Дэлхийн байгаль хамгаалах сан (WWF)-гийн Монгол дахь хөтөлбөрийн газар эко клубийн үйл ажиллагааг дэмжих замаар хүүхдүүдийг байгаль хамгаалах ажилд татан оролцуулдаг. Энэ ажлын хүрээнд экоклубийн сурагчдын санаачилсан Хог хаягдал бууруулах сарын аяныг дэмжиж хамтран зохион байгуулжээ.
Энэ удаагийн аянд Говь-Алтай аймгийн монгол бөхөн байршдаг долоон сум, мөн Ховд аймгийн хоёр сумын эко клубийн сурагчид оролцсон юм. Экоклубийн сурагчид нэг сарын хугацаанд өөрсдийн сургууль дээр хог хаягдлыг хэрхэн бууруулах талаар идэвхтэй үйл ажиллагаа явуулсан байна. Аяныг дүгнэх уулзалтыг Говь-Алтай аймгийн Баян-Уул суманд зохион байгуулжээ. Уулзалтаар экоклубийн сурагчид аяны хүрээнд ямар ажил хийсэн, ололт амжилт юу байсан, цаашид юу хийвэл илүү үр дүнд хүрэх талаар харилцан ярилцсан аж.
Сурагчид 7 хоног бүрийн баасан гарагт сургуулиудаас гарсан хогийг жинлэж үзсэн бөгөөд нийтдээ 627 кг хог гарсан байна. Ангилалт хийж үзэхэд дийлэнх хувийг нь цаас эзэлж байсан бөгөөд энэ талаархи ухуулга сурталчилгааг сурагчдын дунд хийжээ. Түүнчлэн хог хаягдал ашиглаж хийсэн бүтээлээр эко клубууд үзэсгэлэн гаргасан нь иргэдийн сонирхлыг ихэд татсан бөгөөд хог хаягдал бага гаргаж, байгальдаа ээлтэй амьдрах хэрэгтэй гэдэг дээр олонхи нь санал нэгдэж байв.
Аяны хүрээнд зөвхөн хог хаягдлын тухай яриа өрнөсөнгүй, бүтээлч олон ажлыг экоклубын хүүхдүүд хийжээ. Говь-Алтай аймгийн Баян Уул сумын экоклубынхан сурагчдын дотуур байрны улайсдаг гэрлийг тогонд хэмнэлттэй сүүн чийдэнгээр солих бүтээлч ажил өрнүүлсэн нь амжилтад хүрэв. Дотуур байр 68 улайсдаг гэрэлтэй бөгөөд “1 эко клуб-8 сүүн гэрэл” уриалга гаргасан нь олонхийн дэмжлэг авч уулзалтад оролцохоор ирсэн 9 эко клубийн гишүүд 72 сүүн чийдэн авчирч дотуур байрны улайсдаг гэрлийг сүүн чийдэнгээр сольсон юм. Ингэснээр сургуулийн эрчим хүчний хэрэглээг тодорхой хэмжээгээр бууруулж чаджээ. Зохион байгуулагчдын ярьсанаар аяны үр дүнд сурагчдын дадалд эерэг өөрчлөлт гарч, хогийг ил задгай хаях нь эрс багассан байна. Сурагчдын дэмжлэгийг хүлээж байгаа учир Хог хаягдал бууруулах аяныг 2018 оны зургадугаар сар хүртэл үргэлжлүүлэхээр болжээ.
