Хууль зүй, дотоод хэргийн яамны Гэмт хэргээс урьдчилан сэргийлэх ажлыг зохицуулах зөвлөл болон Харилцаа холбооны зохицуулах хороо хамтран хулгайд алдагдсан утсыг олох боломжтой шинэ системийг нэвтрүүлэхэд бэлэн болж байна. Иргэд өмнө нь утсаа алдсаны дараа цагдаад утасны сериал дугаараа тэмдэглүүлж, олдохыг хүлээж суудаг байсан. Харин “Smart divice” систем нь хулгайд алдагдсан утсыг хулгайч болон өөр бусад хүн ашиглах боломжгүй болгох аж. Ингэхийн тулд иргэд утсаа алдахаас урьдчилан сэргийлэх үүднээс smartdevice.mn хуудсанд хандаж өөрийн болон гэр бүл, дотны хүмүүсийнхээ мэдээллийг бүртгүүлэх шаардлагатай.
Уг системд үүрэн телефоны бүх операторууд хамтран ажиллаж байгаа юм. Тиймээс бүртгэлтэй утас алдагдсан бол хулгайн утас гэдэг нь бүх үүрэн утасны оператор, цагдаагийн газар, тэр бүү хэл захын гар утасны худалдагч системээр шалгаад мэдэх боломжтой учир дамлан борлуулах аргагүй юм байна. Ингэхдээ алдагдсан утсанд өөр сим карт хийхэд тухайн операторын системд энэ дугаар хулгайн утас ашиглаж байна гэсэн мэдээлэл нь мессежээр очно. Бүртгэлтэй системд иргэн өөрийн нэвтэрч орох эрхээрээ л орохоос биш өөр хэн нэгэн нэвтрэх боломжгүй онцлогтой аж.
Ийм бүртгэл хийлгэхдээ гар утасны сериал дугаар буюу имей кодоос гадна мөн хэрэглэгчийн товч мэдээлэл, утасны дугаар зэргийг бүртгүүлнэ. Харин утсаа алдсан тохиолдолд алдсан тухай мэдээллээ заавал оруулах ёстой.
Энэхүү системийг нэвтрүүлснээр хулгайн утсыг ашиглах боломжгүй болох тул утас хулгайлах гэмт хэрэг буурна гэж үзэж байгаа юм. Тэгэхээр худалдаа эрхлэгчид ч бас гар утас худалдан авахдаа системд шалгаж үзэж байж авах хэрэгтэй болж байна.
“Smart divice” системийг энэ сарын дундуур хэрэглээнд нэвтрүүлэхээр ажиллаж байгаа юм байна. Цаашид энэ системийг идэвхитэй ашиглаж хэвших нь нийгэмд гарч буй гэмт хэргийн бууралтад чухал ач холбогдолтой болох юм. Гэхдээ уг систем нь гэмт хэргийг бууруулахад чиглэгдэж буй бөгөөд алдагдсан утас бүгд олдоно гэж туйлшран ойлгох нь учир дутагдалтай юм гэдгийг холбогдох албаныхан онцолж байна.
Я.Хулан
