“Монгол туургатны бөхийн барилдаан” ирэх сарын 2-нд болно

МҮБХ-ны албан ёсны зөвшөөрөлтэйгээр “Хамаг Монгол” студи, бөхийн “Жавхлант” дэвжээ хамтран “Монгол туургатны бөхийн барилдаан”-ыг 2018 оны 6 дугаа сарын 02-ны өдөр Төв цэнгэлдэх хүрээлэнд зохион байгуулна. Монгол үндэсний, үзэмчин, буриад бөхийн барилдаан тус бүрийн түрүү нь 3 сая төгрөгийн бай шагналтай. Нэг азтай үзэгчийг шалгаруулж “PRIUS-30” автомашин бэлэглэнэ. “Монгол туургатны бөхийн барилдаан”-ы журмыг танилцуулахад, Бөхчүүдээ олноор хамруулахын тулд 1 бөх нэг л төрлөөр барилдана. Буриад 128 бөхийн барилдаан сугалаагаар явагдах бөгөөд зочин 40 бөх шууд оролцоно. Манай бөхчүүдээс 88 бөх барилдана. Үзэмчин 128 бөхийн барилдаан мөн л сугалаагаар барилдах бөгөөд зочин 40 бөх шууд оролцохоос гадна манай улс, аймгийн алдар цолтой 88 бөх хүч үзнэ.
Монгол үндэсний бөхийн барилдаанд улс аймгийн алдар цолтой 96 бөх зодоглоно. Зочин 32 бөх хоорондоо хүч үзэж 4 давж түрүү үзүүрт шалгарсан 2 бөх, манай 96 бөхөөс шөвгийн гуравт шалгарсан 3 бөхтэй тойргоор барилдах юм. Бөхчүүдийг 2018 оны 6 дугаар сарын 02-ны өдрийн 11 цагт Төв цэнгэлдэхэд бүртгэнэ. Бүртгүүлэхээр ирсэн дарааллаар барилдах сугалаа явагдана. Цагаан өнгийн бөмбөг сугалсан тохиолдолд буриад бөхөөр, хөх бөмбөг сугалвал монгол үндэсний бөхөөр, улаан бөмбөг сугалвал үзэмчин бөхөөр барилдах юм. Гурван төрлийн бөхийн барилдааны бай шагнал адил байна. Монгол үндэсний бөхийн барилдаанд туршилтаар барьц сонгохгүй барилдана.