УИХ-ын гишүүн хатагтай Ц.Гарамжав өнгөрсөн лхагва гарагийн УИХ-ын чуулганы хуралдаан дээр нэгэн томоохон асуудлыг зоригтойхон илчиллээ. Энэ бол олон нийтийн дунд хүлээлт үүсгээд байгаа Хөшигтийн хөндийн шинэ нисэх онгоцны буудлын тухай юм. Уг нь энэ бүтээн байгуулалтыг “Чингис хаан” хэмээн нэрийдэж бас нэгэн бахархал болгон тодорхойлох ёстой байв. Харин энэ бүтээн байгуулалтын үнэн дүр төрхийг Ц.Гарамжав гишүүн ийн хэлэв. Тэрээр “Нодлин бид японоос ирсэн хэсэг төлөөлөгчтэй хамт очиж үзээд миний хувьд нэлээд сэтгэл дундуур буцсан. Яагаад гэвэл тэнд ажиллаж байсан МИАТ-ын мэргэжилтнүүд чанаргүй баригдсан, засах, шинэчлэх ёстой мянгаад дутагдал, доголдлууд байгаа гэсэн. Үүднийхээ чулуунаас авахуулаад үнэндээ “Чингис хаан” гэдэг буудлын нэр нь тохирохгүй байсан. Сая би нисэхийн зөвхөн аюулгүй байдлыг л хангаж байх ёстой юм байна гэдгийг мэдлээ. Ийм төсөл байж болохгүй. Зөвхөн зүгээр буулгачихдаг. Гэтэл нөгөө үйлчлүүлэгчдийн орж гарах, дэлхийн агаарын нисэхийн зам, төв зангилаа болох онгоцны буудал маань өөрөө бараг хуучин нисэхээс дор шахуу томоохон сэндвичин барилга шиг юм болчихсон байгаа. Ийм барилгыг барихын тулд 247 сая долларын хөрөнгө оруулалт хангалттай байсан гэж харагдаж байгаа юм.
Эхлээд ТЭЗҮ-г мэдээж олон улсын нисэх буудлын онгоцны мэргэжлийн компаниудаар хийлгэсэн байх ёстой. Дараа нь мэдээж барилгын байгууламж дээр нь олон улсын экспертизүүд дүн шинжилгээ хийж, дүгнэлт гаргаж, явцыг нь хянаж байсан байх ёстой. Манай Монгол Улс ч гэсэн захиалагчийнхаа хувиар ЗТЯ, бусад холбогдох байгууллагууд энэ дээр бас дүн шинжилгээ хийж явсан бол эцэст нь яагаад үнэ төлбөр хоёр дахин өсөөд 600 сая болсон бэ. Энэ яг Оюутолгойн хөрөнгө оруулалт шиг юм болох гэж байна шд. Ингээд бид өөрсдийнхөө өрийг нэмээд яваад байх ёстой юу? 247 сая доллар бол энэ зэргийн объектыг барихад миний хувьд хангалттай төсөв байсан. Энүүгээр томоохон хэмжээний үйлдвэр барих, сая тоннын хүчин чадалтай цементийн үйлдвэр барьчих ийм том мөнгө. Гэтэл тэнд үйлдвэр байх дайны хэмжээтэй объект босоогүй байгаа. Олон улсын стандартад нийцсэн нисэх буудалтай болмоор байна.” гэж хэллээ.
Ц.Гарамжав гишүүн бол Монголдоо хоёр ч том бүтээн байгуулалт хийсний хувьд ингэж зоригтой хэлж чадаа биз ээ. Монголын тал шат шатандаа хяналт тавьж ажиллах ёстойг ч ийнхүү хатуухан санууллаа.
