Монгол ноолууран хувцас, согтууруулах ундаа Японыг байлдан дагуулж эхэлжээ

Монголын олон ч
компани өөрийн нэрийн бүтээгдэхүүнээ арлын Япон Улсад экспортлохоор хэдийнэ
бэлдэж эхэлжээ. Учир нь Ерөнхий сайд Ч. Сайханбилэг 2014 оны хоёрдугаар сарын
9-нд Монгол Улсын Ерөнхий сайдын хувиар хилийн чанадад хийх анхны айлчлалаараа
Япон Улсыг сонгож, энэ айлчлалынхаа үеэр Японд олон төрлийн бараа, бүтээгдэхүүн
экспортлох хоёр талын хамтарсан худалдааны гэрээ байгуулаад ирсэн юм. Энэхүү гэрээний
дагуу Монгол Улс Японд шимийн архи, ноолууран хувцас гаргаж эхэлсэн бөгөөд энэ
бараа, бүтээгдэхүүн өдгөө арлын Японыг байлдан дагуулж эхэлсэн байна. Японы
Ерөнхий сайд Шинзо Абе Монгол Улсын Ерөнхий сайд Ч.Сайханбилэгтэй байгуулсан
дээрх худалдааны гэрээнд сэтгэл ханамжтай байгаагаа илэрхийлэхийн сацуу \”Энэ
гэрээ хоёр орны стратегийн түншлэлийн суурь болно хэмээн харж байна. Бид хоёр
орны худалдааны харилцаа ойрын ирээдүйд улам бэхжинэ гэдэгт итгэлтэй байна”
гэсэн юм. Тэгвэл дээрх гэрээтэй холбогдуулан \”Гоби” корпораци өнгөрсөн 9 сард их
наран улсын нийслэл Токио хотод өөрийн төлөөлөгчийн газраа нээж, энэ үеэрээ
Японы ноолууран хувцасны хамгийн том ханган нийлүүлэгч болохоор зорьж буйгаа илэрхийлсэн.
Мөн энэхүү газрын гүйцэтгэх захирал Д.Наранбаатар \”Монгол Улс жилдээ Япон Улсад
хоёр сая ширхэг хүртэлх ноолууран хувцас экспортлох боломжтой” гэж хэлсэн юм.
Харин энэ оны эхний 9 сарын байдлаар Монгол Улс Японд нийтдээ 500 мянган
ам.долларын үнэ бүхий 13 мянга орчим ноолууран хувцас экспортлосон байна.
Тэгвэл Гаалийн ерөнхий газраас мэдээлснээр, Монгол Улс энэ оны эхний 9 сарын
байдлаар Япон Улсад нийтдээ 14,3 сая ам.долларын бараа, бүтээгдэхүүн
экспортлосон гэсэн юм. Үүний тал хувийг зэс эзэлж байгаа бөгөөд Монгол Улс ердөө
өнгөрөгч наймдугаар сараас эхлэн Японд зэс экспортолж эхэлсэн байна.

Э.Төгс