Дархан хотын нэгдсэн эмнэлгийн Хавдрын тасгийн сувилагч н.Уранчимэг тус хотноо гурван хүүхэдтэйгээ 12 м.кв талбайтай “00” өрөөг түрээслэн амьдардаг байв. Тэрээр цусны цочмог явцтай үүдэл эсийн хорт хавдар оноштой бөгөөд анх Сүхбаатарын талбай дээр зохион байгуулагдсан эрүүл мэндийн болон соёл урлаг, боловсролын салбарынхны цалинг нэмэхийг шаардсан суултад оролцон өөрийн дуу хоолойгоо олон нийтэд хүргэсэн.
Сувилагчийн цалингаар хорт хавдрын эмчилгээ хийлгэх боломжгүй гэдгийг тэрээр хатуухан хэлж, эмчилгээний мөнгөн тусламж хүсч байв. Улмаар Эрүүл мэндий яам урлагийнхантай хамтран хандивын тоглолт зохион байгуулсан билээ. Мөн эмчилгээний зардлын 50 хувийг хөнгөлөхөөр болсон. Үүнээс гадна нэгэн залуу гэр бүл түүнд хоёр өрөө байр гардуулж өгөхийг хүсчээ. Энэхүү буянтай үйлсийн эздийг н.Төмөртогоо, н.Ундармаа гэдэг.
Өрхийн тэргүүн н.Төмөртогоо энэ үеэр “Би гэр бүлийнхээ хүнтэй хэлэлцээд Дархан хотынхоо, Монголынхоо нэг иргэнд ч болов тус болчих юм сан гээд их ярилцсан. Ингээд судлаад үзэхэд бас нэг асуудал нь орон байрны асуудал байсан учраас өөрсдийнхөө хэмжээнд шийдсэн юм. Бидний цөөхөн монголчууд бие биедээ итгэж, бие биенээ гэсэн сэтгэлээр сайн сайхан явах ёстой, өөрсдийн боломжоор туслах ёстой гэж бодсон. Мөн Дархан-Уул аймгийн Засаг даргатай ярьсан. Засаг дарга Насанбат биднийг дэмжиж ажилласан. Энэхүү өчүүхэн сэтгэлийг минь хүлээж авна уу.” хэмээн ярьлаа.
Ж.Уранчимэг энэхүү сайхан сэтгэлийн өглөгт баярласан сэтгэгдлээ ийн хуваалцлаа. Тэрээр “Өнөөдөр манай гэрийнхний хувьд маш сайхан аз жаргалтай өдөр болж байна. Ингэж орон байртай болно гэж бодож байгаагүй. Надад хэлэх үг олдохгүй байна. Үр хүүхэд маань өөрийн гэсэн орон байртай боллоо. Цензургүй яриа нэвтрүүлгийн Мөнхбаясгалан сэтгүүлчдээ баярлалаа. Орон байртай болгож өгсөн Төмөртогоо, Ундармаа хоёртоо маш их баярлалаа. Миний хүүхдүүд орох оронтой болно гэдэг хамгийн аз жаргалтай юм. Хүний хувцас өмссөн мөр татуу явдаг гэдэг шиг түрээсийн байранд амьдарна гэдэг хэцүү. Одоо түрээсийн өдөр боллоо гэж санаа зовохгүй, өөрийн гэсэн гэр оронтой болж байгаадаа маш их баяртай байна. Би өнөөдөр үнэхээр аз жаргалтай байна. Эмчилгээндээ явах болчихлоо. Эрүүл болоод ирнэ. Дээр нь орон гэртэй болчихлоо. Энэнээс илүү жаргал гэж байхгүй. Эрүүл болж ирээд ард иргэдийнхээ төлөө бие сэтгэлээ, бүх юмаа зориулж ажиллах болно.”
Ийнхүү Шинэ Дарханы Хүслийн хотхоны 33.14 м.кв талбайтай нэг өрөө орон сууцны зориулалттай үл хөдлөх эд хөрөнгийн хууль ёсны өмчийн гэрчилгээг Ж.Уранчимэгт гардуулан өглөө. Энэ эерэг мэдээллийг Цензургүй сурвалжлага багийн хамт олон хүргэлээ.
Дашрамд дуулгахад, үүдэл эсийг шилжүүлэн суулгахад 35 мянган ам.доллар аж. Үүний 50 хувь нь хөнгөлөгдөхөөр болоод буй. Ж.Уранчимэгт зориулж ард түмний сэтгэлийн өглөг, хандивын тоглолтоос нийтдээ 52 сая 970 мянган төгрөг цугласан нь түүний эмчилгээ болон зардалд хангалттай хүрэлцэнэ хэмээн Ж.Уранчимэг мөн энэ үеэр баяртайгаар хэлж байсан юм.
