Хойд Солонгосын удирдагч Ким Чен Ын болон түүний талийгаач эцэг Ким Чен Ир нар Бразил улсын хуурамч паспорт ашиглан 1990-ээд оны үед барууны орнуудад зорчиж байсныг барууны тусгай албаны эх сурвалжаас олж мэдсэнээ Ройтерс агентлаг өнөөдөр мэдээлжээ. Тус агентлагийн мэдээлснээр эцэг хүү хоёр Ким хуурамч паспортоор өрнөдийн хоёр ч орноос виз авахаар мэдүүлж байсныг барууны тагнуулын байгууллагын таван эх сурвалж баталсан бөгөөд тэдний ашиглаж байсан паспортууд дээр Ким Чен Ыныг “Josef Pwag”, Ким Чен Ирийг “Ijong Tchoi” гэсэн нэрээр нэрлэсэн байсан ажээ. Мөн уг паспорт дээр Ким Чен Ыны төрсөн өдрийг нь 1983 оны хоёрдугаар сарын 1 гэсэн бол эцгийнх нь паспорт дээр 1940 оны дөрөвдүгээр сарын 4 гэсэн байна. Тэднийг Бразилийн Сан Пауло хотод төрсөн гэж бүртгэсэн байсан гэнэ.
Хойд Солонгосыг захирагч гэр бүл хуурамч бичиг баримт хэрэглэдэг тухай мэдээлэл өмнө нь гарч байсан ч энэ удаагийнх шиг фото хуулбар нь ил гарч байгаагүй юм байна.
Энэхүү мэдээлэл гарсны дараа Бразил улсын гадаад хэргийн яам тус улсын гадаад паспорт хэрхэн тэдний нэр дээр гарсныг шалгаж эхэлжээ. Эх сурвалжийн мэдээлснээр Бразилын хоосон паспортыг гадаадын консулууд руу илгээж, тэнд нь хэвлэж гаргадаг байна. Харин тухайн үед тэдэнд виз гарсан эсэх тодорхойгүй байгаа ба гэхдээ тэд эдгээр паспортуудаар Бразил, Япон, Хонгконгод зорчсон байх магадлалтайг тагнуулынхан мэдээлжээ. 10 жилийн хугацаатай олгогдсон паспортуудыг Прага дахь Бразилийн элчин сайдын яам 1996 оны хоёрдугаар сарын 26-нд хэвлэсэн гэх дардас байгаа юм байна. Ким Чен Ын багадаа Швейцарийн олон улсын дунд сургуульд элчин сайдын жолоочийн хүүхэд гэсэн хуурамч нэрээр суралцаж байсан гэх баримт байдаг бөгөөд Японы хэвлэл мэдээллийнхний мэдээлж байгаагаар тэрээр 1991 онд дээрх паспортоор Японд зорчиж байсан ажээ.
