Үндэсний мэдээллийн төвд өнөөдөр Мэдээлэл технологийн үндэсний паркийн захирал Ч.Содномдамбын хууль бус үйлдлийн талаар Монголын залуу хуульчдын “Хос дэнс” ТББ-ын клубийн тэргүүн А.Гантамир болон Мэдээлэл технологийн үндэсний паркийн ажилчдын ҮЭ-ийн хорооны дарга асан Б.Лхагвасүрэн нарын хүмүүс мэдээлэл хийлээ.
“Хос дэнс” ТББ-ын клубийн тэргүүн А.Гантөмөр хэлэхдээ “Мэдээлэл технологийн үндэсний парк бол мэдээллийн технологийг хөгжүүлдэг байгууллага. Тус байгууллага IT компаниудыг “бойжуулаад” цаашид бие даан үйл ажиллагаа явуулахад туслах зорилготой байгууллага. Гэтэл өнөөдөр тус байгууллага Монголын IT чиглэлийн тэргүүлэх компаниудыг бий болгоорой гэж Засгийн газраас тогтоосон тогтоолыг зөрчин түрээсийн үйл ажиллагаа явуулдаг байгууллага болж хувирсан.
Уг байгууллагын байранд та бидний мэдэх “Утааны эсрэг ээж аавуудын холбоо”, мөн хуулийн фирм, “Занданшатар” нэртэй шатрын клуб, Косен гэх Японы байгууллага түрээсээр үйл ажиллагаа явуулж байна. Өмнө нь энэ түрээслүүлж байгаа өрөө тасалгаануудыг IT чиглэлийн компаниудыг хөгжүүлэхэд ашигладаг байсан.
Тиймээс Мэдээлэл технологийн үндэсний паркийн ажилчдын ҮЭ-ийн хорооныд арга асан Б.Лхагвасүрэн дээрх хууль бус асуудлаар хуулийн байгууллага болох АТГ-т хандсан. Ингээд 2017 оны зургадугаар сарын 30-ны өдөр АТГ-аас Төрийн өмчийн бодлого зохицуулалтын газрын дарга Ц.Ням-Осорт хандаж гомдлыг шалгаж шийдвэрлэх албан бичиг явуулсан байдаг. Гэтэл өнөөдрийг хүртэл Төрийн өмчийн бодлого зохицуулалтын газраас ямар ч арга хэмжээ авахгүй явсаар өдийг хүрсэн. Мөн тус байгуулагын дарга Ч.Содномдамба нь ажилтнуудтайгаа зүй бусаар харьцаж, ажилтнуудаа хэл амаар доромжилдог зан суртахууны асар их доголдолтой хүн. Бас ажилтнууд нь өрөөндөө янз бүрийн компьютер тоглоом тоглоод сууж байдаг ” гэлээ.
Харин хурлын үеэр Мэдээллийн технологийн паркийн ажилчдын ҮЭ-ийн хорооны одоогийн даргаар ажиллаж буй Х.Лхагвасүрэн хийж буй энэхүү мэдээлэлтэй холбогдуулан тайлбар хийлээ. Тэрээр “Манай байгууллагын нэрийг барьж, манайд хамааралгүй хүмүүс хэвлэлийн хурал зарласан байна. Гомдол гаргасан Б.Лхагвасүрэн нь ажлын хариуцлага алдаад, ажлаасаа гарсан хүн. Авлигатай тэмцэх газраас манайхыг хэд хэдэн удаа шалгаж, хууль зөрчөөгүй гэж дүгнэсэн албан бичиг байгаа. Энэ хүмүүсийн яриад байгаа түрээсийн үйл ажиллагаа явагдаж байгаа асуудал үнэн. Манайх түрээсээрээ санхүүжиж байгаа аж ахуйн тооцоот үйлдвэр. Өмнө нь төрөөс санхүүжилт аваад 30-40 ажилтнаа цалинжуулаад явдаг байсан. Биднийг ажил авах үед 300-400 сая төгрөгийн өртэй байсан. Өрөө дарахын тулд манай ажилчид нэмэгдлээ хасуулаад хамтраад зүтгэсэн.
Өргөө-2 кино театр манай байгууллагын бараг 50 хувийг ашиглаж байгаа мөртлөө метр квадратыг нь 600 мянга буюу маш багаар үнэлж түрээсэлдэг. Үнэндээ манай байгууллага хоёр ч удаа дансаа хаалгаж байсан ажилчдынхаа цалинг нэг ч удаа хоцроож байгаагүй. Төрөөс мөнгө авдаггүй байгууллага яаж юм хийх юм бэ. Юм хийх гэхээр иймэрхүү хүмүүс сонин сонин зүйл яриад яваад байдаг. Одоо ийм улс төржилтөө болих хэрэгтэй. Ажлаас гарчихсан, ҮЭ-ийн байгууллагын нэр барьж хурал зарлаж байгаа энэ хүмүүст ёс зүй байна уу. Энэ ярьж байгаа зүйлүүд нь бодитой эсэхийг хэн нотлох вэ. Манай байгууллага дээр байнгын аудитын шалгалт хийгдэж байгаа. Ямар ч зөрчил илрээгүй.”гэв.
