Ерөнхийлөгч Доналд Трамп төрийн тэргүүн болсноос хойших эхний нэг жилийн хугацаанд түүний охин Иванка Трамп болон хүргэн хүү Жейрд Кушнер нарын жилийн орлого 82 сая долларт хүрсэн тухай АНУ-ын хэвлэлийнхэн мэдээлж байна. Ерөнхийлөгчийн охин, хүргэн хоёр үл хөдлөх хөрөнгийн салбарт томоохон хөрөнгө оруулалтуудыг хийж, энэ салбарт бизнес хийсээр байгаа юм.
Хатагтай Трамп нь “Трамп Интернэшнл” зочид буудлын хувьцаанаасаа 3.9 сая доллар, харин хувийн брэндийн орлогоосоо 5 сая долларыг олжээ. Эдгээр орлого нь ашиг сонирхлын зөрчилтэй холбоотой ёс зүйн асуудлыг хөндөж байна гэж эх сурвалжууд үзжээ.
Умард Солонгосын тэргүүнтэй уулзахаар явсан ерөнхийлөгчийн томилолтын энэ үед Даваа гаригийн орой Цагаан ордны зүгээс ийнхүү ёс зүйн тодруулгуудын талаар өгүүлсэн байна.
Иванка Трамп болон Жейрд Кушнер нар ерөнхийлөгчийн ажлын багт нэгдсэнээр зарим компани дахь үүрэг оролцоогоо багасгасан бөгөөд үл хөдлөх хөрөнгө хөгжүүлэгч ноён Кушнер зарим арилжааны компанийг эзэмших болжээ.
Тэд хоёулаа эдгээр компаниуддаа голлох хувьцааг эзэмшдэг бөгөөд ноён Кушнер үл хөдлөх хөрөнгийн компаниудаа, харин хатагтай Трамп хувцас болон гоёл чимэглэлийн брэндээ хариуцдаг аж.
Түүнчлэн хатагтай Трамп нь “Трамп байгууллага”-аас 2 сая доллар, “Women Who Work” номноосоо 289,000 долларын орлого олжээ. Харин Кушнер нь Нью Жерси дэх орон сууцны цогцолбор төслөөс 5 сая доллар авчээ. 2017 онд Жейрд Кушнерийн орлого 179 саяас 735 сая долларын хооронд үнэлэгдэж байсан бол Иванка Трампынх 55.3 саяас 75.6 сая доллараар бичигдсэн байна.
Б.Болормаа
