АНУ болон Израилийн агаарын цохилтын улмаас Исламын Бүгд Найрамдах Иран Улсын Дээд удирдагч, Оюун санааны удирдагч Аятолла Али Хаменеи, түүний гэр бүлийн хэд хэдэн гишүүн, Ираны өндөр албан тушаалтнууд амь насаа алдсан тухай мэдээг Москва эгдүүцэл бухимдал дүүрнээр гүнээ харамсалтайгаар хүлээн авлаа.
ОХУ нь улс төрийн аллага, тусгаар тогтносон улсуудын удирдагчдыг “ангуучлах” үйл ажиллагааг эрс тууштай буруушааж, энэхүү үйлдэл нь соёл иргэншсэн улс хоорондын харилцааны үндсэн зарчмуудад харшилж, олон улсын эрх зүйг ноцтойгоор зөрчиж байна гэж үзэж буй юм.
Өнөөдрийг хүртэл үргэлжилсээр байгаа дайсагнасан зэвсэгт мөргөлдөөний улмаас хохирогч энгийн иргэдийн тоо тасралтгүй өсч, иргэний дэд бүтцийн объектуудад ноцтой хохирол учирч байна.
Арабын булангийн орнууд дахь АНУ-ын цэргийн баазуудад Ираны талаас өгч буй хариу цохилт, агаарын довтолгооноос хамгаалах ажиллагаа нь Дубай болон Кувейт хот дахь олон улсын нисэх буудлууд, Бахрейн, Катар, Кувейт, АНЭУ, Саудын Арабын далайн боомтууд, өндөр барилга байгууламжууд, зочид буудлуудад хохирол учруулсан талаар мэдээлж байна.
Ирж буй мэдээллээр Ормузын хоолойд усан тээвэр бүрэн зогссон байна. Энэ нь бүс нутгаас нүүрсустөрөгчийн экспортыг тасалдуулахад хүргэж, дэлхийн газрын тос, байгалийн хийн зах зээлд ноцтой тэнцвэргүй байдал үүсгэх эрсдэлтэй юм.
Бид НҮБ-ын дүрэм болон Цөмийн зэвсгийг үл дэлгэрүүлэх тухай гэрээний үндсэн дээр тулгамдсан асуудлуудыг зохицуулахын тулд хурцадмал байдлыг яаралтайгаар намжаах, байлдааны ажиллагааг зогсоох, мөн улс төр – дипломат үйл ажиллагаагаар асуудлыг зохицуулахыг уриалж байна.
Ингэхдээ Персийн булангийн бүс нутгийн бүх улсын хууль ёсны ашиг сонирхлыг харгалзан үзэх ёстой.
Ираны нөхцөл байдлын талаар ОХУ-ын ГХЯ-наас мэдэгдэл гаргажээ
}
Шинэ мэдээ
