МУГТ, Кёкүшюзан Д.Батбаяр гэргийн МУГЖ, дуучин Т.Баясгаланд зориулж хайрын шүлгийн уралдаан зарлаж 9 оролцогчийг шилдгээр шалгаруулсан билээ. Олны танил хосын хайрын романс нэлээд өргөн цар хүрээтэйн дээр өндөр чансаатай уралдаанаар өрнөсөн нь хямрал нүүрлэсэн гэх энэ үед хар, цагаан атаархлыг дагуулаад амжив.
“Мөнгөтэй хүн эхнэртээ зориулаад сэтгэлийн үгээ бичсэн шүлэг зохиож чадахгүй ч мөнгийг нь төлөөд бусдаар зохиолгож бас чаддаг ажээ. Тэр шүүгчдийг нь хүртэл харчих” гэх жишээтэй шүүмжлэлүүд сошиалаар явж харагдана. Шүүгчид нь Болор цомын эзэд.
Мөн тэмцээнд ирүүлсэн нийт оролцогчдоос 400 шүлгийг шүүж ариутган “Ханьдаа” хэмээх номыг бүтээсэн байгаа юм.
Уг нь гурван шилдгийг шалгаруулах байсан ч есөн шилдэг оролцогчийг шалгаруулахаар болж шагналын сангаа ахиулж, тэдэнд Японд аялах, сүмо бөхийг дэргэдээс нь сонирхох боломжийг олгосноос гадна мөн гар утас, зурагт гардуулан тун чиг бэлтэй загнасан юм. Энэ хэмжээний мөнгийг хайртай хүндээ харамгүй цацаж болох ч, ходоод нь хоосон хэдэн жаалд хандив болгосон бол овоо л буян болох байж дээ гэх жиг жуг яриа ч хэсч явна. Хэдэн шад шүлэг хэр үнэ хүрснийг дээрх шагналын бай илт харуулаа биз ээ. Халуухан хайрын үнэ цэнэ энэ болой.
Тэргүүн байрын шагнал хүртсэн Яруу найрагч Л.Ганзулын шүлэг
Гэргийн гэгээ
Дэргээд өнгөрдөг өдөр хоногуудад
Дэргэд гийсэн энхрийхэн минь дээ
Дэлхийн саран үзэсгэлэн гоо ч
Гэргийн гэгээтэй яахан дүйх вэ
Хатираад оддог хоног саруудад
Хажууд мандсан танхилхан минь дээ
Хаан тэнгэрийн наран илчтэй ч
Хайрын дэргэд юухан ч билээ дээ
Галигуулж холддог улирал жилүүдийг
Хамтдаа элээсэн гэгээн тавилан минь дээ
Гараг одод нь тэнгэрийн тэртээд дээ
Харин чи минь миний л зүрхэнд дээ
Дахилт:
Сэтгэлийн тэнгэрээс зөөлсөн асгарсан
Энэрлийн цагаан бороо гэж боддог доо, чамайгаа
Итгэлийн энгэрийг түшиж нялхарсан
Ээлтэй цагийн цэцэг гэж хайрладаг даа, чамайгаа
Я.Хулан
