УИХ-ын гишүүн, Дархан аварга Б.Бат-Эрдэнэ Үндэсний бөхийн холбоог тойрсон асуудлаар өнөөдөр байр сууриа илэрхийлж, сэтгүүлчдэд мэдээлэл өглөө. Тэрээр мэдээллийнхээ эхэнд Монгол бөхийн холбооны түүхээс цухас дурьдсан юм. Ингээд цааш ярихдаа “Сая өнгөрсөн гуравдугаар сард ээлжит Их эеэ хуралдуулсан. Хурлаараа дүрмээ баталсан. Шинэ дүрмээр БХ-ны хуучин тогтолцоогоор тэргүүн нь их эрх мэдэлтэй, гүйцэтгэх удирдлагыг давхар биелүүлдэг. Бусад удирдах зөвлөлүүдийг даргалдаг байлаа. Одоо бол шинэ дүрмээр шинэ тэргүүн, гүйцэтгэх захирал, цэцдийн зөвлөлийн дарга нь тусдаа байхаар заасан. Миний хувьд Бөхийн өргөөнд тусдаа өрөө байхгүй цалингүй байх бүтэцтэй зохион байгууллалт хийсэн юм. Харин хурлын дараа залуу бөхчүүд холбооныхоо ачааг үүрэлцэнэ гээд дүрэмд өөрчлөлт оруулахын зэрэгцээ бүх эрх мэдлийг тэргүүлэгчид мэднэ, бид шийднэ гэсэн зарчимтай ажиллаж эхэлсэн. 15 тэргүүлэх цолтой бөхчүүд дүрмэнд орсон өөрчлөлтөөр тэргүүн нь тусдаа “та бол 15 тэргүүлэгчийн нэг” гэдэг ийм л зарчимтайгаар ажиллаж байгаа юм. Тэд Ганболд заантай утсаар яриад “Та нар хурал хийсэн гэсэн. Тэргүүлэгчээр нь Бат-Эрдэнэ аваргыг томилсон гэж дуулсан. Аваргатай бол юу ярих вэ. Залуучууд ингээд санаачилга гаргаад, ачаагаа үүрээд явна гэж байгаа бол дэмжинэ ээ гэсэн юм билээ. Түүнээс хойш манай залуучууд дахиад санаачлага гаргаад Л.Чинбат, А.Сүхбат, У.г Б.Гантогтох бусад хүмүүс болон манайхаас Б.Сайнбаяр, Ц.Магалжав хоёр очоод яриа хэлэлцээр хийсэн юм билээ. Тэр ярианы протокол надад байна.” гэсэн тайлбарыг өгч байлаа.
Тэрээр мөн “Их-Эе-ийн бүрэлдэхүүнд өөрчлөлт орсон учраас энэ өөрчлөлтөөрөө хурлаа дахин хийе гэхэд нь А.Сүхбат ийм бүрэлдэхүүнээр хурлаа хийхэд асуудалгүй гэж ярьжээ. Ингэхэд нь Б.Гантогтох “Ийм бүрэлдэхүүнээр хуралдвал Бат-Эрдэнэ аварга гараад ирнэ” гэхэд нь Л.Чинбат “Ийм бүрэлдэхүүнээр хоёр талаасаа хуралдвал Бат-Эрдэнэ аварга ч, би ч дэвшихээ больё” гэж ярилцаад гарын үсгээ зуралцсан юм билээ. Энэ асуудлаа надад хэлэхэд нь би ч татгалзах юм алга гэдгээ хэлсэн. Намайг дэвшүүлэхгүй гэсэн ч би хүлээн зөвшөөрнө гэж хэлсэн. Энэ үед Ж.Мөнхбат аварга маань бурхан болж уй гашуутай байхад хэвлэлүүдтэй хаалтын гэрээ хийж дайралт хийж зохион байгуулахаа болиочээ гэж ярьсан юм билээ. Гэтэл тэр орой нь нөгөө нөхдүүд бөхийн өргөө рүү дайрсан байсан. 2002 оноос хойш ээлжит бус Их-Эе хурал хийж, бөхийн өргөөг дайрч эзэлсэн тохиолдол 5-6 удаа болж байсан юм билээ. Энэ хурлууд нь шүүх дээр очоод хүчин төгөлдөр бус гэж шийдвэрлүүлсэн байдаг. Би бол Л.Чинбатыг даргаар нь томилсон гурван шатны шүүхийн шийдвэрийг олж хараагүй байгаа. Жаахан тэвчээртэй байж болно доо. Тэрийг хүлээхгүй үймээн самуун дэгдээж, өндрөө аваад байгаа юм. Ингэж өндрөө авах асуудал ч биш. Баримттай, факттай ярьсан асуудал дээрээ л ярих хэрэгтэй. Хүн хэлээрээ, мал хөлөөрөө гэж үг бий. Түүнээс бусдыг турхирч, нийгмийг талцуулах шаардлага байхгүй л юм даа гэсэн байр сууринаас хандаж байна.” гэв.
