Өнөөдөр Улсын Дээд шүүхэд “Гэр Хороолол Хөгжлийн нам”- ыг улсын бүртгэлд бүртгүүлэх тухай Б.Батсүх, “Их эв нам”-ыг улсын бүртгэлд бүртгүүлэх тухай З.Бат-Отгон нарын хүсэлтийг авч хэлэлцлээ. Гэвч Улсын Дээд шүүх шинэээр бүртгүүлэх хүсэлт гаргасан дээрх хоёр намыг улсын бүртгэлд бүртгэхээс татгалзсан шийдвэр гаргажээ. Улсын Дээд шүүхээс дараах үндэслэлээр дээрх намуудад татгалзсан хариу өгчээ.
Үүнд “Гэр Хороолол Хөгжлийн нам”- ыг улсын бүртгэлд бүртгэхээс татгалзсан шийдвэр
Хүсэлтэд хавсаргасан баримт нь Улс төрийн намын тухай хуульд заасан шаардлагыг хангаагүй буюу Улсын Дээд шүүхийн 2017 оны 11 дүгээр сарын 20-ны өдрийн 15 дугаар тогтоолд заасан намыг үүсгэн байгуулахтай холбоотой бичиг баримтын бүрдлийг хангах шаардлагыг биелүүлээгүй тул Дээд шүүх уг намыг улсын бүртгэлд бүртгэхээс татгалзав. Хүсэлт гаргагч нь баримт материалаа хуульд заасан шаардлагын дагуу бүрдүүлсэн тохиолдолд хүсэлтээ дахин гаргах боломжтой юм.
“Их эв нам”- ыг улсын бүртгэлд бүртгэхээс татгалзсан шийдвэр
Хүсэлтэд хавсаргасан баримт нь Улс төрийн намын тухай хуульд заасан шаардлагыг хангаагүй гэж үзэж, Дээд шүүх уг намыг улсын бүртгэлд бүртгэхээс татгалзав. Уг нам нь баримт материалаа хуульд заасан шаардлагын дагуу бүрдүүлсэн тохиолдолд хүсэлтээ дахин гаргах боломжтой юм гэжээ.
