Баруун Африкийн эргээс холгүй оршдог Кабо Верде арал улсад хэд хоног саатсан 150 орчим зорчигчтой MV Hondius аяллын круйз хөлгийг Испани улс боомтдоо хүлээж авахаар болсныг өчигдөр мэдэгджээ.
Уг хөлгийн зорчигчдын дунд үхлийн аюултай хантавирусийн халдвар дэгдсэний улмаас гурван хүн амиа алдаж, хэд хэдэн хүн өвчлөөд байгаа юм.
Аргентины өмнөд эргээс хөдөлсөн уг хөлгийн эцсийн зогсоол Атлантын далайн төв хэсэгт оршдог Кабо Верде улс байсан ч вирусийн дэгдэлтийн улмаас зорчигчдоо буулгаж чадаагүй.
Харин хантавирусийн халдвартай хүмүүст эрүүл мэндийн тусламж үйлчилгээ үзүүлэх чадвартай хамгийн ойрын цэг нь Испанийн харьяа Канарын арлууд болоод байв.
Тэгвэл уг хөлгийг гурав хоногийн дотор Канарын арлуудын нэг болох Тенериф арлын Гранадияа боомтод хүлээж авахад бэлэн болсныг Испанийн эрүүл мэндийн яам мэдээлжээ.
Өмнө нь Канарын арлуудын орон нутгийн захиргаа хөлгийг хүлээж авахаас татгалзаж байсан ч ийм шийдвэр гарсан байна.
Бүх зорчигчдыг хөлгөөс нүүлгэн шилжүүлсний дараа тусгаарлаж, эрүүл мэндийн үзлэг шинжилгээнд хамруулахыг Испанийн эрүүл мэндийн сайд Моника Гарсиа Гомез өчигдөр Мадрид хотод зохион байгуулагдсан хэвлэлийн хурлын үеэр хэлжээ.
Хөлөг дээр зорчиж байсан Нидерландын хос, Германы нэг иргэн нас барсан бол Их Британийн нэг иргэн замдаа Өмнөд Африкийн Бүгд Найрамдах Улсад (ӨАБНУ) үлдэж, эрчимт эмчилгээний тасагт шилжсэн юм.
Үүнээс гадна Нидерланд улс халдвар авсан байж болзошгүй өөр гурван зорчигчийг Кабо Верде улсаас хоёр тусдаа онгоцоор нүүлгэн шилжүүлснийг Дэлхийн Эрүүл Мэндийн Байгууллага (ДЭМБ) өчигдөр мэдээлжээ.
Хөлөг дээр өвчлөл эхэлсэн цагаас хойш ДЭМБ цаашид вирус өргөн хүрээнд тархах эрсдэл бага болохыг мэдэгдсээр байгаа.
Хантавирус бол мэрэгч амьтдаас хүнд халдварладаг вирус. Ховор тохиолдолд хүнээс хүнд дамждаг гэсэн баримт бий.
Гэхдээ хүнээс хүнд халдварласан тохиолдол өмнө нь Өмнөд Америкт бүртгэгдсэн уг вирусийн Андын омгийн төрөл зүйлийн тархалтын үеэр ажиглагдаж байжээ.
MV Hondius хөлөг дөрөвдүгээр сарын нэгний өдөр Аргентины өмнөд эргээс хөдөлсөн юм.
ӨАБНУ-ын Халдварт Өвчин Судлалын Үндэсний Хүрээлэн өөрийнх нь эмнэлэгт нас барсан Нидерландын иргэн эмэгтэй болон одоо эмчлүүлж байгаа Их Британийн иргэн эрэгтэй хоёроос хантавирусийн Андын төрөл илэрснийг баталжээ.
“Энэ бол хүнээс хүнд халдварладаг нь мэдэгдсэн цорын ганц төрөл зүйл юм. Гэхдээ ийм халдвар маш ховор, зөвхөн их ойр харилцаатай хүмүүсээс л илэрдэг” гэж тус хүрээлэнгээс мэдээлсэн байна.
MV Hondius хөлгийн оператор компани ирэх Бямба гарагт Тенериф арлын Санта Круз боомтод нэвтрэх хүсэлт гаргасныг Канарын арлуудын захирагч Фернандо Клавио өмнө нь сэтгүүлчдэд мэдэгдэж байв.
Тэрбээр уг хүсэлтэд татгалзсан хариу өгсөн ч дараа нь Испанийн ерөнхий сайд Педро Санчестай ярилцсаны дараа төв засгийн газрынхаа шийдвэрийг дагахаар болсон байна.
Хөлөг дээр байгаа Испанийн 14 иргэнийг онгоцоор нийслэл Мадридад хүргэсний дараа тусгаарлаж, шинжилгээ авах бол бусад улсын иргэдийг Канарын арлууд дээр тусгаарлаж, үзлэгт хамруулсны дараа тус тусын эх оронд нь буцаах юм байна.
Хөлөг дээр нийт 23 улсын иргэд байгаа гэсэн мэдээлэл бий. Тухайлбал 19 зорчигч, хөлгийн багийн дөрвөн гишүүн Их Британийн иргэд бол АНУ-ын 17, Нидерландын 8, Германы 7 иргэн байгаа гэнэ.
Хөлгийн багийн гишүүдийн ихэнх нь Филиппиний иргэд юм байна.
Эх сурвалж: Reuters
