Цаазын ялыг сэргээх хууль зүйн боломжгүй гэсэн дүгнэлт гарчээ

Европын холбоо өнгөрсөн 2017 онд Монгол Улсад Төлөөлөгчийн газраа нээсэн. Монгол дахь Европын холбооны Төлөөлөгчийн газрыг түр хамаарагч Макро Ферригийн өөрийнх нь хүсэлтээр Хууль зүй, дотоод хэргийн дэд сайд Б.Энхбаяр түүнийг өчигдөр хүлээн авч уулзлаа. Ноён Макро Ферритэй хамт Итали улсын Элчин сайд Андрэа Дэ Фэлип, Францын Элчин сайдын яамны Тэргүүн зөвлөх Силви Дэкруа, Холбооны Бүгд найрамдах Герман улсын Элчин сайдын яамны Дэд тэргүүн бөгөөд Элчин зөвлөх Др. Михаэль Фернау нар хүрэлцэн ирэв.
Уулзалтын үеэр Монгол дахь Европын холбооны Төлөөлөгчийн газрыг түр хамаарагч Макро Ферри, “Европын холбоо өөрийн гишүүн 28 орны өмнөөс танай Засгийн газарт цаазын ялыг сэргээх эсэх асуудлаар байр сууриа мэдэгдсэн байгаа. Энэхүү мэдээлэлдээ цаазыг ялыг сэргээх нь НҮБ-ын Ерөнхий ассамблейн тодорхой тогтоолууд болон Европын холбоотой байгуулсан хөтөлбөртэй зөрчилдөх арга хэмжээ болохыг дурдсан. Монгол Улс цаазыг ялыг сэргээх эсэх асуудлыг судлах ажлын хэсгийг гаргасан гэсэн. Ажлын хэсгээс тодорхой санал гарсан бол тодруулж өгнө үү” гэв.
Асуултын хариуд Хууль зүй, дотоод хэргийн дэд сайд Б.Энхбаяр, “Монгол Улсын Ерөнхийлөгчийн зүгээс Хууль зүй, дотоод хэргийн яаманд хандаж цаазаар авах ялыг сэргээх, ингэхдээ бага насны хүүхдийг хүчирхийлсэн гэмт хэргийн тухайд сэргээх асуудлыг судалж үзэх саналыг тавьсан байгаа. Хууль зүй, дотоод хэргийн яам энэ асуудал дээр нухацтай хандсан. Нэгэнт Монгол Улсын Ерөнхийлөгчөөс албан ёсоор санал тавьсан учраас энэ дээр холбогдох бүх талын оролцоотой ажлын хэсгийг гаргаж ажилласан. Ажлын хэсгийг миний бие ахалсан. Ажлын хэсэгт Улсын дээд шүүх, Улсын ерөнхий прокурорын газар, Хуульчдын холбоо, Хүний эрхийн үндэсний комисс, Гадаад харилцааны яам, МУИС-ийн эрдэмтэн багш нараас төлөөлөл оролцуулж, өргөн бүрэлдэхүүнээр ажилласан. Цаазын ял өмнө нь ямар байдлаар яригдаж, Монгол Улсад татгалзсан бэ гэдэгтэй холбоотой асуудлыг Ажлын хэсэг судалж үзсэн. Олон улсын гэрээ эрх зүйн талаас нь, нэгдэн орсон Иргэний болон Улс төрийн эрхийн тухай пактын II нэмэлт протоколоос гарах хууль зүйн боломж байгаа эсэх талаас нь үнэлэлт дүгнэлт өгсөн. Ажлын хэсэг нэг сар гаруй хугацаанд ажиллаж дүгнэлтээ гаргасан.
Ажлын хэсэгт орж ажилласан бүх байгууллагын төлөөлөл 100 хувь санал нэгтэйгээр цаазаар авах ялыг Монгол Улсын тухайд нэмэлт протоколоос гаргах боломжгүй буюу дахин сэргээх хууль зүйн үндэслэл байхгүй гэдэг дүгнэлтийг гаргасан. Энэ бол ажлын хэсэгт орж ажилласан байгууллагуудын нэгдсэн байр суурь гэж ойлгож болно” гэлээ.
Үүний дараа ноён Макро Ферри, “Ажлын хэсэг дүгнэлтээ гаргасан гэж байна. Дүгнэлт гаргаснаас дараагийн үйл ажиллагаа юу байх бол. Дахиад процесс явагдах уу” гэж асуулаа.
Уулзалтын төгсгөлд Итали улсын Элчин сайд Андрэа Дэ Фэлип “Ажлын хэсэг ийм дүгнэлт гаргасанд баяртай байна” гэсэн бол Францын Элчин сайдын яамны Тэргүүн зөвлөх Силви Дэкруа “Монгол Улсын Засгийн газрын цаазаар авах ялыг сэргээх шаардлагагүй гэсэн дүгнэлтэд баяр хүргэж, талархлаа илэрхийлье” гэлээ.
Мөн Холбооны Бүгд найрамдах Герман улсын Элчин сайдын яамны Дэд тэргүүн бөгөөд Элчин зөвлөх Др. Михаэль Фернау болон Монгол дахь Европын холбооны Төлөөлөгчийн газрыг түр хамаарагч Макро Ферри нар “Цаазын ялыг сэргээх шаардлагагүй гэсэн дүгнэлт гарсан баяртай мэдээ байна” гэснээр уулзалт өндөрлөлөө.