Сүүлийн жилүүдэд Батлан хамгаалах салбарынхний талаар таагүй зүйлүүд нэлээд сонсогдох болсоор удаж байгаа билээ. Одоогоос жилийн өмнө зэвсэгт хүчний нэгэн цэргийн анги дээр гранат дэлбэрч эрдэнэт хүний алтан амь эрсдэж байсныг уншигч олон санаж байгаа байх. Энэ бүхэн бол тус салбар дээр сахилга хариуцлага эрс муудсантай холбоотой гэдэг нь тодорхой юм. Харамсалтай нь батлан хамгаалах салбарын удирдлагууд энэ тал дээр төдийлөн анхаарлаа хандуулдаггүй нь туйлын хачирхалтай. Энэ байдал хурцдсан уу, эсвэл нөхцөл байдал эрс муудсан уу, саяхан тус салбар дээр нэгэн хачирхалтай бөгөөд эвгүй явдал болжээ. Юу гэвэл саяхан БХЯ-н дээр ахлах тушаалын цэргийн хурандаа цолтон дээд тушаалын генерал цолтон руугаа хутга барьж дайрсан хэрэг гарсан байна. Уг явдал өнгөрсөн долоо хоногт болжээ.
Эх сурвалжийн мэдээлж байгаагаар БХЯ-ны Хяналт, шалгалт, үнэлгээний газрын ахлах мэргэжилтэн, хурандаа Б.Наранбадрал ажил дээрээ халамцуу явж байхад нь Бригадын генерал П.Доржсүрэн тааралдан ажлын байран дээр ийм байдалтай явж болохгүй хэмээн шаардлага тавьсан байна. Үүний дараа хурандаа тэр даруйдаа гэртээ харьсан ба харин тэрээр төд удалгүй хутга барьж ирээд бригадын генералд агсам тавьсан ажээ.
Үүнийг мэдсэн батлан хамгаалах салбарын офицерууд “Энэ салбарт захирах, захирагдах хэм хэмжээ гэж алдагдсан, генерал цолыг хавтгайруулан олгож, цолны нэр хүндийг нь унагасны харгай үүнээс харагдаж байгаа юм” хэмээсэн байна. Өдгөө уг хэргийг Баянзүрх дүүргийн Цагдаагийн I хэлтэст шалгаж эхэлсэн ажээ. Энэ талаар тус хэлтсийнхнээс лавлахад “Бригадын генерал, хурандаа нарын хооронд таагүй явдал болсон нь үнэн. Хэрэг бүртгэх тасагт үүнийг шалгаж байгаа. Батлан хамгаалах салбарынхан генералын гар гэмтсэн гэж ярьж байна гэсэн. Энэ бол ташаа мэдээлэл ” хэмээв.
Батлан хамгаалахын дэд сайд нэг генералтайгаа шөргөөцөлдөж нэгнээ хутгалж гэмтээсэн хэрэг хэдэн жилийн өмнө гарч байсан ч тус салбарын дотоод хэрэг гээд тэгсхийгээд дараад өнгөрөөж байлаа. Үүнтэй адил саяны асуудлын талаар тус салбарынхан хоорондоо “эр улсууд хоорондоо учраа олох байлгүй, дэвэргээд яахав ” хэмээн хээв нэг ярилцаж байгаа бололтой.
