“Сүрьеэ өвчнөөс Д витамины нөлөөгөөр урьдчилан сэргийлэх” төсөл нэрийдлээр нийслэлийн гэр хорооллын 15 сургуулийн 8214 хүүхдэд Д витамин гэх зүйлийг албадан уулгаж, эмийн туршилт хийсэн талаар энэ сарын 24-ны өдөр Монголын эцэг эхчүүдийн үндэсний зөвлөл”-өөс мэдээлэл хийж олон нийтэд цацсан билээ. Тэгвэл MHI компани албан ёсны хариу тайлбарыг өнөөдөр хийлээ.
“Монголын эрүүл мэндийн үүсгэл” НҮТББ-ын Гүйцэтгэх захирал Б.Уянга: “Монголын эцэг эхчүүдийн үндэсний зөвлөл”-өөс ерөнхий боловсролын сургуулийн сурагчдад туршилт хийж байна гэж манай байгууллагын талаар ор үндэсгүй гүтгэлэгийн чанартай ташаа мэдээлэл цацаж байгаатай холбогдуулан залруулга хийж байна. Судалгаа 2016 оны 9 дүгээр сараас эхэлж нийт 15 сургуулийг хамруулсан. Судалгааны зорилго нь сургуулийн насны хүүхдүүдийг сүрьеэгээс урьдчилан сэргийлэхэд Д аминдэмийн нөлөөллийг судлахад оршсон. Бид 10 мянга гаруй эцэг эхчүүдтэй уулзаж, бүрэн мэдээлэл өгснийхөө дараа зөвшөөрөл авсан. Зөвшөөрлийг нь гарын үсгээр баталгаажуулж, сайн дурын үндсэн дээр судалгаагаа эхлүүлсэн. Мөн Эрүүл Мэндийн Яам болон Харвардын Анагахаас ухааны сургуулийн Ёс зүйн хорооны зөвшөөрөл бидэнд бий” гэв.
Сүрьеэгийн халдвартай хүүхдүүдээ бид ХӨСҮТ-ийн Сүрьеэгийн клиниктэй хамтран шинжлэхэд 129 хүүхэд сүрьеэгээр өвдсөн байсан
“MHI” компанийн хэвлэлийн төлөөлөгч Ц.Энхжаргал: “Манай “Монголын Эрүүл мэндийн үүсгэл” ТББ нь Харвардын анагаахын шинжлэх ухааны сургуулийн эрдэм шинжилгээ судалгааны нэгж байгууллага юм. 2004 оноос эхлэн Д витаминтай холбоотой 12 судалгаа, нийтдээ 20-иод судалгааг Олон улсын түвшинд хийсэн. Үүнийгээ Олон Улсын сэтгүүлүүдэд хэвлэн нийтлүүлж дэлхийн болон монголын нийгэм эрүүл мэндийн бодлогод тодорхой хэмжээний зөвлөмж өгч байсан.
6-14 насны хүүхдүүдийг оролцуулан “Сургуулийн насны хүүхдийг сүрьеэ өвчнөөс сэргийлэхэд Д аминдэмийн нөлөө” судалгаанд 9,800 гаруй хүүхдийг оролцуулсан. Үүнээс 946 хүүхэд сүрьеэгийн далд халдвартай гарсан. Халдвартай хүүхдүүдээ бид ХӨСҮТ-ийн Сүрьеэгийн клиниктэй хамтран шинжлэхэд 129 хүүхэд сүрьеэгээр өвдсөн байсан. Бид сүрьеэгээр өвдсөн хүүхдүүддээ эмчилгээ хийж, эдгээж байгаа. “Сургуулийн насны хүүхдийг сүрьеэ өвчнөөс урьдчилан сэргийлэхэд Д аминдэмийн нөлөө” судалгаа нь дэлхийн сүрьеэгийн бодлого, зөвлөмж болж орохоор том хэмжээний судалгаа юм. АНУ-ын Анагаах ухааны хүрээлэнд материалаа явуулснаар дэлхийн 300 гаруй судалгаа, эрдэм шинжилгээний байгууллага дундаас шалгарсан. Манай байгууллагын гол үүсгэн байгуулагч Харвардын их сургуулийн доктор профессор н.Ганбаа гэдэг хүн бий. Энэ хүн Д аминдэмийн чиглэлээр маш олон судалгааг хийсэн туршлагатай. Монгол хүүхдүүд дээр хийгдсэн судалгаа нь инновоцлаг, шинэлэг. Дэлхий нийт өвчилсөн хойно нь сүрьеэ өвчинтэй тэмцдэг. Харин судалгаагаар урьдчилан сэргийлэх боломж бүрдэж байгаа юм” хэмээн ярилаа.
