АНУ-ын Ерөнхийлөгч Дональд Трамп, Умард Солонгосын удирдагч Ким Чен Ын нар ирэх тавдугаар сард уулзахаар тохирсныг Өмнөд Солонгосын тусгай элч саяхан Вашингтон хотноо мэдэгдлээ.
Энэ долоо хоногийн эхээр Пхеньянд болсон хоёр Солонгосын уулзалтын үр дүнг танилцуулахаар Вашингтонд очсон Өмнөд Солонгосын үндэсний аюулгүй байдлын зөвлөх Чун Ю Ён энэ тухай дөнгөж сая Цагаан ордонд сэтгүүлчдийн өмнө мэдэгдсэн байна.
Түүнийг мөн Ким Чен Ын-ы нууц захидлыг Дональд Трампад дамжуулахаар явсан гэж мэдээлж байсан бөгөөд Дональд Трамп Умард Солонгосын удирдагчийн урилгыг хүлээн авч, ойрын хугацаанд нүүр тулан уулзах хүсэлтэй байгаагаа Өмнөд Солонгосын тусгай элчид хэлсэн байна. Энэ долоо хоногийн эхээр Өмнөд Солонгосын ерөнхийлөгчийн таван тусгай элч Умард Солонгосын нийслэл Пхеньян хотод зочилж тус улсын залуу удирдагч Ким Чен Ын-тэй уулзсан юм. Уулзалтын үр дүнд хоёр Солонгосын удирдагчид дөрөвдүгээр сард хоёр улсын хил дээр байдаг Панмунжом тосгонд уулзахаар тохирсон билээ. Энэ нь Солонгосын дайнаас хойш хоёр улсын төрийн тэргүүнүүд гурав дахь удаагаа уулзах гэж байгаа тохиолдол юм байна.
