Хүүхдийг Ивээх Сан нь Боловсрол, соёл, шинжлэх ухаан, спортын яамтай хамтран “Нэгдүгээр ангийн сурагчдын суралцах чадварыг дэмжихэд чиглэсэн сургуулийн чадавхыг бэхжүүлэх нь” төслийг Япон улсын Гадаад Хэргийн Яамны санхүүжилтээр нийслэлийн Баянзүрх, Чингэлтэй, Сонгинохайрхан дүүргийн Ерөнхий боловсролын 24 сургуульд амжилттай хэрэгжүүлжээ.
Уг төслийн зорилго нь нэгдүгээр ангийн сурагчид, ялангуяа сургуулийн өмнөх боловсролд хамрагдалгүй сургуульд элсэн орсон, захын хорооллуудын хүнд нөхцөлд амьдарч буй хүүхдүүдийн суралцах чадварыг сайжруулахад чиглэсэн аж. Энэ хүрээнд дараах үйл ажиллагааг явуулсан байна.
Нэгдүгээрт, Бага ангийн 761 багшид шат дараалсан сургалтуудыг зохион байгуулж, сургалтанд хамрагдсан багш нарын 91,4% нь хүүхдийг сургуульд бэлтгэх аргазүй, зургаан настнуудын онцлог, дасан зохицох, суралцах чадварын тухай бүрэн, дүүрэн мэдлэг эзэмшин, түүнийгээ төсөлд хамрагдаагүй сургуулиудад түгээн дэлгэрүүлэх чадвартай болжээ. Эдгээр багш нар сургалтын идэвхитэй аргазүйгээр дамжуулан 65 мянга гаруй хүүхдийн суралцах чадварт дэмжлэг үзүүлсэн бөгөөд тэдний 92,5% нь сурагчдынх нь сургуульд дасан зохицох, суралцах чадвар сайжирсан гэж үнэлсэн байна.
Хоёрдугаарт, Зорилтот 24 сургууль “Нэгдүгээр ангийн бэлтгэл хөтөлбөр”, “Дасан зохицох, суралцах чадварыг дэмжих сургуулийн хөтөлбөр”-ийг боловсруулсан ба нэгдүгээр ангийн хүүхдийн, ялангуяа сургуулийн өмнөх боловсролд хамрагдаагүй хүүхдийн сургуульд дасан зохицож, суралцах чадвар эзэмшихэд туслах шинэ бодлого, тогтолцоо бий болгон, түүнийгээ харъяалагдах хороо, цэцэрлэг, өрхийн эмнэлэг, эцэг эхчүүдтэй хамтран хэрэгжүүлж, нэгдүгээр ангийнхныг дэмждэг загвар сургууль болох зорилт тавин ажиллаж байгаа юм байна.
Гуравдугаарт, Зорилтот сургуулиудын нэгдүгээр ангийн нийт 159 багш эцэг эхийн зөвлөлийн 759 гишүүдэд хүүхдийн сургуульд дасан зохицох, суралцах чадварыг хэрхэн дэмжих талаар сургалт зохион байгуулах болон мэдээлэл түгээх, санал бодлоо солилцох бусад олон төрлийн үйл ажиллагааг идэвхитэй зохион байгуулж, тэдгээрт 12200 гаруй эцэг эх хамрагдлаа. Үүний үр дүнд эцэг эхчүүд болон сургуулийн харилцаа бэхжиж, харилцан итгэлцэл бий болжээ.
Дөрөвдүгээрт, БСШУСЯ-тай хамтран ажилласны үр дүнд төслөөс боловсруулсан “Нэгдүгээр ангийн бэлтгэл хөтөлбөр” болон түүнд хэрэглэдэг дасгал ажлын дэвтрийг шинэчлэн боловсруулж, уг хөтөлбөрөө үндэсний хэмжээнд хэрэгжүүлэхээр ажиллаж байгаа аж. Төрийн өмчийн бүх сургуулийн нэгдүгээр ангийн нийт 73545 сурагчид тус хөтөлбөрийн гарын авлага, дасгал ажлын дэвтэр очжээ. Энэ нь төслийн амжилттай хэрэгжсэн загвар, үйл ажиллагааг сурталчлах, төрийн бодлогод тусгах зорилтыг хангаж байгаа гэнэ.
Тус төсөл хэрэгжсэнээр нийт 204641 хүүхэд, тэдний эцэг эх, багш нар, иргэд, олон нийт болон орон нутагт ихээхэн үр дүн авчирсныг хаалтын үйл ажиллагааны үеэр онцлов. Цаашид төслийн хүрээнд боловсруулан хэрэгжүүлсэн эдгээр хөтөлбөр, санаачлагуудыг нэгдүгээр ангийн сурагчид, ялангуяа сургуулийн өмнөх боловсролд хамрагдалгүй сургуульд элсэн орсон 6 настнуудын суралцах чадварыг сайжруулахад сургалтын нэг загвар болгон ашиглах бүрэн боломжтой болсон байна.
Зургаан настнууд сургуульд амжилттай бэлтгэгдэж байна
}
Шинэ мэдээ
