Урин цаг айсуй. Агаар салхинд гарах, аялал зугаалганд явахад гол хүнс бол амтат шорлог. Тиймээс таны мэдэх жор дээр 10 төрлийн жорыг нэмье. Ингэхдээ шорлог хийх махны төрлөөс шалтгаалан 500гр мах тутамд хэрхэн өөр өөр амт, чанартайгаар амталж болохыг хүргэе. Махны хэмжээгээ ихэсгэх тутамдаа амтлагч орцуудыг нэмнэ.
Энгийн шорлог
-Мах
-3-4 халбага цагаан цуу
-1 халбага элсэн чихэр
-3-4 ширхэг сонгино
-1.5 аяга ус
-Хар, улаан перец
-Давс
Хийх арга: Сонгож авсан махаа ижил хэмжээтэй дөрвөлжилж хэрчинэ. Үүнийгээ давс, перец зэргээр амтлан нарийн хэрчсэн сонгино нэмээрэй. Усаа цагаан цуу, элсэн чихэртэй хольж, махаа базаж, 5-6 цаг амрааж тавина.
Халуун сүмстэй, хонины махан шорлог
– Сонгино 1 ширхэг
– 2-3 хумс сармис
– 30мл нимбэгний шүүс
– нунтаг халуун чинжүү
– давс амталгаагаар
Хийх арга: Сонгино, сармисыг жижиглэн хэрчиж давс, чинжүүгээр амтлаж сайтар хутгана. Нимбэгний шүүсийг хийж сайтар хутгаад шорлог хийх махыг бүх талаас нь сайтар амтлаж хутгаад сэрүүн газар 4-6 цаг байлгана.
Цагаан дарсаар амталсан шорлог
-100 мл цагаан дарс
-1 халбага үүсүү
-Хар перец, давс амталгаагаар
Хийх арга: Ямар ч мах байсан болох боловч гахайны мах илүү тохиромжтой. Үүнийгээ дөрвөлжилж хэрчээд үүсүү, перец, дэвс зэргээрээ амталж базаад дээрээс нь цагаан дарсаа хийгээд таглаж, сэрүүн газар тавьж дарна.
Шар айрагаар амталсан гахайн махан шорлог
– 100гр сой соус
– 75гр зөгийн бал
– 100мл шар айраг
– 2 хумс сармис
– улаан чинжүү амталгаагаар
– розмарин амталгаагаар
Хийх арга: Сармисыг жижиглэн хэрчээд бусад бүх амтлагчтай хольж сайтар хутгана. Ингээд гахайн махыг нэг бүрчлэн сайтар амтлаж хутгаад хөргөгчинд хийж 1 хонуулна.
Халуун сүмстэй гахайн махан шорлог
– 2 ширхэг сонгино
– Хар перец амталгаагаар
– 1-2 ширхэг лаврын навч
– Халуун чинжүү амталгаагаар
– Давс амталгаагаар
Хийх арга: Сонгиныг жижиглэн хэрчээд ургамлын тос, чинжүү болон бусад амтлагчийг хольж сайтар хутгаад махаа амталж, сэрүүн газар 5-6 цаг байлгана.
Чихэрлэг сүмстэй үхрийн махан шорлог
– 1 хоолны халбага бор сахар
– 2 хумс сармис
– Давс, хар перец амталгаагаар
– 2 хоолны халбага оливын тос
– 2 хоолны халбага бальзамын цуу
– 1 хоолны халбага гич
– 1 хоолны халбага гоньд
Хийх арга: Жижиг аяганд гич, оливын тос, бальзамын цуу, бор сахар, давс, хар перец, жижиглэн хэрчсэн сармис, гоньд, хүсвэл розмаринийг хийж сайтар хутгаж холино. Энэхүү сүмсийг хэрчсэн үхрийн махан дээр тарааж хийгээд сайтар хутгаж амтлаарай. Ингээд хөргөгчинд хийж 1-2 цаг байлгана. Эсвэл хонуулсан ч болно.
