэглэлийн мэс заслын өрөө: Хамгийн өндөр ариун цэвэр, нарийн мэргэжлийн мэс засалд зориулагдсан.
-
Гуравдугаар зэрэглэлийн мэс заслын өрөө: Бохир хагалгаанд зориулсан, нян бактер гадагш тархахаас сэргийлсэн сөрөг даралттай вакум өрөө багтсан.
Мэс заслын өрөөнүүдийг олон улсын стандартад нийцүүлэн тохижуулж, өрөө тус бүрд агааржуулалт, цахилгаан тэжээлийн иж бүрэн систем суурилуулжээ. Коридор болон туслах өрөөнүүдэд цагт 11,000 м³ агаар цэвэршүүлэх хүчин чадалтай. Нэгдүгээр зэрэглэлийн өрөөнд цагт 8,500 м³, гуравдугаар зэрэглэлийн өрөөнд цагт 4,500 м³ агаар боловсруулах систем суурилуулсан аж.
Засварын явцад хуучин өрөөний төлөвлөлтийг бүрэн өөрчилж, хана таазыг нян бактер үржихгүй, эмнэлгийн зориулалтын хүчитгэсэн хавтангаар хийсэн байна. Мөн автомат болон ган хаалгануудын суурилуулалт, сантехник, цахилгаан, холбоо дохиоллын шугам сүлжээний бүрэн шинэчлэл, эмнэлгийн хийн систем, хөргөлт, гэрэлтүүлгийн цогц шийдлийг багтаажээ.
Тус төслийн гүйцэтгэгчээр “Л хоёр” ХХК ажиллаж, Нийслэлийн Хөрөнгө оруулалтын газар захиалагчийн техникийн хяналтыг хэрэгжүүлсэн байна. Ийнхүү Сүхбаатар дүүргийн иргэд орчин үеийн стандарт хангасан, аюулгүй орчинд мэс заслын тусламж үйлчилгээ авах боломж бүрдлээ.
