Чөлөөт бөхийн 2018 оны насанд хүрэгчдийн Азийн АШТ Кыргызстаны нийслэл Бишкект өчигдөр эхэллээ. Эхний өдөр эмэгтэйчүүдийн 50, 55, 59, 68, 76 кг-ын жингийн барилдаан болж, монголын таван бөх бүгд медалийн төлөө барилдсанаас нэг мөнгө, гурван хүрэл медаль хүртлээ. Тодруулбал, 68 кг-ын жинд “Хилчин” спорт хорооны тамирчин ОУХМ Ш.Түмэнцэцэг мөнгө, 50 кг-д “Хангарьд” спорт клубийн тамирчин ОУХМ Э.Нарангэрэл, 55 кг-д “Хилчин” спорт хорооны тамирчин ОУХМ Э.Даваачимэг, 59 кг-д “Хасу-Мегастарс” клубийн тамирчин ОУХМ Б.Шоовдор нар хүрэл медаль хүртэв. Эхний өдөр таван жингийн дөрөвт нь БНХАУ-ын бөхчүүд түрүүллээ. Энэ өдөр манай бөхчүүд хэрхэн барилдсан тоймыг хүргэе.
50 кг (12 бөх): 1. Лей Чун (БНХАУ) 2. Винеш (Энэтхэг) 3. Э.Нарангэрэл (Mонгол), Юки Ирие (Япон)
Э.Нарангэрэл шөвгийн наймд Вьетнамын Ти Хуан Нгиенийг оноогоор цэвэр (10:0) ялсан ч хагас шигшээд БНХАУ-ын Лей Чунд цэвэр ялагдсан. Тэгвэл Узбекистаны Актенге Кеунимаеватай хүрэл медалийн төлөөх барилдаж 8:2-оор ялав.
55 кг (9 бөх): 1. Саки Игараши (Япон), 2. Ох Хью Мин (БНСУ) 3. Э.Даваачимэг (Mонгол), Луо Ланнуан (БНХАУ)
Э.Даваачимэг 1/4 шигшээд Энэтхэгийн Лалита Лалитаг 6:0-ээр ялсан ч хагас шигшээд Японы Саки Игарашид 0:3-аар ялагдсан. Хүрэл медалийн төлөөх барилдаанд Казахстаны Назгул Нураханыг оноогоор цэвэр (14:4) ялснаар өнгөрсөн жилийн амжилтаа бататгав.
59 кг (10 бөх): 1. Ронг Ниннин (БНХАУ) 2. Набира Эсенбаева (Узбекистан) 3. Б.Шоовдор (Mонгол), Сангеета Сангеета (Энэтхэг)
Б.Шоовдор тэгшитгэлд Вьетнамын Ти Вин Нгиенийг, шөвгийн наймд U-23 болон залуучуудын дэлхийн аварга Японы Юзүрү Күманог тус бүр цэвэр ялсан ч хагас шигшээд энэ жилийн Иван Ярыгиний “Алтан Гранпри”-гийн аварга БНХАУ-ын Рон Ниннингэд оноогоор цэвэр ялагдсан. Тэгвэл хүрэл медалийн төлөөх барилдаанд Тайландын Айнфен Пимсупакыг 29 секундэд оноогоор цэвэр ялав.
68 кг (9 бөх): 1. Зоу Фенг (БНХАУ) 2. Ш.Түмэнцэцэг (Монгол) 3. Ирина Казюлина (Казахстан), Меерим Жуманазарова (Кыргызстан)
Ш.Түмэнцэцэг 1/4 шигшээд өнгөрсөн жилийн Азийн АШТ-ий мөнгөн медальт, Энэтхэгийн Дивя Какраныг цэвэр (10:0), хагас шигшээд Кыргызстаны Меерим Жуманазароваг 2:2-оор ялсан ч алтан медалийн төлөөх барилдаанд ДАШТ-ий мөнгөн медальт, Азийн наадам болон Азийн аварга БНХАУ-ын Зоу Фенгэд оноогоор (0:10) цэвэр ялагдав. Энэ нь түүний Азийн АШТ-ий дөрөв дэх медаль болж байна.
76 кг (9 бөх): 1. Зоу Киан (БНХАУ) 2. Хироэ Сүзүки (Япон) 3. Эльмира Сыздыкова (Казахстан), Хван Юн Жу (БНСУ)
А.Чанцалнямаа 1/4 шигшээд БНХАУ-ын Зоу Кианд 1:6-гаар, хүрэл медалийн төлөөх барилдаанд “Рио-2016” олимпийн наадмын хүрэл медальт, Казахстаны Эльмира Сыздыковад оноогоор цэвэр (2:12) ялагдлаа.
Харин өнөөдөр эмэгтэйчүүдийн 53, 57, 62, 65, 72 кг-ын жингийн барилдаанаар тэмцээн үргэлжилнэ. Тодруулбал:
10:30-11:00: Эмэгтэйчүүдийн 53, 57, 62, 65, 72 кг-ын жин үзэлт
12:30-15:30: Эмэгтэйчүүдийн 53, 57, 62, 65, 72 кг-ын урьдчилсан болон дагах барилдаан
15:30: Эрэгтэйчүүдийн 57, 65, 70, 79, 97 кг-ын сугалаа
20:00-22:00: Эмэгтэйчүүдийн 53, 57, 62, 65, 72 кг-ын шигшээ барилдаан болно.