Таргаар амталсан загасны махан шорлог
– 1 ширхэг сонгино
– 2 хумс сармис
– 1 цайны аяга тараг
– 3 хоолны халбага ургамлын тос
– 1,5 хоолны халбага зөгийн бал
– 2 хоолны халбага нимбэгний шүүс
– Гоньд, хар перц, чинжүү, давс амталгаагаар
Хийх арга: Шорлогоо амтлаж идэх амтат сүмсийг бэлтгэхийн тулд 1 цайны аяга тараг, сармис, нимбэгний шүүс, гич, зөгийн бал, хатаасан ногоон гоньд хийж миксэрдээд л шорлогны амтат сүмс бэлэн боллоо. Шорлогийг шарах явцдаа гадна талаас нь давс, хар перц, паприка, сонгино сармисны нунтаг, гоньд, орегано, лайм шүүс зэргээр амтлаарай. Ер нь загасны мах хурдан болдог учраас таны шорлог түүхийрнэ гэж айх хэрэггүй. Шорлог гадна талаасаа түлэгдэж, мах, ногооны сайхан үнэр анхилах болно.
Халуун сүмстэй тахиан махан шорлог
– 1 ширхэг сонгино
– 2 хумс сармис
– 15 гр ногоон сонгино
– 1 цайны халбага ургамлын тос
– 1/2 цайны халбага нимбэгний шүүс
– 50-60гр яншуй
– 1 цайны халбага халуун чинжүү
– Давс, хар перец амталгаагаар
Хийх арга: Ингэхийн тулд яншуйг хүйтэн усанд угаасны дараа жижиглэн хэрчиж автомат холигч/ блендэрт хийнэ. Үүний дараа ногоон сонгино, сармис зэргийг мөн адил жижиглэн хэрчээд холигчинд хийгээрэй. Ингээд лайм жимс эсвэл нимбэгний шүүсийг шахна. 1 цайны халбага ургамлын тос, халуун сүмс хийнэ. Мөн давс, хар перц зэргээр нэмж амтлаарай. Ингээд сайтар хольж миксэрдэхэд ногоон ургамлууд задарч, амтлагчууд ууссан байх болно. Махыг амтлаад битүү таглаж 30 минут эсвэл түүнээс ч удаан хэдэн цагаар ч хадгалан хонуулж болно. Ингэвэл бүр л сайхан амттай болно гэсэн үг.
Тарагаар амтлаж шарсан тахиан махан шорлог
– 1 ширхэг сонгино
– 2 хумс сармис
– 1 цайны халбага нимбэгний шүүс
– 1 цайны халбага паприка
– Давс, хар перец амталгаагаар
– 1 хоолны халбага ургамлын тос
– 1 цайны аяга органик тараг
Хийх арга: Томхон саванд чихэргүй органик тараг, ургамлын тос, нимбэгний шүүсийг хийж сайтар хольсны дараа жижиглэн хэрчсэн сармис, сонгино, паприка, давс, хар перц болон өөрийн дуртай нэмэлт амтлагчыг хийнэ. Тахиан цээж махыг шорлох хэмжээгээр дөрвөлжин хэрчсэний дараа дээрх сүмсэнд хийж дор хаяж 4 цаг эсвэл хонуулсан ч болно. Ингэвэл илүү сайхан амттай болох болно. Жич: Тарагны оронд цөцгий эсвэл энгийн майонез ашиглаж шорлогны махыг амтлахад нэн сайхан болдгийг санаарай. Цөцгий, тараг зэргээр амтлаж шорлог хийх гэж байгаа бол хамгийн тохиромжтой мах бол тахиан мах юм.
Майнозаар амталсан тахиан махан шорлог
– 1 цайны аяга майноз
– 2 хумс сармис
– Давс, хар перец амталгаагаар
Хийх арга: Сармисыг жижиглэн хэрчээд майнозанд хийж давс, перецээр амталж тахиан махтай холиод 30 минут байлгана.
Шорлог хийх зууханд нүүрс хийж цогшуулахдаа цогшиж улайссан нүүрсээ хоёр хэсэг хувааж нэг хэсэг дээр нь махаа шарж нөгөө хэсэгт нь мод нүүрс нэмж нэмэгдэл цог бий болгох зарчмыг баримталдаг. Өөрөөр хэлбэл шаралтын явцад цогшсон нүүрс хөрөх тохиолдолд шууд шинээр сэлбэн шарах температурыг нэгэн жигд байлгах шаардлагатай.
Зугаалах төлөвлөгөө гаргатлаа энэ жоруудыг хадгалаад аваарай.