-Таны хамгаалагч Б.Одхүү УИХ-ын гишүүн А.Сүхбатын биед халдсэн гэдэг нь үнэн юм уу?
-Би бие хамгаалагч битгий хэл, туслах, жолоочгүй хүн. Миний хамгаалагч биш. Надад нэг туслах эмэгтэй л энд ажлаа хийгээд байж байна. Би хаана ч явсан туслах, бие хамгаалагч дагуулж явдаггүй. Муу юм болохоор л хойд хар овоохой гэдэг шиг Б.Одхүүг буруутгах юм. Тэр хүнтэй би холбоо бариагүй, миний утсыг ч шалгаж болно. А.Сүхбат гишүүний биед халдсан зүйл байхгүй.
Нөгөө талдаа бас нэг зүйлийг УИХ-ын гишүүд ойлгох хэрэгтэй. УИХ-ын гишүүний халдашгүй дархан байдлаараа халхалж юу ч хийж яаж ч дур зоргоороо авирлаж болно гэж ойлгож болохгүй. Хууль батлан гаргах эрхийг хэрэгжүүлэхэд л ямар нэгэн байдлаар халдашгүй байдлыг нь дархлаажуулахыг хэлж байгаа болохоос өөрөө нийгмийг хамарсан эмх замбараагүй байдлыг үүсгэчихээд халдашгүй байдалд халдлаа гэж хуулийн ард нуугдаж үлдэж болохгүй.
-Энэ асуудалд сайд Ц.Нямдорж холбоотой гэсэн хардлага гараад байгаа?
-Би үгүй болов уу гэж харж байна. Одоо хардлага сэрдлэг хэтэрлээ. Би баасан гарагийн арай Нямдорж сайдтай утсаар холбогдож ярьсан. Бөхийн өргөөн дээр Сүхбат тэргүүтэй хүмүүс ирсэн байна. Намайг тараа гэсэн. Би хөдөө лагерт байсан болохоор очиж чадахгүй гэдгээ хэлсэн. Харин миний авсан мэдээлэлээр Гантогтох согтуу гээд нэлээд хүмүүс архи уусан байна. Хүний амь нас, эрүүл мэнд талаас нь сайдыг анхаараарай гэсэн. Төд удалгүй цугласан хүмүүс яваад өгсөн гэсэн.
-ОӨУБЕГ-аас таныг албан ёсны тэргүүнээр бүртгэх процесс явагдаж байгаа юу?
-Хуулийн дагуу нэр бүртгэх процесс явагдаж байгаа. Гуравдугаар сарын 24-нд болсон ээлжит бус хуралтай холбоотойгоор аливаа бүртгэл хийхгүй байхыг үүрэг болгосон цагдаа, шүүхийн бичиг очсон юм билээ. Иймээс бүртгэхгүй гэж байгаа юм билээ. Хуулийн дагуу хурлаа хийгээд, эвлэлдэн нэгдээд хуулийн дагуур протоколоо өгвөл бүртгэнэ.
