Монгол Улсын Зам, тээврийн хөгжлийн яам, “Улаанбаатар төмөр зам” нийгэмлэг хамтран дөрөвдүгээр сарын 18-ны өдөр ОХУ-ын нийслэл Москва хотноо “Транзит Монгол-2018” чуулган зохион байгуулах гэж байна.
Тус чуулганыг ОХУ-д дөрөвдүгээр сарын 17-19-ний өдрүүдэд Олон улсын тээвэр ложистикийн бүтээгдэхүүн үйлчилгээг танилцуулдаг “Trans Russia/Trans Logistica” 23 дахь удаагийн үзэсгэлэнгийн хүрээнд зохион байгуулна.
Уг үйл ажиллагаанд Монгол Улс анх удаа оролцох бөгөөд Евразийн ачаа тээврийн гол тоглогчид нэгэн дор цугларч, бүс нутгийн тээврийн борлуулалт, хамтын ажиллагаа, төмөр замын хөрөнгө оруулалт, хамтын ажиллагааны асуудлаар хэлэлцэж, чуулганы үеэр Монголын боломжуудыг танилцуулах юм.
Чуулганд гурван улсын тээврийн яам, төмөр замын байгууллагууд, тээвэр зууч, хил, гааль, хорио цээрийн байгууллагууд, нефть, нүүрс, төмөрлөг үйлдвэрлэгчдийн холбоод оролцож, асуудлуудаа өргөн хүрээнд хэлэлцэх аж.
Түүнчлэн Монгол Улсын агаарын тээвэр, авто тээвэр, далайн тээврийн байгууллагууд, аж ахуй нэгж, компаниудын төлөөлөл илүү өргөн хүрээтэй оролцоно.
Өнгөрсөн онд энэхүү чуулган БНХАУ-ын нийслэл Бээжин хотноо болсон бөгөөд түүний үр дүнд тээврийн салбар дахь хамтын ажиллагаа идэвхжиж, 2017 онд тээвэрлэсэн ачааны хэмжээ
2016 оны хэмжээтэй харьцуулахад ОХУ-аас БНХАУ-ын чиглэлд хүнсний ачаа, өнгөт металл, тоног төхөөрөмж, нефть бүтээгдэхүүн тээвэрлэлтийн хэмжээ 26,79 хувийн өсөлттэй байна.
Харин БНХАУ-аас Европын чиглэлд дамжин өнгөрөх чингэлэг тээвэр нь эрчимтэй нэмэгдсэнээр 52,19 хувийн өсөлттэй байна.
Оролцогч байгууллагууд:
Монгол Улсын талаас
- Монгол Улсын Зам тээврийн хөгжлийн яам
- Улаанбаатар төмөр зам Хувь нийлүүлсэн нийгэмлэг
- Монголын төмөр зам
- Далайн захиргаа
- Иргэний нисэхийн ерөнхий газар
- Туушин ХХК
- Нортерн Рэйлвэйс ХХК
- Монголын Тээвэр Зуучийн холбоо
- Монголын Худалдаа аж үйлдвэрийн танхим
ОХУ-ын талаас
- Засгийн газар, Тээврийн хөгжлийн яам
- Тээврийн удирдлагын газар
- “Оросын төмөр замууд” НХ-ийн төлөөлөл
- Холбооны Гаалийн алба
БНХАУ-ын талаас
- Улсын төмөр замын газар
- Төмөр замын ерөнхий компани
- Төмөрлөг үйлдвэрлэгчдийн холбоо
- Нүүрсний холбоо
- Мод, модон материалын худалдааны холбоо
- Нефтийн компаниудын холбоо
- Тээвэр зуучлалын компаниуд
