Урин дулаан болж, цас мөс хайлсны улмаас нийслэлийн зарим хэсэг шар усны үерт автсан. Үүнийг нэг нь Сүхбаатар дүүргийн 15-20 хороо буюу Бэлх, Сэлхийн орчимд амьдарч буй айл өрхөөс 117 айл шар усны үерт өртсөн нөхцөл байдалтай байна. Ингээд манай сурвалжлах баг үерт автсан айл өрхүүд ямар нөхцөл байдалтай хэрхэн амьдарч байгаа талаар газар дээр нь очиж сурвалжиллаа.
Үерт автсан айл өрх, гудамж талбай шар усны үерт автан айлуудын бохирын цооног дүүрч, хөрс бохирдон хүн, малын халдварт өвчин гарах эрсдэлтэй, далан шуудуу усны урсгалыг даалгүй эвдэрсэн, автозамд усны хаялага хийгээгүйн улмаас эвдэрч нийтийн тээвэр болон, том оврын тээврийн хэрэгсэл зорчих боломжгүй болсон байдалтай байлаа.
Түүнчлэн зам талбай сэтэрч, цөмөрсөн зэрэг хүндрэлүүд гарсан байв. Биднийг очиход дүүргийн онцгой комиссын ажлын хэсэг, 15-20 хорооны Ажлын алба “Өндөржүүлсэн бэлэн байдал”-ын зэрэгт шилжин ажиллаж байлаа. Дүүргийн онцгой комиссын ажлын хэсэг шар усны үерт өртсөн гудамж талбай, далан шуудууг засварлах, автозамын нөхцөл байдалд мэргэжлийн баг бүрэлдэхүүн үнэлгээ хийж учирсан хохирлыг арилгах, цаашид үүсч болзошгүй нөхцөл байдлыг судлан тогтоож, сэргээн засах, шинээр бүтээн байгуулах ажлуудыг хийж эхэлжээ. Мөн Нийслэлийн авта замын газраас Бэлхийн эвдэрсэн замыг засч байна.
Хашаагаа сунгасан дөрвөн айлын хашааг буулгаж, хуучин кадастраар татуулах арга хэмжээ авч ажиллаж байна
Харин Сүхбааатар дүүргийн 17-р хороо үүссэн нөхцөл байдлын талаар тус хорооны Засаг дарга Г.Даваацэцэгээс тодрууллаа.Тэрээр “ Өнгөрсөн долоон хоногоос уулын цас хайлж, шар усны үер буусан. Манай хороо булагтай цэвдэг ихтэй. Байгалийн хүчин зүйл болон иргэдийн дур мэдэж хашаагаа сунгаж барьснаас болж шар усны үеэр буугаад хүндхэн байдалтай байна. Одоо энэ үерийн бүсэд байгаа айлууд бүгд зөвшөөрөлтэй учраас бид нүүлгэх боломжгүй. Иймээс бид өндөржүүлсэн бэлэн байдалтай ажиллаж суваг тавих, усыг зайлуулж, урсгах арга хэмжээ авч байна. Үерийн улмаас 40 орчим айлын хашаа устай, хоёр айлын гэрт ус орж, нойл дүүрсэн байсан.
Бид шуурхай ажиллаж усыг зайлуулж, шороон суваг гаргасан. Цаашид үерийн далангийн сувгуудад битүү бетон тавих ажлыг хийхээр төлөвлөж байна.
Өөрсдөө дур мэдэж хашаагаа сунгасан дөрвөн айлын хашааг буулгаж, хуучин кадастраар татуулах арга хэмжээ авч ажиллаж байна. Ингэж байж үерийн ус сэлбэ гол руу нийлнэ. Эдгээр ажлууд хийгдсэний дараа ариутгал халдваржуулалтын ажлуудыг шат дараатай хийнэ” гэж ярилаа.
Дүүрэг хороодоос онц байдал зарлаад үерийн усыг зайлуулах ажлыг хийж байна
Сүхбаатар дүүргийн XVII хорооны иргэн н. Шаравдорж “ Өнгөрсөн жил үерийн даланг янзалсан. Гэвч ус дүүрээд шар усны үерт автлаа. Манай дүүрэг хороодоос үерийн далан болон ус зайлуулах арга хэмжээг маш сайн авч байна. Гэвч уулын цас хайлж дуусаагүй болохоор шар усны үер нэмэгдээд байна. Ер нь манай XVII хорооны газар цэвдэг их болохоор өвөл зунгүй устай байдаг. Одоо цас хайлаад дуусчихвал гайгүй болох байх. Мөн дүүрэг хороодоос онц байдал зарлаад үерийн усыг зайлуулах, үерийн даланг тавих ажлыг хийж байна” гэв.
Ц.Шижир:Бетон хавтан тавих, дайрга буулгах ажлуудыг хийгдэнэ
Сүхбаатар дүүргийн Засаг даргын орлогч, дүүргийн онцгой комиссын ажлын хэсгийн дарга Ц.Шижирээс үерийн нөхцөл байдал болон авч байгаа арга хэмжээний талаар тодрууллаа.
– Шар усны үер буусан газарт ямар арга хэмжээ авч ажиллаж байна вэ?
-Цас их хуримтлагдсаны улмаас шар усны үер ихсэж, айл өрхүүд рүү ус орсон байдалтай байсан. Манай дүүргийн онцгой байдлын дарга болон онцгой комиссын ажилтнууд энэ сарын 8-наас хойш газар дээр ажиллаж, шаардлагатай арга хэмжээ аваад явж байна. Энэ сарын 15-ны өдөр дүүргийн Засаг дарга захирамж гаргаж, өндөржүүлсэн бэлэн байдал зарласан. Одоогоор 15-20 дугаар хороон дээр өндөржүүлсэн бэлэн байдалтай ажиллаж байна. Үерийн ам хаасан айлуудыг хашааг буулгах, үерийн амыг сэргээх ажлуудыг хийж байгаа. Мөн бетон хавтан тавих, дайрга буулгах ажлыг хийж байна.
-Ариутгал хийгдэж байгаа юу?
-Одоогийн байдлаар таван хороо дээр таван шуурхай бүлэг ажиллаж байна. Шуурхай бүлэг өдөр бүр хуралдаж нөхцөл байдлыг хэлэлцэж байгаа. Ус зайлуулах ажлыг болон бусад ажлаа хийж дуусны дараа ариутгалын ажлыг хийнэ.
Өөрсдийн дураар хашаагаа сунгасан айл өрхүүд байгаа гэсэн. Эдгээр айл өрхүүдэд ямар арга хэмжээ авах уу?
– Үерийн амыг хааж, өөрсдийн хүсэлтээр хашаагаа сунгасан айлуудын буруутай үйл ажиллагаа байгаа. Мэргэжлийн хяналтын хэлтэс дүгнэлт гаргана. Дүгнэлт дээр үндэслэж арга хэмжээ авна.
-Одоогоор хэчнээн айл газраа сунгасан байгаа вэ?
-Хороо болгон дээр янз бүр байгаа.
Н.Алтанцэцэг
