Хүүхдийн хүчирхийллийн эсрэг “Дахин тэвчихгүй” тайван жагсаал Чингисийн талбайд боллоо. Уг жагсаал 11:00 цагт эхэлсэн бөгөөд бусад аймгууд дэмжин жагсан байна. Мөн төрийн бус байгууллагууд, урлаг соёл, спортын одод, олны танил эрхмүүд олноороо нэгдэхээ илэрхийлсэн юм.
МУГЖ Б.Жаргалсайхан: Өнөөдрийн жагсаалд хүн бүр ач холбогдол өгөх хэрэгтэй. Иймээс бид хүүхдийн хүчирхийллийн төлөө хамтдаа тэмцэж, хамгаалах хэрэгтэй. Манай урлагийнхан гэсэн энэ жагсаалыг маш их дэмжиж байгаа. Монгол Улсын ирээдүй болсон хүүхдүүдээ хайрлаж хамгаалах нь хамгийн чухал зүйл болоод байна. Энэ ардчилсан нийгэмд хүүхдийн эрхийг хамгийн сайн дээдэлдэг байх хэрэтгэй байна. Бид бүгд Үндсэн хуулиар олгогдсон тэгш эрхтэй хүмүүс шүү дээ,
Хүчирхийллийн эсрэг нэгдэхийг уриаллаа
Гавьяат жүжигчин Л.Баттулга /Аглуу/: Цуглааныг зохион байгуулж байгаагаа долоон бүсгүйд баяр хүргэе. Бид ээжийнхээ нөмөрт сайхан өгсөн. Иймээс энэ нийгмийн хүүхдүүд ч гэсэн сайхан өсөх учиртай. Одоо эрэгтэй хүүхдийг зодож өсгөдөг цаг өнгөрсөн. Жоохон хүүхдийг зодохоор элэг, бөөр зүрх нь сална шүү дээ. Үүнийг бодох хэрэгтэй. Бид үр хүүхдээ хайрлаж, хамгаалах ёстой. Цуглаанд нэгдэж байгаа бүх хүмүүст баярлалаа. Та бүхний гарт байгаа лоозон өнөөдрөөс эхэлж хэрэгжих болтугай. Хүчирхийллийн эсрэг бүгдээрээ нэгдэхийг уриалсан юм.
Өнөөдрийн үйл ажиллагааг харж байгаа төрийн түшээд нэг шийдвэр гаргана гэдэгт найдаж байна
ТВ Коктейль” хамтлагийн гишүүн жүжигчин Э.Цолмонбаяр
Өнөөдөр оюутан залуус аав ээжүүд болон бүх хүмүүс хүчирхийллийн эсрэг Сүхбаатарын талбай дээр нэгдэж байна. Сэтгэл эмзэглүүлсэн асуудал нэлээд гарсан. Мөн хүүхдүүд хүчирхийллийн золиос болсон. Иймээс энэ жагсаалаар бүхнийг таслан зогсоох хэрэгтэй. Өнөөдрийн үйл ажиллагааг харж байгаа төрийн түшээд нэг шийдвэр гаргана гэдэгт найдаж байна гэлээ.
Бага насны хүүхдэд бэлгийн хүчирхийлэл үйлдсэн этгээдийг ямар ч тохиолдолд өршөөдөг байж болохгүй
Зохион байгуулагч н.Одгэрэл ‘Өнөөдрийн жагсаалыг зүрх сэтгэлээрээ нэгдсэн долоон ээж санаачилсан. Одоогийн байдлаар манай сошиал группт 400 мянга гаруй хүмүүс нэгдсэн байна. Бид төрийн болон төрийн бус байгууллагаас гаргасан олон судалгааг харлаа. Үүнээс ээжүүд бидний сэтгэлийг хамгийн ихээр эмзэглүүлж байгаа тоо баримтыг дурдъя. 2014-2016 онуудад бэлгийн хүчирхийлэлд өртсөн хүүхдүүдийн 80 орчим хувь нь гэр бүлийн хамаарал бүхий этгээдэд хүчирхийлүүлсэн.
2016 онд Хүүхдийн эрхийн тухай хууль, Хүүхэд хамгааллын тухай хууль, 2017 онд Гэр бүлийн хүчирхийлэлтэй тэмцэх тухай хууль, Эрүүгийн хуулийн шинэчилсэн найруулга буюу хүүхдийн эсрэг хүчирхийлэлд чиглэсэн олон хууль тогтоомж шинэчлэгдсэн хэдий ч хүчирхийлэлд өртсөн хүүхдийн тоо өнөөдрийг хүртэл буурахгүй байна. Бага насны хүүхдэд бэлгийн хүчирхийлэл үйлдсэн этгээдийг ямар ч тохиолдолд өршөөдөг байж болохгүй юм. Энэ шаардлагыг холбогдох хүмүүст бид заавал хүргэх болно’ гэлээ.
