Бүгд Найрамдах Намын онц их хурал ирэх сарын 3-нд болохтой холбогдуулж тус намын дарга Б.Жаргалсайхан мэдээлэл хийлээ. Бүгд Найрамдах Намын гишүүн “БНН-ын онц их хурлыг тавдугаар сарын 4,5-ны өдрүүдэд зохион байгуулахаар болж байна. Онц их хурлыг зохион байгуулах болсон үндсэн шалтгаан нь улс, эх оронд онц хүнд байдал үүсчихээд байна. Бидэнд байгаа Сангийн яам, Монголбанк, Статискийн газрын олон төрлийн баримтууд дээр бид ажиллаж үзсэн. Ингээд харахад манай эдийн засгийн үндсэн үзүүлэлтүүд унасан байна. Өссөн ганцхан үзүүлэлт нь чанаргүй зээлийн хэмжээ. Энэ мэтчилэн манайд болж бүтэж байгаа юм ховор байна.
Тиймээс энэхүү асуудлуудад үнэлэлт, дүгнэлт өгөх, хэрхэн цаашид шийдэхийн тулд БНН-ын гишүүд, улстөрийн идэвхтнүүд, бусад улстөрийн нам, хүчнүүдтэй хамтарсан хурал хийхээр болсон юм. Хийсэн үр дүнгээ төр засагт хүргүүлнэ” гэлээ.
Энэхүү хурлын үеэр Бүгд найрамдах намын дарга Б.Жаргалсайханаас зарим зүйлийг тодрууллаа.
-Танай нам удахгүй онц их хурлаа хийх гэж байгаа юм байна. Ер нь манай улс төрийн нөхцөл байдал ямар вэ?
-Улс оронд юу болж байгааг та бүхэн өөрсдөө харж байгаа. Монгол Улсын нийт гадаад өр зээлийн хэмжээ 27 тэрбумд хүрсэн байна. Эдийн засгийн үзүүлэлтээр бусад орнуудтай харьцуулах юм бол хамгийн доогуур явж байгаа. Нийгмийн олон салбарт маш их хэр хэмжээнээс хэтэрсэн тогтолцоо үүссэн. 170 мянган оюутан сурж байна. Нийгмийн баялаг хэн бүтээх вэ. Бүгдээрээ дарга болох гэж байгаа юм уу?. Нийгмийн баялаг дээр ажилладаг хүн байхгүй болсон. 180 мянган төрийн албан хаагчидтай. Манайх шиг 3 сая хүн амтай улс оронд ийм их дарга ямар хэрэгтэй вэ? Монголчууд улс төр, нийгмийн амьдралдаа идэвхтэй оролцох ёстой. Иргэн бүр улс эх орон, хөгжлөө гэсэн сэтгэлтэй байж гэмээн хөгжинө.
Өнгөрсөн 27 жилийн нийгэм эдийн засгийн байдлаа бүгдээрээ нэг дүгнэж, цэгнэх цаг нь болсон. Энэ 27 жил хэн юу бүтээв. Цаашид яах вэ. Өвөл болохоор баахан утаа ярьдаг.Бусад үед мартдаг.
Гадаад өр зээл маш их болж байна. Авсан зээлийнхээ мөнгийг юунд зарцуулсан вэ. Монгол орны хөгжилд зарцуулсан юм уу .Эсвэл өөр зүйлд зарцуулсан юм уу. Үүнийг ил болгож тавих ёстой. Мөн бид гадаад, дотоодын санхүүгийн эх үүсвэрүүдээ маш хариуцлагагүй үрж байна. Миний мэдхийн 500 мянгаар орон сууц босож байгаа. Ингээд орон сууцаа 2 сая 500-аар зарах гэж байна. Өөрөөр хэлбэл, 500 мянгаар орон сууц барьчихаад 8-10 дахин нэмж зарж байна. Энэ их ашиг хонжоо хэний гарт ороод байна. Иймээс энэ асуудлуудыг бид яаралтай шийдэх ёстой. Энэ Улаанбаатар хотод байгаа хэнд ч хэрэггүй диплом өгдөг их, дээд сургуулиудыг хаах хэрэгтэй. Их сургууль гэхээс илүүтэй техник технологийн мэргэжлийн сургуультай болох шаардлагатай.
Эрдэнэт үйлдвэрийг төр хувьдаа авах хэрэгтэй
-Оюутолгойн гэрээний асуудал нэлээд асуудал үүсгэж байгаа. Та энэ асуудал ямар байр суурьтай байна вэ. Ер нь энэ гэрээг өөрчлөх боломж байгаа юу?
-Манай шударга ёс гэдэг зүйл их хэрэгтэй байна. Оюутолгойн гэрээг хийсэн гээд хэдэн төдийг шоронд хийчихсэн байгаа. Өнөөдөр дэлхийн томоохон компаниуд дэлхий ертөнцийг аваад явж байгаа. Америк Европын орнууд аливаа зүйлийг хийхдээ хуулийн хүрээнд ил тод нээлттэй хийдэг. Харин манай дарга тийм зүйл байдаггүй. Аливаа зүйлийг авлига мөнгөөр шийдэж байна. Иймээс хариуцлагагүй дарга нартайгаа хариуцлага хүлээлгэх хэрэгтэй. Үүний дараа гэрээний асуудлыг шийдвэрлэх боломж бидэнд байгаа. Оюутолгойн гэрээнд гарц бий.
-Эрдэнэт үйлдвэрийн асуудал дээр ямар байр суурьтай байна вэ?
-Эрдэнэт үйлдвэр 27 жил манай улсын эдийн засагт их үүрэг оруулж байсан. Гэтэл хэдэн нөхөд хувьдаа аваад өр зээлэндээ тавих эсвэл хэн нэгэнд дамнал зарах гэж байсан ил болсон. Иймээс Эрдэнэт үйлдвэрийг төр хувьдаа авах хэрэгтэй гэсэн байр суурьтай байгаа.
-Үндсэн хуулинд өөрчлөлт оруулах асуудал яригдаж байгаа. Та нам энэ асуудал дээр ямар байр суурьтай байна вэ?
-Үндсэн хуулийг өөрчлөхгүй манай нам. Энэ дэмий асуудал. Дээд доод танхимтай болно гэж яриад байгаа. Ахиад олон хоол савыг гарч ирж биднийг ноёлно. Манайд дарга нар багадаагүй.
-2020 оны сонгуульд та өрсөлдөх үү?
-Намын нөхөд болон иргэд юу гэж хэлэхээс шалтгаална. Сонгуульд нэр дэвшинэ гэдэг хэн дуртай хийгээд байдаг ажил биш.
