МАХН-ын удирдлагууд өнөөдөр “Үндэсний мэдээллийн төв”-д хэвлэлийн хурал хийлээ. Хэвлэлийн хуралд МАХН-ын дарга Н.Энхбаяр, дэд дарга Ц.Оюунбаатар, С.Ганбаатар нарын хүмүүс оролцов.
Мэдээллийн эхэнд МАХН-ын дарга Н.Энхбаяр “Улсын дээд шүүхээс манай намын дүрмийг бүртгэхтэй холбоотой улс төржилт их явагдаж байна. Өнгөрсөн удаад бид Улсын дээд шүүх дээр болсон бусармаг хэргийн талаар сэтгүүлчдэд мэдээлэл хийсэн. Одоо энэ бүхнийг бид нээлттэй яриад явна.
МАХН 2011 онд дүрмээ албан ёсоор баталсан. Энэ дүрмийн дагуу МАХН-ын дарга ээлжит бус Их чуулганыг зарлан хуралдуулах эрхтэй байдаг. Дүрмийнхээ дагуу ээлжит бус Их чуулганыг хоёр удаа зарлан хуралдуулсан. Их чуулганыг зохион байгуулахын тулд Бага чуулганаа өмнө нь хуралдуулдаг. Намын дүрмийн дагуу өнгөрөгч амралтын өдөр МАХН-ын Бага чуулган 20-р хуралдаанаа 67 хувийн ирцтэйгээр зохион байгууллаа. Энэ хуралдаанаараа бид намын даргаа батламжилсан Их чуулганыхаа шийдвэрийг баталгаажуулсан” хэмээн тодотгов.
МАХН-ын дэд дарга Ц.Оюунбаатар “Манай намын 20-р Бага чуулган амжилттай зохион байгуулагдлаа. Өнгөрсөн өвөл манай намын Их чуулган үндсэн дүрмийн хүрээнд зохион байгуулагдаж, ард түмэнд шууд дамжуулалтаар хүрсэн. Харамсалтай нь Их чуулганаас гарсан шийдвэрийг Дээд шүүх хүчин төгөлдөр бус гэж үзсэн учир бид дахин Бага чуулган зарласан байгаа. Бага чуулганаар өмнөх Их чуулганаар хэлэлцсэн асуудлаа бататгахаас гадна дахин ээлжит бус Их чуулган зохион байгуулах шийдэлд хүрсэн. Манай намын Их чуулганд нийт 1024 саналын эрх бүхий төлөөлөгч оролцоно. Их чуулганы зохион байгуулалтыг бид маш сайн ханган ажиллах болно. Энэ талаарх бүх мэдээлэл хэвлэл мэдээллийнхэнд нээлттэй” гэж онцоллоо.
МАХН-ын Хяналт ёс зүйн хорооны дарга Г.Давааням: -МАХН дотор одоогоор ямар нэг маргаан байхгүй. Зөвхөн О.Баасанхүү, Г.Бямбасүрэн нарын цөөн хүмүүс намын дүрэм, Улс төрийн намын тухай хууль зөрчиж Их чуулганыг хийсэн. Улсын дээд шүүх тэдний хурлыг хэрэгсэхгүй болгосон гэв.
Мөн энэ үеэр МАХН-ын дарга Н.Энхбаяр “Дээд шүүх манай намын дотоод асуудалд их оролцож байгаа. Манай намын хяналтын хороонд энэ төрлийн ямар ч гомдол ирээгүй. Тийм байтал Дээд шүүх бидэнд гомдол ирсэн гэж мэдэгдээд байгаа нь зарчмын хувьд ихээхэн буруу юм” гэж нэмж хэлэв. Хэвлэлийн хурлын үеэр МАХН-ынхний зүгээс “Бид намынхаа гишүүдийг Бага чуулганд оролцуулах асуудалд идэвхийлэн ажилласан. О.Баасанхүү гишүүнд Бага чуулганд оролцох урилга хүргүүлсэн ч ирээгүй. О.Баасанхүү, Г.Бямбасүрэн нарын маргаан МАХН-ыг бүрэн төлөөлөхгүй гэдгийг бид Дээд шүүхэд мэдэгдсэн”гэлээ.