Нийслэлийн Гэмт хэргээс урьдчилан сэргийлэх ажлыг зохицуулах зөвлөлийн санхүүжилтээр 9 дүүргийн Цагдаагийн хэлтсүүдэд тусгай тоноглол бүхий 17 автомашиныг хүлээлгэн өглөө. Энэхүү үйл ажиллагаанд Нийслэлийн Засаг дарга бөгөөд Улаанбаатар хотын захирагч С.Батболд, НИТХ-ын тэргүүлэгч, МАН-ын бүлгийн дарга С.Мөнхчулуун, Нийслэлийн цагдаагийн газрын дарга Д.Ядамдорж болон бусад албаны хүмүүс оролцлоо. Дүүргүүдэд хүлээлгэн өгч байгаа автомашиныг худалдан авах хөрөнгийг НИТХ-ын тэргүүлэгчдийн 84-р тогтоолоор Нийслэлийн ГХУСАЗЗ-ийн төсвийн тодотголоор шийдвэрлэжээ.
Монгол Улсын хэмжээнд 2017 онд бүртгэгдсэн нийт 32259 гэмт хэргийн 68.0 хувь буюу 21900 орчим гэмт хэрэг Нийслэлд үйлдэгджээ. Нийслэлийн хүн амын суурьшил тэлж, оршин суугчдын тоо нэмэгдэхийн зэрэгцээ ахуйн чанартай гэмт хэргийн гаралт, авто замын ачааллаас үүдсэн хэрэг зөрчил өдөр ирэх бүр ихсэх төлөвтэй байна. Иймд гэмт хэргээс урьдчилан сэргийлэх, гэмт хэрэгтэй тэмцдэг цагдаагийн байгууулагын ажилтан албан хаагчдын албаны ажиллах хүч, техник, хэрэгслийг бэхжүүлэх, ажлын чанар хүртээмжийг нэмэгдүүлэх зорилгоор Цагдаагийн хэлтсүүдэд эдгээр автомашиныг хүлээлгэн өгч байгаа аж.
Нийслэлийн ГХУС ажилд зориулан НИТХ-аас батласан төсвөөс өнгөрсөн онд НЦГ-ын шаардлагатай техник, хэрэгслийг санхүүжүүлэх ажлын хүрээнд 979 сая төгрөгийн төсөвтэй “Удирдлагын төв”, 817.5 сая төгрөгийн өртөг бүхий 17 ширхэг хөдөлгөөнт эргүүлийн автомашин, “Олон нийтийн цагдаа”-гийн үйл ажиллагааны зардалд 1.3 тэрбум төгрөг, цагдаагийн зэвсэглэмж, тусгай хэрэгслээр хангах, морьт, нохойт, дугуйт эргүүл ажиллуулах зардалд 503 сая төгрөгийг тус тус зарцуулсан байна. Мөн ЗЦА-нд гэрээт хэлтсийн үйл ажиллагааны зардал болон тусгай хэрэгслийн зардалд 568 сая төгрөг зарцуулжээ.
Энд дурьдагдсан хөдөлгөөнт эргүүлийн 17 автомашинууд нь БНСУ-ын Хьюндай корпорацид 2018 онд үйлдвэрлэгдсэн Аксент маркийн автомашин бөгөөд цагдаагийн албан хэрэгцээнд зориулан тусгайлан тоноглуулсан байна.
С.Батболд:Нийслэлийн дүүргүүдийн эргүүлийн автомашинуудыг шинэчлэх ажлыг хийж байна
Нийслэлийн Засаг дарга бөгөөд Улаанбаатар хотын захирагч С.Батболд “Иргэдийнхээ аюулгүй байдлын төлөө хөрөнгө мөнгө гаргаж ажиллаж байгаа. Жил бүр хотынхоо төсөвт гэмт хэргээс урьдчилан сэргийлэх зардалд зориулж 5 орчим тэрбум төгрөг төсөвлөдөг. Энэ мөнгийг нийслэлийн гэмт хэргээс урьдчилан сэргийлэх зөвлөлийн хурлаар хэлэлцэж хөрөнгө мөнгөө хуваарилдаг. Өнгөрсөн 2017 онд нийслэлийн бүх гудамж талбай, камерын асуудлыг шийдвэрлэсэн байгаа. Энэ жил нийслэлийн дүүргүүдийн эргүүлийн автомашин шинэчлэх ажлыг хийж байна. Цаашид ч гэсэн иргэдийнхээ аюулгүй байдлыг хангах чиглэлийн ажлыг зохион байгуулна” гэлээ.
Д.Ядамдорж: 17 автомашин хүлээлгэж өгснөөр 1/3 хувь нь шинэчлэгдэж байна
Нийслэлийн цагдаагийн газрын дарга Д.Ядамдорж “Өнгөрсөн 2017 онд гэмт хэргийн гаралт өссөн. Энэ нь Эрүүгийн хуулийн өөрчлөлттэй холбоотой. Гэмт хэрэгт тооцогддоггүй зүйлүүд гэмт хэрэгт тооцогдож эхэлсэн. Мөн гэмт хэргийг шалгах хугацаа богино болсон байгаа. Тухайлбал, 14 хоног шалгадаг байсан хэргийг тав хоногийн дотор шийдвэрлэж гаргадаг болсон. Шийдвэр гаргах явцад эрүүгийн хэрэг үүсгэх байдлаар явагдаж байгаа.
Харин энэ он гарсаар гэмт хэргийн гаралтын өсөлт, бууралт өнгөрсөн оныхоо мөн үетэй ойролцоо байгаа. 2013 оноос парк шинэчлэлт хийгдээгүй байсан. Өнгөрсөн жил нийслэлийн төсөвт хөрөнгө суулгаж, энэ жил 17 машин өгч шинэчлэл хийгдэж байна. Эдгээр 17 автомашин хүлээлгэж өгснөөр 1/3 хувь нь шинэчлэгдэж байна. Харин 2/3 хувь нь эргүүлийн ажлаа хийхэд эвдрэл гэмтэл болон туулах чадвар сайнгүй гэх мэт асуудалтай байгаа. Үүнийг ирэх оны төсвийн тодотголоор нийслэлийн Засаг дарга үе шаттайгаар шинэчилж өгнө гэдгийг хэлсэн. Энэ оны сүүлээр бүрэн шинэчлэгдэнэ гэж ойлгож байгаа” гэв.
Э.Мөнхбаяр: Гэмт хэргийн дуудлага мэдээлэлд түргэн шуурхай очих боломжтой болж байна
Сүхбаатар дүүргийн цагдаагийн нэгдүгээр хэлтсийн ахлах ахлагч Э.Мөнхбаяр“Сүхбаатар дүүргийн цагдаагийн нэгдүгээр хэлтэст долоон авто эргүүл байгаа. Харин өнөөдөр шинээр нэг машин нэмж өглөө. Иймээс гэмт хэргийн дуудлага мэдээлэлд түргэн шуурхай очих боломжтой болж байна. Манай дүүргийн хувьд хотын төв учраас хүн амын нягтаршил ихтэй учраас халаасны хулгайн гэмт хэрэг нэлээд их гардаг.
Н.Алтанцэцэг
