АТГ-аас сар бүрийн 25-нд сэтгүүлчдэд мэдээлэл хийж, өнгөрсөн сард хийсэн ажлаа тайлагнадаг уламжлалтай. Энэхүү мэдээллээ өнөөдөр хийлээ. Тус газрын Мөрдөн шалгах хэлтэс өнгөрсөн гуравдугаар сард гэмт хэргийн шинжтэй 100 гомдол мэдээлэл хүлээн авч, шалгасан байна. Мөн авлига, албан тушаалын болон прокурорын байгууллагаас харьяалал тогтоосон 344 хэргийг мөрдөн шалгажээ. Үүнээс эрүүгийн 8 хэргийг шүүхэд шилжүүлэх саналтайгаар, 24 хэргийг хаах, 7 хэргийг харьяаллын дагуу шилжүүлэх саналтайгаар прокурорын байгууллагад шилжүүлсэн байна. Авлигатай тэмцэх газрын Тамгын хэлтсийн дарга, эрхэлсэн комиссар З.Баасанням хэлэхдээ”Өнөөдрийн хэвлэлийн бага хурлаар ямар нэгэн эрүүгийн хэрэг, эрүүгийн байцаан шийтгэх ажиллагаатай холбоотой мэдээлэл өгөхгүй. Асуултыг бичгээр авч вэб сайтаар албан ёсоор мэдээлэл өгнө” гэдгээ мэдэгсэн.
Хурлын үеэр сэтгүүлчдийн дараах асуултад хариулт авлаа
-Дархан гурил тэжээлийн үйлдвэрт 16 тэрбумын асуудлыг АТГ шалгаж байгаа гэсэн мэдээлэл байгаа. Үүнд ямар хүмүүсийг шалгаж байгаа вэ.Энэ талаар мэдээлэл өгөхгүй юу? .
-Шалгаж байгаа.
-УИХ-гишүүн Ж.Батзандан Л.Болд нарыг шалгаж эхэлсэн гэсэн мэдээлэл байна?
-Ямар нэгэн эрүүгийн хэрэг үүсгэсэн асуудал байхгүй. Иргэнээс ирсэн гомдлын дагуу УИХ-гишүүн Л.Болдоос тодруулга авсан байгаа. Одоогоор ямар асуудлаар гомдол гаргасан талаар мэдээлэл өгөх боломжгүй байна.
-АТГ-ын даргын хугацаа дууссан гэсэн асуудал яригдаж байгаа. Ерөнхийлөгчийн тамгын газраас хүний оронд нөхөж орсон гэж тайлбарлаж байна. Хуулиндаа ямар байдаг вэ?
-Монгол улсад хүчин төгөлдөр мөрдөгдөж байгаа хуулийг бид тайлбарлах эрхгүй. Гэхдээ хуулинд маш тодорхой заачихсан байгаа. Хуулиар АТГ-ын дарга дэд даргыг нөхөн томилдог.
-Төрийн тусгай албаны удирдлагыг олон нийтийн санал асуулгаар тодруулах хэр зохиомжтой вэ. Одоо санал асуулга эхэлчихсэн байгаа?
-Бидний зүгээс тайлбар өгөх боломжгүй.
-С.Баяр болон Б.Ариунсан нарын биеийн байдал муудсан гэсэн мэдээлэл байгаа. Эмчилгээ үйлчилгээ үзүүлж байгаа юу?
-Цагдан хоригдож байгаа хүний биеийн байдлыг эмчийн магадлаар тогтоогдог. Цагдан хорих газарт хоригдож байгаа хүний эрүүл мэндийн байдал Шүүхийн шийдвэр гүйцэтгэх байгууллага хяналт тавьж ажилладаг. Иймээс биеийн байдлын талаар шүүхийн шийдвэр гүйцэтгэх газраас тодруулаарай.
-Оюутолгой төсөлтэй холбоотой хүмүүс нэг сарын хугацаанд хэдэн удаа мэдүүлэг авсан бол. Ирэх долоон хоногт сангийн сайд байсан С.Баярцогтын нэг сараар яллагдах хугацаа дуусна. Хэргийн шалгалтын ажиллагаа ямар байгаа бол?
-Шалгах ажиллагаа прокурор хяналт дор явагдаж байгаа. Хэргийн шалгалтыг явц байдлын талаар прокурорын зөвшөөрсөн хэмжээнд мэдээлэл боломжтой.
-Цагдан хоригдож байгаа хүмүүсийн эрүүл мэндийг байдал муудсан асуудлаар танайд хандаж батлан даалтад гаргах хүсэлт ирсэн үү. Эргэлт оруулж байгаа юу?
-Эргэлтийг хориглохгүйгээр ар гэрийн хүсэлтийн дагуу оруулж байгаа. Манайд хоригдож байх хугацаандаа эрүүл мэндийн байдал муудсан гэсэн мэдээлэл ирээгүй
-Таван толгойгоос 50 тонн нүүрс хууль бусаар гаргаж, улсад 20 орчим ам,долларын хохирол учруулсан асуудал яригдаж байгаа. Энэ асуудал дээр ямар хүмүүсийг шалгаж байгаа вэ?
-Энэ асуудал олон нийтийн мэдээллийн хэрэгслээр гарсан. Мөн УИХ –гишүүн Л.Энхболдоос манайд мэдээлэл ирүүлсэн байгаа. Үүний дагуу хэрэг бүртгэл нээгдээд шалгаж байгаа. Одоохондоо хэн нэгнийг яллагдагчаар татсан асуудал байхгүй.
