АНУ-ын Ерөнхийлөгч Дональд Трамп ирэх дөрөвдүгээр сарын хоёрны өдрөөс эхлэн автомашины импортод гаалийн тариф ногдуулна гэж мэдэгдлээ. Тариф ногдуулж эхэлснээр Япон, ХБНГУ, БНСУ-ын автомашин үйлдвэрлэгчдэд хамгийн их нөлөөлөхөөр байна.
Дональд Трамп автомашин үйлдвэрлэгч компаниудыг үйлдвэрлэлээ АНУ-д явуулдаг болгосноор хөдөлмөрийн зах зээл болон аж үйлдвэрлэлийг дэмжихийг зорьж буйгаа илэрхийлж байсан юм.
Зах зээлийн судалгааны “Global Data”-ийн мэдээллээс харахад “Volkswagen” компани АНУ-д борлуулдаг автомашиныхаа 80 орчим хувийг импортоор авдаг буюу өөр улсад үйлдвэрлэсэн автомашиныг АНУ-д борлуулдаг. Харин БНСУ-ын “Hyundai Motor” болон “Kia Corporation” АНУ дахь борлуулалтынхаа 65 хувийг импортоор авдаг байна.
Дональд Трампын баасан гарагт хийсэн мэдэгдэлд автомашины гаалийн тарифын хувь хэмжээ ямар байх талаар дэлгэрэнгүй мэдээлэл байгаагүй аж. Мөн Дональд Трампын анхны бүрэн эрхийнхээ хугацаанд Канад, Мексиктэй байгуулсан чөлөөт худалдааны гэрээнд ямар нөлөө үзүүлэх нь тодорхойгүй байна.
Хойд Америк даяар автомашин үйлдвэрлэлийн нийлүүлэлтийн сүлжээ өөр хоорондоо маш их, хамааралтай буюу интеграцчлагдсан байдаг. Тиймээс автомашин үйлдвэрлэгч компаниуд тарифын улмаас үнэ нэмэгдэж, нийлүүлэлтийн сүлжээнд алдагдал учирч болзошгүйг анхааруулсан ч Засгийн газар нь яг ямар арга хэмжээ авахыг хүлээзнэхээ мэдэгджээ.
Дональд Трампын тарифын арга хэмжээ нь автомашин үйлдвэрлэлийн салбарт маш том хохирол учруулна гэж үзэж буйгаа “Ford Motor”-ийн Гүйцэтгэх захирал Жим Фарли илэрхийлсэн байна.
Хойд Америк даяар өргөн цар хүрээг хамарсан үйлдвэрлэл явуулдаг “General Motors”, “Ford Motor”-ийн хувьцааны ханш баасан гарагийн арилжаагаар бага зэрэг өөрчлөгдлөө.
Үүнээс гадна ХБНГУ-ын Канцлер Олаф Шольц болон Европын Комиссын Ерөнхийлөгч Урсула фон дер Ляйен нар 450 сая хүн амтай томоохон зах зээлийн хувьд Европын Холбооны улсууд тарифт нэгдмэл хариу арга хэмжээ авна, зүгээр хараад суухгүй гэсэн байр суурийг өнгөрсөн долоо хоногт илэрхийлж байсан юм. Түүнчлэн Олаф Шольц “Тарифт хариу арга хэмжээ авахад бэлэн байгаа ч хэлэлцээрт хүрэхийг илүүд үзэж буй”-гаа илэрхийлжээ.
ХБНГУ-ын Канцлер Олаф Шольц
“Миний бодлоор Европын Холбооны орнууд хэр хүчирхэг, хэр том эдийн засаг вэ гэдгийг хүн бүр мэднэ. Тарифын чиглэлээр баримталж буй бодлогууд маань нийтлэг бодлого. Өөрөөр хэлбэл Европын эдийн засагт заналхийлж байгаа бүх үйлдлийн эсрэг хариу арга хэмжээ авч чадахуйц хангалттай хүчирхэг. Тиймээс бид үргэлж хариу үйлдэл үзүүлэх ёстой.
Гэхдээ аль аль талдаа хэрэгтэй учраас хэлэлцээр хийх боломжийг үргэлж хадгалах хэрэгтэй. Ялангуяа Атлантын далайн хоёр талд…” гэж мэдэгдлээ.
Эх сурвалж: bloomberg tv mongolia
