![\"\"](http://undesten.mn/uploads/posts/2017-09/1506389712_21765074_913466425467572_5623401142307996089_n.jpg "\\"\\"")
Өчигдөр зөвлөлтийн нисгэгчгүй онгоцны тухай бичсэн бол энэ удаад америкийн онгоцны тухай нэгэн түүхийг сонирхуулахаар шийдлээ.
1970 оны 2 дугаар сарын 2-ны өвлийн хүйтэн өдөр АНУ-ын Монтана муж дахь Малмстром нисэх буудлаас америкийн нисэх хүчний 71 дүгээр амдан сөнөөгч онгоцны эскадрилийн хоёр нэгж \”Ф-106\” онгоц сургуулийн нислэг үлдэхээр хөөрчээ. Нэг онгоцыг нь ахмад Гари Фауст жолоодож явлаа. Түүний нисэж буй \”Ф-106\” бол Консайр компанид 1958 онд үйлдвэрлэгдсэн 858-0787 дугаар авч зэвсэглэлд орсон онгоц байв. Хоёр онгоц агаарын байлдааны маневр үйлдэж байтал Гари Фаустын жолоодож явсан онгоц гэнэт жолоодлогогүй болж агаар сүүл хэсгээр доошоо, толгой хэсэг нь дээшээ хараад эргэлдэж эхэлжээ. Фауст эргэлтийг намжааж онгоцыг тогворжуулах гэж оролдсон боловч амжилтгүй болов. Хамгийн сүүлийн арга болох газардахад тооромз байдлаар ашигладаг шүхрээ задалсан боловч эргэлтийг нь зогсоож чадсангүй.
Ингээд бүхий л арга хэргэлсэн Фауст ойролцоогоор 4600 метрийн өндөрт катапульт хийж онгоцыг орхин шүхрээр буусан байна. Нисгэгч нь суудалтайгаа салаад явахад хөнгөн болсоноос гадна нисгэгчийн суудлын сүүлээс гарч буй тийрэлтэд хүч нь онгоцны толгойг доошлуулж онгоцыг хэвтээ тэнхлэгт оруулав. Энэ нь онгоцны эргэлтийг зогсоож хэвтээ хавтгайд хэвийн нисэж эхэлсэн байдаг. Агаарт шүхрээр бууж буй Фауст өөрийн нисгэгчгүй онгоцоо аажимаар өндөрөө алдан цааш нисэж буй харж байлаа. Хос баг болон нисэж байсан нөгөө нисгэгч мөн адил нисгэгчгүй онгоцыг ажиглаж байсан бөгөөд Фаустад хандаж \”Чи буцаад онгоцондоо орж суусан нь дээр юм бишүү\” хэмээн радиогоор хошигнож байсан гэдэг. Онгоц аажмаар өндрөө хасаж явсаар Монтана мужийн Биг Сэнди гэдэг газарт яг хэвтээ тэнхлэгийн дагуу элгээрээ маш зөөлөн газардсан байна. Маш бага хүч гарган ажиллаж байсан тийрэлтэд хөдөлгүүр нь ингэж газардах боломжийг олгосон гэсэн дүгнэлт хожим гарсан.
![\"\"](http://undesten.mn/uploads/posts/2017-09/1506389806_21765092_913466432134238_2310561658709215512_n.jpg "\\"\\"")
Бараг шалбархай төдий гэмтэл авсан уг онгоцны далавчийг нь салган нисэх буудалд зөөж авчраад хөнгөн засвар хийжээ. Улмаар 49 дүгээр амдан сөнөөгч онгоцны эскадрильд 1979 он хүртэл нислэг үйлдэж байгаад 1986 онд уг онгоцыг АНУ-ын Нисэх хүчний үндэсний музейд олон түмний үзмэр болгон тавьсан байдаг.
\”Ф-106\” бол 1960-1980 онуудад АНУ-ын нисэх хүчний үндсэн амдан сөнөөгч онгоц байсан ба нийтдээ 342 нэгж ийм онгоц үйлдвэрлэсэн байдаг. Онгоц нэг хүний суудалтай, урт нь 21,5 метр, далавчны урт 11,6 метр, хөөрөх дээд жин 15,6 тонн, дээд хурд 2,3 мах/2455 км/цаг/, байлдааны нислэгийн алслалт 926 км үзүүлэлттэй онгоц байлаа.
![\"\"](http://undesten.mn/uploads/posts/2017-09/1506389756_22008313_913466418800906_8154606658833148602_n.jpg "\\"\\"")
Р.Энхболд
