Монголын хөлбөмбөгийн шигшээ баг маргааш буюу энэ сарын 27-нд ОУХБХ-ны албан ёсны өдрөөр анх удаа талбайдаа Маврики улсын багтай нөхөрсөг тоглолт хийх гэж байна. Энэ нь Азийн тэмцээнүүдэд оролцож байсан манай багийн хувьд Африк тивийн багтай хийж буй анхны тоглолт юм.
Маврикийн шигшээ баг нь зөвхөн Африк тив төвийгүй ДАШТ-д оролцдог хүчирхэг багуудтай нөхөрсөг тоглолт хийдэг туршлагатай, чадварлаг тоглогчдоос бүрдсэн хүчтэй баг юм. Багийн ахлагч Кевин Бру нь Английн “Ибсвич” клубт, Адель Ланге “Парис ФС” клубүүдэд харьялагддаг бол харин Англи гаралтай довтлогч Гари Ноель, Бельгид төрсөн хамгаалагч Кильян Ярнард нар Маврикийн бүрэлдэхүүнд тоглодог.
Маврикийн шигшээ баг одоогоор ОУХБХ-ны түвшинд 157-д эрэмбэлэгдэж байгаа нь манай үндэсний шигшээ багаас даруй 30 байрын дээр байгаа юм. Монголын шигшээ энэхүү нөхөрсөг тоглолтыг амжилттай хийснээр дэлхийн чансаа дээшлэхэд ихээхэн чухал алхам болно.
Хэдхэн хоногийн өмнө, Малайзын талбайгаас онцгой амжилт, оноотой ирсэн манай шигшээ багийнхан өөрийн талбайд Маврикийн шигшээг буулган авч, монголын хөлбөмбөгийн түүхнээ дахин нэг шинэ мөчийг бүтээхийн төлөө ийнхүү тоглох гэж байна.
Герман дасгалжуулагч Майкл Вайссаар удирдуулсан Монголын шигшээ баг энэ сарын 22-нд Куала Лумпур хотод талбайн эзэн Малайзтай тоглож 2:2-оор тэнцэн, анх удаа ОУХБХ-ны албан ёсны нөхөрсөг тоглолтоос оноо авч чадсан билээ. Энэхүү амжилтыг үзүүлсэн Д.Төрбат ахлагчтай Монголын баг тамирчид бүрэн бүрэлдэхүүнээрээ ногоон талбайдаа тоглох болно.
Дашрамд дуулгахад, МХБХ-ны VII Их хурлыг энэ сарын 23-нд хуралдуулж, Монголын Хөлбөмбөгийн Холбооны шинэчилсэн дүрмийг Их хурлын гишүүд баталлаа. Сонгуулийн Хорооны дарга И.Отгонбаяр “Сэлэнгэпресс” клубийн дасгалжуулагчийн ажлыг хийх болсон тул өөрийн хүсэлтээр Сонгуулийн хорооноос түтгэлзсэн тул Сонгуулийн Хорооны нэг гишүүнд Монголын Өмгөөлөгчдийн Холбооны Г.Ганбилэгийг сонгосон юм. Түүнээс гадна энэ оноос МХБХ-ны клубүүд болон орон нутгийн аймгуудыг чансаагаар эрэмбэлэх тухай МХБХ-ны Техникийн хэлтэсийн ахлах мэргэжилтэн С.Жаргал танилцуулсан байна.
