“Дээдсийн гоёл” салоны Ерөнхий захирал З.Оюунчимэгтэй ярилцлаа.
Танайх хэзээнээс эхэлж энэ ажлыг хийж эхлэв ?
За та бүхэнд энэ өдрийн мэндийг хүргэе. Намайг Зургаадай овогтой Оюунчимэг гэдэг. Миний бие “Дээдсийн гоёл” салоныг 2008-2018 оны хооронд анх байгуулж үйл ажиллагаагаа эхлүүлсэн. Үүнээс хойш өдийг хүртэл тасралтгүй үйл ажиллагаагаа явуулж байна. Манай салоныг Монгол дээлний гарвал угсааг нарийн судалж, эртний загварын чиг хандлагыг илүүтэйгээр гаргахыг чармайсан тийм салон гэж хэлж болно.
Одоогоор танайх хэдэн хүнийг ажлын байраар хангаж байгаа вэ?
Яг одоогоор манайх 5-6 хүнийг ажлын байраар ханган ажиллаж байна. Тэр хүмүүс маань бүгд мэргэшсэн оёдолчид байгаа.
Хүмүүсээс хэр их захиалга ирдэг вэ?
Ерөнхийдөө манайх жилдээ нэлээд хэмжээний гоёлын дээл хийдэг. Мөн үүний зэрэгцээ манайх гадны улс орнуудад амьдран сууж буй монголчууддаа үндэсний дээл хувцасыг нь хүргэн борлуулж байна. Тэд маань ч бидэнд их захиалга өгдөг. Гэхдээ манай салоны нэг онцлог нь бид аливаа хувцсыг хийхдээ аль болох Монгол үндэсний онцлог хэв шинжийг шингээсэн хувцасыг хийхийг зорьж ажилладаг. Тэр утгаараа олон хүний сонирхол таашаалыг хүлээсэн гэж хэлж болно.
Танай хувцасны загвар дизайныг хэн гаргадаг вэ?
Би өөрөө гаргадаг. Тухайн дээл хувцасны өнгөний тохиргоо болон тухайн хүнээ харж байгаад дээл хувцасыг нь хийж өгдөг.
Бүтээгдэхүүнээ хэд хоногийн дотор хийж дуугадаг вэ?
Ер нь бол тухайн дээлнээсээ шалтгаалаад ажлын долоон хоногт хийж дуусгадаг. Энгийн хийц загвартай дээлийг 2-3 хоногийн хугацаанд хийдэг. Гэхдээ энэ дашрамд сонирхуулж хэлэхэд би түүхийн үзэсгэлэнд зориулж ,эртний хийц загвартай том дээлийг 2-3 жилийн хугацаанд оёж байсан үе ч бий.
Үнэ ханшийн хувьд ямархуу үнэтэй вэ?
Үнэ ханшийн хувьд гэвэл манай дээлнүүд дундаж үнэ ханштай байгаа. Энгийн дээл 500 мянга дотор, нарийн хийц загвартай хувцас саяаас дээш үнэтэй байдаг.Өвөл хавар намрын хувцасын хувьд нэг саяаас дээш үнэтэй гардаг.
Та өөрөө ямар мэргэжилтэй хүн бэ? Яагаад Монгол үндэсний дээлний загварыг сонирхох болов?
Би өөрөө загвар зохион бүтээгчийн мэрэгжилтэй. 2006 онд Урлах эрдмийн дээд сургуулийг дизайнер мэргэжилээр төгссөн. Мөн 2011 онд хууль зүйн чиглэлээр өмгөөлөгчийн мэргэжлийг эзэмшсэн.
Яагаад заавал Монгол үндэсний хувцасны эртний загварыг сонирхон судалж, энэ чиглэлээр үйл ажиллагаа явуулах болов? Тэр талаараа тодруулж ярина уу?
Ер нь бол би өөрөө утгаа арай өөр хүн. Их үндэсний үзэлтэй хүн гэж хэлж болно. Монгол улсдаа хийх ёстой ,бүтээх ёстой хүний төрсөн биеийн өгөгдөл байдаг юм болов уу гэж боддог. Би өөрөө хар багын дээл хувцас оёж өссөн, бас ээж, эмээ нар маань бүгд юм оёдог их уран хүмүүс байсан. Би өөрөө бас их уран. Өөрөөр хэлбэл удам дагасан юм оёдог уран гартай хүмүүс гэсэн үг. 10 жилд сурч байхын л би хөдөлмөрийн багшаасаа юм заалгахгүйгээр хичээл номоо хийчихдэг хар багын л өөрөө хувцасаа тааруулаад оёод өмсчихдөг хүүхэд байсан. Энэ салоны хувьд гэвэл цэвэр миний хобби гэж хэлж болно. Тэр утгаараа би хийх ёстой юмаа л хийж байгаа гэж боддог.
Анх хэдүүлээ энэ салоныг байгуулав ? Тэр талаараа ярьж өгөхгүй юу?
Хамгийн анх би энэ ажлыг найзтайгаа хамтарч эхлүүлж байлаа. 2014 онд анх салоныхаа нээлтийг хийсэн. Энэ хугаацаанд бид бүх юмаа өөрсдөө хийж бүтээж ирлээ. Мэдээж аливаа юмыг эхлүүлхэд хүндрэл бэрхшээл гаралгүй яахав. Гэхдээ олон түмнийхээ буянд өдий зэрэгтэй энэ ажлыг хийж явуулж ирсэн гэдгээрээ би бахархдаг.
