С.Зориг, Т.Лхагвасүмбэрэл нарын хэрэгт гаднын шинжээч, мөрдөгчдийг ажиллуулж, жишиг тогтоое

 

 

Монгол түмэн өөрсдийг нь аюул заналхийллээс
авран хамгаалах үүрэгтэй цагдаа хүчнийхэнд итгэл алдраад дууслаа. Эрх мэдэл,
мөнгөтэй хүнд илүү хүрч ажилладаг хууль хүчний байгууллага тэднийнхээ халаасанд
хэдийнэ орчихсныг үгүйсгээд байх зүйлгүй бөгөөд их хурлаас удирдлагыг нь
сонгож, цалин төсвийг нь тавьж байна. Нөгөө талаас энэ байдал дээр нэмэгдээд
саяхан болж өндөрлөсөн, өдгөө С.Зоригийн хэрэг шиг замхарч буй Т.Лхагвасүмбэрэл
агсны хэрэг цагдаагийнхныг хэрхэн ажиллаж, нөлөөлөлд автдагийг харууллаа.
Цагдаагийн байгууллагыг нийгмээрээ хараан зүхэж, гал асч байх үед арга буюу
цагдаагийн байгууллагаас мэдээлэл хийж, гал унтраах эхний арга хэмжээг авлаа.
Урьдчилсан ийм арга хэмжээ авахгүй бол нэгэнт нэгэнт дүрэлзвэл гал дийлдэхгүй /цагдаагийн
нэр хүнд сэхэхгүй/ юм болно гэдгийг албаныхан дээр дооргүй ярилцсан гэнэ.

Асуудлын
гол нь Т.Лхагвасүмбэрэл агсны хэрэг С.Зоригийн хэрэг шиг замхарч, сонгууль
бүрийн өмнө сенсаацилдаг сэдэв болгож буй цагдаагийн газрын хариуцлагагүй,
хяналтгүй, нөлөөлөлд автдаг байдал юм. Өдгөө цагдаагийн нэр хүндээ бодоод
Т.Лхагвасүмбэрэл агсны хэргийг илрүүлчих цагдаа нар байгаа ч анхнаасаа хэргийг
ул мөрийг балласан доод шатны цагдаа нарын харгайгаар энэ хэрэг илрэхгүй болоод
явчихлаа. Нөгөө талаас цагдаагийн удирдлагад дээрээс үүрэг өгсөн ч байх
магадлалтай. Юутай ч, Т.Лхагвасүмбэрэл агсны хэрэг ч гэлтгүй хэргүүд дээр
гаднын шинжээч, мөрдөгчдийг оруулж ирдэг болмоор байна. Ийм жишиг тогтоох цаг
нь болсон ба энэ Засгийн газрын үед л лав тогтохгүй бололтой. С.Зоригийн хэрэг
илрэх болов уу гэж 17 жил ард түмэн хүлээлээ. 80 хувь нь илэрчихсэн ийм хэргийг
захын нэг дунд сургууль төгссөн жаал ганц, хоёрхон хүнийг шалгаад илрүүлчих
харагдаад байх юм.

Нөгөө талаас С.Зоригийн хэрэгтэй холбоотойгоор 17 жилийн
турш олон хүн хэлмэгдэж зарим нь амь насаа алдаж, зарим нь харийн оронд Монгол
Улсад төрсөндөө харамсан нуугдаж амьдарч байна. С.Зориг, Т.Лхагвасүмбэрэл
гэлтгүй энэ мэт улстөр, ашиг сонирхлын зөрчилтэй захиалгатай аллага Монгол
Улсад олон гарч нэг ч удаа илэрсэнгүй.

Үхлийн шалтгаан нь тодорхой бол эзэн
холбогдогч, захиалагч нь олддоггүй, үхлийн шалтгаан нь тодорхой бус байвал өвчин
эмгэгээр эсвэл амиа хорлосон болгодог аргуу дүгнэлтийг хийдэг болж. Учир мэдэх
хүний ярьж байснаар ойрын 3-6 сардаа илэрдэггүй үхлийн тарилга байдаг гэх
бөгөөд 3-6 сарын дараа бие дээр нь хордсоны ул мөр гарч, харалсан байдаг аж.
Тиймдээ ч тэр үү, өнгөрсөн хугацаанд Польш, Парагвай зэрэг гаднын цөөнгүй улсад
учир битүүлэг шалтгаанаар нас барсан удирдагчдынхаа булшийг хөндөж, гаднын
шинжээч нарын хамтаар үхлийн шалтгааныг нь гаднын нөлөөтэй хордсон болохыг
тогтоосон олон ч жишээг уншиж байв.

С.Зориг, Т.Лхагвасүмбэрэлийн хэргээс гадна О.Дашбалбар,
Ш.Отгонбилэг, Ж.Наранцацралт, Б.Дангаасүрэн гэх мэт хүмүүсийн хэргийг дахиад
нэг шалгаад үзэхэд гэмгүй ба гаднын шинжээч, мөрдөгч нарыг оруулж ирдэг жишиг
тогтоохыг нийгмээрээ хүлээж байна. Байсан зүйлийг байхгүй болгож, байхгүй зүйлийг гаргаж ирдэг Монголын цагдаагаас хаана байна тэр 10 мянгатын дэвсгэртүүд, хаана байна тэр Э.Бат-Үүлийн малгай гэж С.Зоригийн хэрэгтэй холбогдуулан хатуухан асууя. Нэмж хатуухан хэлэхэд, УИХ-ын гишүүн асан Л.Гүндалайгийн
хэлдгээр \”Чадахгүй бол чацга царайлаад зайгаа тавьж өгөх хэрэгтэй” гэдэг үгийг
сануулья.

Эцэст нь, гаднынхан хамтарч ажиллахад бэлэн гэдгээ хэчнээн ч удаа
илэрхийлж, энэ хэргийг илрүүлэхэд тусалж чадна гэдгээ ам бардам илэрхийлсээр байхад манайхан нэг ч удаа тоож үзэлгүй, хэргийг нуун далдруулах ажлаа хийсээр л
байсан нь хэн нэгний халаасанд Монголын цагдаа, хүчний байгууллагынхан байгааг хэлсээр л байгаа юм. Үүнийг батлах мэт хэргийн гол гэрч Б.Булган тун удахгүй нууцаар суллагдаж, С.Зоригийн хэрэг дахин замхарч, сонгуулийн шоу болох цаг ойртсоор.