Улсын Их Хурлын Байгаль орчин, хүнс, хөдөө аж ахуйн байнгын хорооны 2026 оны арваннэгдүгээр сарын 04-ний өдрийн хуралдаанд Байгаль орчин, уур амьсгалын өөрчлөлтийн сайд Ц.Сандаг-Очир, Төрийн нарийн бичгийн дарга Ш.Батбаяр, Тусгай хамгаалалттай газар нутгийн бодлогын газрын дарга Ц.Уранчимэг, Хүрээлэн буй орчны бодлогын хэрэгжилтийн газрын дарга Г.Энхмөнх нар Нөмрөгийн дархан цаазат газарт гарсан ой, хээрийн түймрийн улмаас үүссэн нөхцөл байдал, авч хэрэгжүүлж буй арга хэмжээ болон хүрэн баавгайн тархац, тоо толгой, амьдрах орчны асуудлаар мэдээлэл өглөө.
Дорнод аймгийн Халхгол сумын нутагт гарсан түймэр нийт 528,765.5 га талбайг хамарсан бөгөөд үүнээс Нөмрөгийн дархан цаазат газрын 468,965.7 га буюу нийт нутаг дэвсгэрийн 79.8 хувь нь түймэрт өртсөн урьдчилсан мэдээлэл байна.
Нөмрөгийн дархан цаазат газарт 487 зүйл ургамал, 263 зүйл шувуу, 24 зүйл загас бүртгэгдсэн бөгөөд хүрэн баавгай, хандгай, халиун буга, бор гөрөөс зэрэг амьтдын амьдрах орчин болдог.
Түймрийн улмаас байгаль орчинд учирсан хохирлыг тогтоох хээрийн судалгаанд аравдугаар сарын 23-30-ны өдрүүдэд холбогдох байгууллагын 50 гаруй албан хаагч, эрдэмтэн, судлаач оролцож байна.
Хохирлын үнэлгээг хиймэл дагуулын зураглал, газар дээрх хэмжилт, дээжлэлт, лабораторийн шинжилгээнд үндэслэн дөрвөн үе шаттайгаар гүйцэтгэж байна.
Ингэхдээ түймэрт өртсөн талбайн шаталтын зэрэглэл, ургамал, хөрс, зэрлэг амьтдын амьдрах орчинд үзүүлсэн нөлөөлөл, экологийн болон эд хөрөнгийн хохирлыг тогтооно.
Хохирлын үнэлгээний урьдчилсан дүнг арваннэгдүгээр сарын 16-ны дотор гаргаж, Шүүх шинжилгээний байгууллагад хүргүүлэхээр төлөвлөсөн.
Мөн зэрлэг амьтдын өвөлжилтийг дэмжих зорилгоор 30,000 боодол өвс бэлтгэн, шаардлагатай байршилд хүргэхээр төлөвлөсөн.
Биотехникийн арга хэмжээ авч хэрэгжүүлэхэд шаардагдах төсвийн урьдчилсан тооцоо гаргаж, Засгийн газрын өнөөдрийн хуралдаанд танилцуулснаар Засгийн газрын нөөц сангаас 629 сая төгрөгөөр санхүүжүүлэх шийдвэр гарсан.
Цаашид хохирлын үнэлгээнд үндэслэн богино, дунд, урт хугацааны нөхөн сэргээлтийн төлөвлөгөө боловсруулж, байгалийн аясаар сэргэн ургах боломжтой болон сэргээлт шаардлагатай талбайг ялган тогтоохоор төлөвлөсөн.
Мөн хамгаалалтын захиргааны техник, тоног төхөөрөмж, холбооны чадавхыг сайжруулах, хилийн бүсэд түймрээс урьдчилан сэргийлэх, эрт илрүүлэх тогтолцоог бэхжүүлэх, экосистемийн урт хугацааны мониторинг хийхэд анхаарч ажиллана.
Улмаар хүрэн баавгай суурьшлын бүсэд рүү нэвтэрч, иргэдийн аюулгүй байдалд эрсдэл учруулж буй асуудлаар холбогдох мэдээлэл өглөө.
Улсын хэмжээнд 1986 онд хүрэн баавгайг тоолоход 500 орчим байжээ.
Өнгөрсөн хугацаанд 74 баавгайг аюулгүй болгож, 10 гаруй бамбаруушийг тэжээн байгальд нь буцаан тавих ажлыг хийж байна.
Түүнчлэн ирэх жилээс баавгайн тооллогыг эхлүүлнэ.
Энэ жил зөвхөн манай улсын суурьшлын бүсэд бус Канад, Япон, ОХУ гээд олон улсад баавгай орж ирсэн нь зөвхөн идэш тэжээлийн хомсдол гэхээс илүүтэй уур амьсгалын өөрчлөлт нөлөөлж байгааг эрдэмтэд онцолж байгаа талаарх мэдээллийг мөн өглөө.
