![\"\"](http://undesten.mn/uploads/posts/2015-11/1446537920_mu.jpg "\\"\\"")
Одоогоос хоёр жилийн өмнө буюу 2013 оны аравдугаар сарын 17-18-нд шилжих шөнө Налайх дүүрэгт нэгэн иргэнийг зургаан удаа буудаж хөнөөсөн гэмт хэрэг гарч байсан билээ. Уг хэрэгт А.Мэндбаяр гэгчийг холбогдуулан шалгаж шүүхээс түүнд 25 жилийн хорих ял оноосон.
Харин өнөөдөр талийгаачийн аав Д.Мөнхжаргал хэвлэлийнхэнд хандсан юм. Учир нь тэрбээр цагдаагийн байгууллагаас өөрийг нь сүрдүүлж, заналхийлж байна хэмээсэн. ЦЕГ-ын Хэвлэл мэдээллийн төвийн ажилтан, ахмад Ё.Лхагвасүрэнгийн хэвлэл мэдээллийн хэрэгслээр ярьсан мэдээллээс үндэслэж ийнхүү олон нийтэд хандаж байна гэж тэрбээр тайлбарлалаа.
Д.Мөнхжаргал \”Миний хүүг 2013 онд Налайх дүүрэгт аваачиж, онц хэрцгийгээр зургаан удаа буудаж хөнөөсөн. Буу тулгаад буудсан алуурчинд 25 жилийн ял өгөөд явуулсан. Гэхдээ тухайн үед Налайх дүүргийн Цагдаагийн хэлтсийн дарга, хошууч н.Од гэдэг хүн хэвлэл мэдээллийн хэрэгсэлд ярилцлага өгөхдөө \”Энэ хэргийг гурван хүн үйлдсэн” гэж ярьсан. Гурвуулаа байсан гэдгийг нь ч олон хүн ярьсан байдаг. Гэсэн ч нэг л хүнд хариуцлага тооцсон. Нөгөө хоёр нь ямар хүмүүс байсныг цагдаа тогтоох ёстой.
-Цагдаагийн байгууллагаас энэ хэргийн талаар танд ямар тайлбар өгсөн бэ?
-Хүүгээ алдсанаас хойш би хоёр жил гаруйн хугацаанд хэргийн үнэн зөвийг шийдэж өгөөч гэж цөхөртөл явж байна. Хэргийг цагдаагийнхан биш би илрүүлсэн юм. Яаж илрүүлсэн юм гэхээр хэрэг гарахаас нэг сарын өмнө миний хүүг алсан А.Мэндбаяр гэж хүн эцэгтэйгээ нийлээд хүүг маань заналхийлсэн байдаг юм. Миний хүүг хар тамхи зарж борлуулах сүлжээндээ оруулах шахалт үзүүлсэн. Тэгээд эсэргүүцсэнийхээ төлөө амиа алдсан. Мөн хэргийн газар дээрээс миний хүүтэй нийлээд дөрвөн хүний хурууны хээ олдсон байхад ганцхан хүнд ял оноосон. Нөгөө хоёр хүний хурууны хээ нь ямар хүнийх байсныг тодруулж өгөөч гэж би зөндөө өргөдөл, гомдол гаргасан. Гэтэл цагдаа, хуулийн байгууллага тоохгүй байгаа хэр нь намайг заналхийлж байна.
-Таныг заналхийлсэн гэдгээ тодруулахгүй юу?
-Энэ оны аравдугаар сарын 27-ны өдөр би \”Ийгл” телевизийн \”Иргэний мэдээ” нэвтрүүлгээр орсон юм. Миний хүүг хөнөөхөд гурван хүн оролцсон гэдгийн тухайн үеийн цагдаагийн байгууллагын даргаар ажиллаж байсан хүн олон нийтэд мэдээлсэн хэр нь нэг л хүнд ял шийтгэл ногдуулсан. Нөгөө хоёр нь ямар хүн байсан нь одоо болтол тодорхойгүй байна. Би телевизийн нэвтрүүлэгт орохдоо энэ тухай ярьсан. Гэтэл аравдугаар сарын 28-ны өдөр ЦЕГ-ын ХМТ-өөс \”Цагдаагийн байгууллагын ажилтан алба хаагчдын нэр хүндэд удаа даргаа халдаж, онц хүнд гэмт хэрэгт сэжиглэж байна. Энэ бүгдийг дотоод хяналт шалгалтын алба шалгана. Шалгаад батлагдахгүй бол энэ хүнд эрүүгийн хэрэг үүсгэнэ” гэсэн.
Тиймээс би тэвчихээ байгаад өнөөдөр олон нийтэд хандаж байна. Миний хүүхдийг ил алсан. Гэтэл намайг далд аргаар алах гэж байна. Надаас хэн ч уучлал гуйгаагүй. Миний болоод гэр бүлийнхний маань амь насны асуудал цагдаагийн байгууллагатай шууд холбоотой.
