Өнөөдөр “Улаанбаатар” зочид буудлын “Хар хорин” танхимд “Пёнчан – 2018” Паралимпийн өвлийн XII наадамд оролцох Монгол Улсын баг тамирчдыг үдэн гаргах ёслол боллоо.
Энэхүү наадамд оролцох багийг танилцуулахад, “Пёнчан – 2018” Паралимпийн өвлийн XII наадмын Монголын багийн ахлагч Д.Рэнчинханд, Пара гүйлтийн цанын үндэсний шигшээ багийн тамирчин, ОУХМ Б.Ганболд, Пара гүйлтийн цанын үндэсний шигшээ багийн ахлах дасгалжуулагч Ж.Дашдондог, тус багийн цанын тосолгооны дасгалжуулагч Н.Сандагдорж, багийн эмч Ш.Болормаа, багийн хэвлэл мэдээллийн ажилтан Д.Батжаргал нарын 6 хүний бүрэлдэхүүнтэй баг Пёнчан хотыг зорих юм.
Энэхүү ёслолд БСШУС-ын Дэд сайд Ё.Отгонбаяр, БСШУСЯ-ны БТСБГ-ын дарга С.Чинбат, БТСГ-ын дарга Ц.Шаравжамц, Үндэсний шигшээ багийн албаны улсын дасгалжуулагч Ч.Насантогтох, Монголын үндэсний паралимпийн хороо /МҮПХ/-ны ерөнхийлөгч Д.Нямхүү, Тэргүүн дэд ерөнхийлөгч Д.Сүрэнхорлоо тэргүүтэй зочид төлөөлөгчид оролцлоо.
Энэ үеэр МҮПХ-ны ерөнхийлөгч Д.Нямхүү “Манай гүйлтийн цанын тамирчин Б.Ганболдын бэлтгэл сургуулилт “Онцсайн” хангагдсан. Түүний бэлтгэлийг хангахад онцгой дэмжлэг үзүүлсэн БТСГ-ын дарга Ц.Шаравжамц болон түүний хамт олон, дасгалжуулагч багш Ж.Дашдондог, Н.Сандагдорж, ахлагч Д.Рэнчинханд нарт чин сэтгэлийн талархал илэрхийлж байна. Манай Б.Ганболдын хувьд Сочигийн өвлийн паралимпийн цасан замд хурдаа сорьсон туршлагатай тамирчин. Энэ удаа бид түүнийг шигшээ уралдаанд, цаашлаад медалийн төлөө өрсөлдөх хэмжээнд хүрсэн гэж ихэд найдаж байгаа. Өвлийн спортоор анхдагч медальтан болох боломжтой гэж харж байна” хэмээн онцолсон юм.
Энэхүү баг тамирчдаа үдэх ёслолын үеэр багийн ахлагч Д.Рэнчинханд, Монгол Улсын Төрийн далбааг “Пёнчан – 2018” Паралимпийн өвлийн XII наадамд гүйлтийн цанын 3 төрөлд хурд, хүчээ сорих Монголын багийн тугч, ОУХМ Б.Ганболдод гардуулан өгсөн юм.
Монголын баг тамирчдын ёслолын хувцсыг ивээн тэтгэж урласан Говь компанийн хамт олонд МҮПХ-ны ерөнхийлөгч Д.Нямхүү тамирчдаа төлөөлөн талархал илэрхийлж, дурсгалын зүйл гардуулав. Мөн энэ үеэр БТСГ-ын дарга Ц.Шаравжамц, баг тамирчдад наадмын мандат болон онгоцны тийзийг нь гардуулан өгч амжилт хүслээ.
Дашрамд дуулгахад, БНСУ-ын Пёнчан хотноо гуравдугаар сарын 9-18-нд болох өвлийн паралимпийн XII наадам гүйлтийн цана, биатлон, уулын цана, хоккей, тэргэнцэртэй кёрлингийн спортын 6 төрлөөр 80 багц медалийн төлөө 670 тамирчин өрсөлдөнө. Монгол Улсын баг тамирчид 2006 онд Италийн Турин хотноо болсон өвлийн паралимпийн Х наадамд анх удаа гүйлтийн цанын төрлөөр оролцсон түүхтэй.
Харин энэ удаа ОУХМ Батмөнхийн Ганболд гүйлтийн цанын 20 км, 10 км, 1 км гэсэн 3 төрөлд уралдах юм. Д.Ганболд нь Сүхбаатар аймгийн Дарьганга суманд 1991 онд төрсөн. Гүйлтийн цанаар 2012 оноос Ж.Дашдондог багшийн удирдлага дор хичээллэж эхэлжээ. “Сочи – 2012” өвлийн паралимпийн наадамд 20 км-т 14, 10 км-т 31, 1 км-т 25 дугаар байрт тус тус эзэлсэн юм.
Тэрбээр 2016 онд Германы Финстрау хотноо болсон ДАШТ-д 20 км-т есдүгээр байрт орж, Пёнчаны паралимпийн эрхээ 180 оноо авахаас 260 оноо авч шалгарсан байна. Олон улсын паралимпийн хорооноос гаргасан 2018 оны 2 дугаар сарын 26-ны чансаагаар LW-6 ангилалд 55 тамирчнаас 23 дугаар байрт жагсчээ.