Байнгын үйлчлүүлэгч хэр олонтой болж байна вэ?
Манай үйлчлүүлэгчдийн ихэнх нь байнгын үйлчлүүлэгчид байдаг. Тэр хүмүүс маань манайхаар өвөл хавар зуны дээл, хувцасаа хийлгэдэг.
Бизнес хийхэд мэдээж хөрөнгө санхүүгийн бэрхшээл гардаг. Төр засгаас олгож буй хөнгөлөлттэй зээлд хамрагдаж чадаж байгаа юу?
Би өөрөө угаасаа энгийн хүн шиг биш л дээ. Хөгжлийн бэрхшээлтэй хүн. Гэхдээ би улсаас нэг ч төгрөг авалгүй энэ салоноо байгуулсан. Харин ах дүүгээсээ мөнгө зээлэх үе бол байсан. Мэдээж улсаас зээл авах сонирхол байлгүй яахав. Компаниа өргөжүүлэе гэсэн бодол байдаг. Одоо нийслэлд үйл ажиллагаа явуулж буй ихэнхи пүүс компаниудийн дийлэнх нь түрээсийн байранд үйл ажиллагаа явуулж байгаа. Миний бодлоор төр засгаас үнэхээр бизнес хийхээр бие сэтгэлээрээ зүтгэж яваа над шиг ийм хүмүүсийг бага ч атугай дэмжиж тусалж өгвөл зүгээр гэж би боддог. Телевиз хэвлэл мэдээллээс харж байхад төрийн бодлого тодорхойлогчид өчнөөн олон сайхан юм ярих боловч яг үнэндээ нүдэнд тусаж гарт баригдах юм ерөөсөө алга байна. Гол төлөв тунхагийн шинж чанартай худлаа ярьсан хүмүүс дийлэнх нь байдаг. Хэрвээ тэгж тусалж дэмжиж өгвөл Монгол улс аяндаа босоод ирнэ гэдэгт итэгэлтэй байдаг.
Танайх түүхий эдээ хаанаас авдаг вэ?
Манайх түүхий эдээ гол төлөв Турк, Япон, Солонгосоос авдаг. Яагаад гэвэл бид аливаа сайн чанартай дээл хувцас хийхийн тулд аль болох хамгийн чанартай материал түүхий эдээр бараа бүтээгдэхүүн үйлдвэрлэх учиртай гэсэн бодлого барьж ажилладаг. Хятад даавууг бараг хэрэглэгдэггүй.
Тоног төхөөрөмжөө хаанаас авсан бэ?
Тоног төхөөрөмжийн хувьд гэвэл манай салон гол төлөв Японы “Жуки” брэндийн оёдлын машиныг ашигладаг. Мөн Хятадын сүүлийн үеийн зарим нэг сайн чанарын тоног төхөөрөмжийг оруулж ирсэн.
Гадагшаа экспортонд гаргах боломж хэр байна. Энэ талаар судалж үзэв үү?
Экспортонд гаргах боломж бол байгаа. Би өөрөө гадагшаа олон үзэсгэлэнд явж байсан. Тухайлбал Өвөр Монголын өөртөө засах оронд бид нарын урласан эртний хийц загвартай дээл хувцасыг их сонирходог. Гэхдээ одоогоор яг гадагшаа экспортонд гаргасан зүйл байхгүй байна.
Ер нь танай компанийг хөлөө олсон компани гэж ойлгож болох уу?
Тийм. Манайх хөлөө олсон компани. Миний өөрийн хийсэн бүтээсэн дээл хувцас Монголын Үндэсний телевизийн алтан сан хөмрөг болон түүхийн музейд хадгалагдаж байдаг. Би ч өөрөө үүгээрээ их бахархдаг.
Та ер нь Монгол улсын үндэсний үйлдвэрлэлийн талаар ямар бодолтой байдаг вэ?
Миний бодлоор бол ард иргэд маань дандаа төр засаг гээд байлгүй өөрсдөө улс орноо хөгжүүлэх тал дээр маш их анхаарч улсаа хөгжүүлхийн төлөө хичээж чармайж ажиллах ёстой юм шиг надад санагддаг. Бас төр засагт байгаа тэр хүмүүс өөрсдөө талцал хэрүүлээ багасгаж, хамтран ажиллавал Монгол улс маш богинохон хугаацаанд хөгжиж чадна. Жижиг дунд үйлдвэрлэлийг дэмжих жил гэж зарлах мөртлөө тэр нь огт ажил хэрэг болдоггүй. Тэрнийгээ ажил хэрг болгож, улсаа хөгжүүлэх сэтгэл гаргаж чадвал энэ бүхэн маш амархан бүтэх зүйл гэж бодож байна.
Ирээдүйдээ танайх ямар зорилго тавьж байгаа вэ?
Ирээдүйд манайх Монголчуудыгаа Монгол хувцасаар нь гоёх, Монгол хувцасаар нь таниулах тийм л ажлыг хийнэ гэсэн зорилготой байгаа. Бас энэ Монгол үндэсний хувцасаа бөөнөөр нь үйлдвэрлэж, бусад улс орны хувцасны соёлтой нэгэн ижил түвшинд хүргэх ажлыг хийх болно.
