Бөх сонирхогчдын анхаарлыг татаж буй Монголын үндэсний бөхийн холбооны ээлжит VIII “Их Эе” маргааш хуралдана. Өчигдөр шүүхийн шийдвэр гүйцэтгэх албанаас шүүхийн захирамжийг гардуулж өгөхөөр Бөхийн өргөөнд очсон . Гэвч МҮБХ-ны тэргүүн Р.Нямдорж тэднийг дотогш нэвтрүүлэхгүй, саад учруулж байгаа талаар Баянзүрх дүүргийн шүүхийн шийдвэр гүйцэтгэх албаны ажилтан хэлж байна.Тэрбээр “Баянзүрх дүүргийн Иргэний хэргийн анхан шатны шүүхийн шүүгчийн 2018 оны гуравдугаар сарын 22-ний өдрийн 5552 гэсэн шүүгчийн захирамжид Монголын үндэсний бөхийн холбооны 2017 оны зургадугаар сарын 22-ны өдрийн “Их эе” хурлыг зарласан тогтоол хэрэгжүүлэхтэй холбоотой гарсан тодорхой үйл ажиллагаа явуулахгүй байхыг хариуцагч Монголын үндэсний бөхийн холбоонд даалгасан захирамж гарсан.
Уг захирамжийг МҮБХ-ны дэд тэргүүн Д.Данзанд уржигдар гардуулж өгсөн. Өчигдөр Р.Нямдорж гуайд өөрт нь өгөх гэж ирэхэд эсэргүүцэл үзүүлсэн байдалтай байна. Төрийн байгууллагын үйл ажиллагаанд саад учруулж, дотогш нэвтрүүлэхгүй байгаа учраас цагдаагийн байгууллага хүч нэмэгдүүлээд ирчихсэн байна. Дэд тэргүүнээр дамжуулж, мөн утсаар нь нь мессеж илгээж мэдэгдсэн. Хэрвээ гарч ирж, эсвэл биднийг дотогш оруулж захирамжаа хүлээж авахгүй бол дараагийн арга хэмжээгээ авна” гэлээ.
Уг шүүхийн шийдвэрийн захирамжид энэ сарын 24-нд хуралдахаар товлоод буй “Их эе”-ийг шүүхийн шийдвэр гартал түр хугацаанд түдгэлзүүлсэн, Мөн МҮБХ-ны тамга тэмдгийг Р.Нямдорж гуайг ашиглахгүй байхыг тусгажээ.
Монголын үндэсний бөхийн холбооны ээлжит VIII “Их Эе” хурлын талаар хэн юу ярив
Х.Баянмөнх “Монгол үндэсний бөхийн холбооноос бөхчүүдийн нийгмийн асуудал, эрх, нэр төрийг хамгаалах талаар зохион байгуулж байгаа асуудал байхгүй. Харин ч нэр төрийг нь гутааж байна. Нэг өрсөлдөгчийг гаргаж ирэхийн тулд нөгөө өрсөлдөгчөөс нь допинг гаргачихдаг. Өөрсдөд нь ая талтай хүмүүсээс допинг илэрвэл түүнийг нь нуудаг. Бөхчүүдийн нийгмийн асуудалд огт анхаардаггүй. Бөхчүүдэд урилга өгдөггүй, сайн дураараа ирж барилдахгүй бол хохь нь гэж ханддаг. Бөхчүүдийн төлөө, Монгол үндэсний бөхийн төлөө хийж байгаа ажил байхгүй. Харин ашиг хонжоо хайж, мөнгөний төлөө явж байгаа улсууд” гэж мэдэгдсэн.
Хэнтий аймгийн бөхийн холбооны тэргүүн М.Хүдэрбаатар “Бид зөвхөн бөхийн холбооны удирдлагыг нь гартаа авч, бөхийн өргөөг эзэмших гээд тэмцээд байгаа юм биш. Үндэсний бөх цаашид мэргэжлийн спорт болоод Японы сумо шиг өөрөө өөрсдийгөө санхүүжүүлдэг байх боломжийг хаагаад байгаа удирдлагуудын талаар яриад байгаа юм. Өнгөрсөн наадмын асуудлыг та бүхэн мэдэж байгаа. Гэтэл өнөөдөр XXI зуунд XIX зууны үеийн юм яриад зогсож байна. Техник технологи хөгжсөн энэ үед бичлэг дээр хэн нь түрүүлж унаж байгааг наад заах нь хараад барилдааныг шийдчихэж болно. Иймхэн юмыг шийдчихэж чадахгүй байна. Өнөөдөр иргэдийг оочирлуулаад билет зардаг газар бөхийн өргөөнөөс өөр Монголд байхгүй. Тиймээс л тэднийг халаагаа өгөө гэж шаардаад байгаа” мэдэгдсэн.
МҮБХ-ны дэд тэргүүн Д.Данзан “ Бид хууль ёсны дагуу хурлаа хийгээд бид ажлаа өгнө. Манайх хурал хийх гэхээр хийлгэдэггүй. Өнгөрсөн 2006 онд хийлгээгүй. Харин 2010 онд хийсэн хурлыг хүчингүй болсон. Мөн 2014 онд хийлгээгүй, одоо бас хийлгэхгүй гээд байна. Л.Чинбат гэдэг хүнийг хууль бусаар сонгосон. Хуралд оролцох ёстой бөхчүүдийн 20-иад хувь нь оролцсон. Хурал нэртэйгээр хувилдаж нэг хүнийг сонгочхоод түүндээ тамга тэмдэг авч өгөх гээд шүүхэд өгсөн. Бөхчүүд хурлаа хийхийг хүсэж байна” гэдгийг онцлон хэлсэн юм.
