Ой, хээрийн түймрийн дийлэнх шалтгаан нь хүний буруутай үйлдлээс үүдэлтэй гэдгийг албаныхан байнга хэлж сануулдаг. Гэсэн ч хаврын хуурайшилттай өдрүүдэд манай оронд түймрийн аюулын харанга жил болгон дэлддэг нь харамсалтай. Эдгээр өдрүүдэд ч мөн ой, хээрийн түймрийн мэдээ үргэлжилсээр байна. Тухайлбал,
Завхан аймгийн Тосонцэнгэл сумын Рашаант багийн “Зүүн-Эхийн бургас” гэдэг газар /сумын төвөөс баруун урд зүгт 70 км-т/ ойн түймэр гарсныг энэ сарын 12-ны өдрийн 15:30 цагт мэдэгдэж, нийт 68 хүн ажиллаж, 14-ний өглөө 06:15 цагт түймрийг цурманд оруулсан байна. Улмаар 13:45 цагт түймрийг бүрэн унтрааж, тус багийн Засаг даргад хүлээлгэн өгсөн байна. Түймэрт нийт 20 га талбай шатжээ.
Ойн түймэр мөн Хэнтий аймгийн Норовлин сумаас хойш 50 км-т оршдог Онон багийн “Ар бэрх” гэдэг газар гарсан аж. Түймрийн дуудлагыг 13-ны өдрийн 18:42 цагт хүлээн авч нийт 42 хүн 14-ний өдрийн 12:15 цагт түймрийг унтрааж тус багийн Засаг даргад хүлээлгэн өгчээ. Гал түймэрт 170 га талбай шатсан.
Мөн тус аймгийн Өмнөдэлгэр сумын төвөөс хойд зүгт 70 км-т Бугант багийн “Бугант” гэдэг газар ойн түймэр гарсан байна. Мэдээллийг 14-ны өдрийн 15:00 цагт хүлээн авч тус аймгийн Онцгой байдлын газрын алба хаагчид, мөн өдрийн 16:45 цагт, орон нутгийн иргэд 16:00 цагт түймрийн голомт руу явсан юм байна. Өнөөдөр 06:15 цагийн байдлаар түймрийн голомтоос 20 км -т явж байгаа тухай мэдээллийг өгөөд байгаа юм.
Харин Ховд аймгийн Ховд сумын Баруун салаа багийн “Хөшөөт” гэдэг газар /сумын төвөөс зүүн урд зүгт 60 км-т/ хээрийн түймэр гарсан тухай дуудлага өчигдөр 16:35 цагт иржээ. Дуудлагын дагуу тус аймгийн Онцгой байдлын газрын алба хаагчид, орон нутгийн иргэдийн хамт ажиллаж мөн өдрийн 20:00 цагт унтрааж тус багийн Засаг даргад хүлээлгэн өгсөн байна.
Энэ мэтчилэн өргөн нутгийг хамарсан түймрүүд орон нутагт цөөнгүй гарсаар байна. Тиймээс ард иргэд хуурайшилт ихтэй байгаа энэ үед гал түймрийн аюулаас сэрэмжлэхийг анхааруулж байна.
