БНАСАУ-ын Гадаад Хэргийн Яамны Америк судлалын хүрээлэнгийн Хэвлэлийн албаны дарга пүрэв гарагт сүүлийн үед яригдах болсон БНАСАУ, Сирийн хоорондох химийн зэвсгийн хамтын ажиллагааны талаарх Солонгосын Төв Мэдээний Агентлаг (KNCA)-ийн асуултад дараах хариултыг өгчээ.
“АНУ БНАСАУ-ыг үндэслэлгүй зохиомол зүйлээр буруутгах гэж ахин улайрч байна. Саяхан Сирийн зүүн бүсэд иргэд химийн зэвсэг хэрэглэсэн талаар яригдаж байх үед АНУ өөрийнхөө эрх ашгийн төлөө тэдний үйлдлийг ашиглан НҮБ-ын Аюулгүйн Зөвлөлийн Хоригийн Хорооны тайланг зөрчсөн үйлдэл хэмээн БНАСАУ-ыг Сиритэй химийн зэвсгийн хамтын ажиллагаатай хэмээх цуу мэдээг тарааж байна.
Тус тайлан гармагц АНУ-ын Төрийн Департмент олон улсын эрх зүйг далайлган “хамтын ажиллагаа” гэх үгийн дор АНУ-ын хувийн эрх ашиг нуугдаж байгаа нь тодорхой харагдаж байна. Өнгөрсөн хугацаанд огт байхгүй худал зүйлсээр гүжирдэж бие даасан тусгаар улсыг эзлэн түрэмгийлэх шалтаг болгон хэрэглэж ирснийг дэлхий даяараа сайн мэднэ.
АНУ энэ удаад НҮБ-ын Аюулгүйн Зөвлөлийн Хоригийн Хороог ашиглан БНАСАУ болон Сирийг химийн зэвсгийн хамтын ажиллагаатай хэмээн гүжирдэж байгаа нь БНАСАУ-ыг “химийн зэвсэг эзэмшиж, тараадаг” орон болгож, манай дэглэмийн эсрэг олон улсын уур амьсгалыг эргүүлэхийг хичээж байна. Үүний зэрэгцээ Сирид хийх цэргийн үйл ажиллагаагаа зөвтгөх гэсэн заль юм.
Өмнө нь хэд хэдэн удаа тодорхой мэдэгдсэнчлэн БНАСАУ-д химийн зэвсгийн үйлдвэрлэлийг хөгжүүлсэн, химийн зэвсэг үйлдвэрлэсэн, хадгалсан явдал байхгүй бөгөөд химийн зэвсгийг бүхэлд нь эсэргүүцдэг болно.
Дэлхийн олон нийт АНУ хамгийн анх цөмийн зэвсэг хэрэглэсэн орон төдийгүй 1950-иад оны Солонгосын дайны үеэр үй олноор хөнөөх био химийн зэвсэг ашиглаж Солонгосын хойгт энгийн ард иргэдийг үй олноор хөнөөсөн гэмт улс гэдгийг санах хэрэгтэй. Түүнчлэн АНУ нь өнөөдөр дэлхийд зэвсгийн худалдаагаараа тэргүүлдэг буюу өөрөөр хэлбэл дэлхийн энх тайванд заналхийлэх хорт хавдар гэдгийг бүгд маш сайн ойлгох хэрэгтэй.” хэмээн БНАСАУ-ын хэвлэлийн албаны мэдээлэлд дурьджээ.
