Үүрэн холбооны компаниудыг “хур” системд нэгтгэлээ

Гадаад паспорт захиалах, татварын хөнгөлөлт эдлэх зэрэг төрийн үйлчилгээ авахад хорооны тодорхойлолт, иргэний үнэмлэхийн хуулбар, нийгмийн даатгал төлсөн лавлагаа зэрэг олон янзын цаас шаардаж иргэдийг бухимдуулдаг. Энд тэндээс лавлагаа авчрахыг шаардан иргэдийн цаг завыг үрэхийг таслан зогсоох, төрийн үйлчилгээг түргэн шуурхай болгох үүднээс мэдээлэл солилцооны “хур” систем нэвтрүүлээд буй. Уг системд өчигдрөөс үүрэн холбооны компаниудыг холболоо. Ингэснээр иргэд шинэ дугаар авах, үйлчилгээгээ цуцлах зэрэгт заавал цахим үнэмлэх авчрах шаардлагагүй болов. Хурууны хээгээ уншуулахад л бүх мэдээлэл нь гарч ирэх юм байна. ХУР-ыг Үндэсний дата төвийн инженерүүд хөгжүүлж буй бөгөөд одоогоор төрийн болон хувийн хэвшлийн 27 байгууллагыг холбожээ. Арилжааны банкнаас зээл авахад цөөнгүй бичиг баримт шаардаж, иргэдэд чирэгдэл учруулдаг. Эл асуудлыг шийдэхийн тулд өнгөрсөн сард “Голомт” банкийг ХУР-д нэгтгэснээ тус байгууллагынхан онцолсон. Ирэх 1-2 жилд багтаан төрийн бүх байгууллага, иргэд олноор үйлчлүүлдэг хувийн хэвшлийн аж ахуйн нэгжүүдийг холбохоор төлөвлөжээ.