“Жинхэнэ” зуун наст хэмээн нэрлэгддэг алое төрлийн ургамлын нэрийг латинаар Алое барбаденсис Mиллер (Aloe barbadensis Miller) буюу Алое вера (Aloe vera) гэдэг.
Алое верагийн тухай
Алое ургамал нь кактустай адилхан харагддаг боловч сонгино, сармисыг багтаасан сараана бүлийн нэг гишүүн юм. Дэлхий даяар хэдэн зуун төрлийн Алое буюу зуун наст ургадгаас зөвхөн 2 төрлийг нь л тарималжуулан ургуулдгийн нэг нь Алое вера юм. 3-5 настай Алое вераг эмчилгээнд хэрэглэдэг ба нас ахих тусам эрүүл мэндэд ашиг тустай бодисуудын агуулагдах хэмжээ нэмэгддэг байна. Нэг үндэснээс 12-16 навч гардаг ба гадна талаас нь 3-4 навч авах байдлаар хураадаг. Хурааж авсныхаа дараа 4-6 цагийн дотор боловсруулах буюу хөргөж хадгалахгүй бол шимт бодисуудын хэмжээ буурдаг учраас үйлдвэрүүд богино хугацааны дотор боловсруулдаг. Жинхэнэ зуун наст буюу Алое вера нь гадна хальс, дотрох цэлцгэнүүр төст хэсэг (гель) болон эдгээрийг заагласан шаргал өнгийн давхаргаас бүтдэг. Хамгийн анх Алое верагаас гаргаж авсан шаргал шүүсийг туулгах эмийн зорилгоор ашиглаж ирсэн нь шаргал өнгийн давхаргад агуулагдах “алоин” хэмээх бодисын үйлчилгээтэй холбоотой байв. 1950-аад оны үед тэжээллэг, чийгшүүлэгч, эмчлэн эдгэрүүлэх үйлчилгээтэй өнгөгүй, тунгалаг хагас шингэн Алое вера бүтээгдэхүүн анх гарч ирснээс хойш хэрэглээ болон үйлдвэрлэл, судалгаа эрс нэмэгдсэн байдаг.
Найрлагандаа алое ороогүй гоо сайхны бүтээгдэхүүн ховор байдаг. Алое вера гелийн найрлагын 99 хувийг ус эзэлдэг ч, үлдсэн 1 хувьдаа витамин А, Ц, Е В12, фолийн хүчил зэргийг агуулдаг нь чөлөөт радикалуудтай идэвхтэй тэмцэх супер бүтээгдэхүүн болгож байгаа юм. Мөн арьсны шарх, сорвийг арилгаж эдгээх хүчтэй. Арьсыг чийгшүүлэгч номер нэг ургамал гэж хэлж болно. Зүгээр л нэг энгийн алое вера гэхэд найрлагандаа эрдэс бодис, кальци, магни, төмөр сод, цайр гэх мэт маш олон төрлийн эрдэсийг өөртөө агуулсан байдаг байна. Гадуур олон төрлийн алое гель худалдаалдаг ч органикийг нь яаж гүйцэх билээ. Хэрвээ гэртээ алое тарьдаг бол дараах аргаар шинэхэн гоо сайхны бүтээгдэхүүнтэй болоорой хэрэв байхгүй бол нэгийг олж гэртээ ургуулаарай.
Гоо сайханд хэрхэн нөлөөлөх вэ?
-Арьсыг чийгшүүлнэ. Хуурай арьстай, мөн хүйтний улиралд арьс тань ихээр хуурайшдаг бол алое шүршигч, тослог арьстай бол гелийг түрхэх нь арьсыг чийгшүүлж, толигор болгоно.
-Алое вера гелийг арьсанд түрхэж хэрэглэхэд арьсанд гаднаас нь тэжээл өгдөг.
-Арьсыг цайруулна. Нүүрний арьсан дээрх толбо, нөсөөг бүдэгрүүлдэг тул таны арьсны өнгийн цайруулж, гэрэлтүүлнэ.
-Арьсны нүх сүвийг жижигрүүлнэ. Алое вераг арьсандаа түрхэх буюу шүршихэд нүдэнд харагдахуйц томорсон нүх мэдэгдэхүйц жижгэрдэг.
-Ууж хэрэглэхэд эсийн нөхөн төлжилтийг сайжруулж, коллагений нийлэгжлийг дэмждэг. Арьсыг нөхөн төлжүүлдэг фибробласт эсүүдийн хэмжээг жирийн үеийнхээс 6-8 дахин нэмэгдүүлж, үрчлээ, хөгшрөлтийг удаашруулдаг. Тогтмол хэрэглэвэл таны арьсыг 5-7 насаар залуу харагдуулдаг.
-Батга арилгана. Хэрвээ таны нүүрэн дээр батга гардаг бол үхэжсэн эд, эсийг гуужуулж, тосны булчирхай бөглөрөхөөс сэргийлэх үйлчилгээтэй Алое вера гелийг хэрэглээрэй. Нянгийн эсрэг үйлчилгээтэй байдаг тул орой унтахаасаа өмнө гелийг түрхэх буюу шүүсийг хөвөнд арчвал батга арилгана. Мөн батганы улмаас үүссэн сорвин дээрээ түрхэж болно.
-Алое нь эсийн нөхөн төлжилтийг сайжруулдаг болохоор сорви, язралтыг бүдэгрүүлдэг.
-Наранд түлэгдсэн арьсанд түрхэхэд богино хугацаанд төлжүүлэн, хорсох, улайх зэрэг зовиуруудыг намдаадаг учраас нарнаас хамгаалах, наранд түлэгдсэн үед түрхдэг олон тосны найрлагад Алое вера орсон байдаг.
-Цэврүү үсрэх, хорхой шавьжинд хазуулах болон бүх төрлийн харшил, халдвар, шарх, түлэгдэлтийн үед эмчилгээ болгон хэрэглэхэд тун гайхалтай үр дүнгээ өгнө. Алое гелийг шархтай хэсэгт өдөрт 2-3 удаа түрхэж арилтал нь үргэлжлүүлнэ.
-Хэрвээ таны нүд бүлцийж, сэрсэн бол Алое вера гелийг түрхэж, иллэг хийгээрэй. Нүдний эргэн тойронд үүссэн хаван богино хугацаанд алга болно.
-Алое вера нь Е аминдэмийн агууламж өндөртэй болохоор хагарч, омголтсон уруулыг эмчлэхдээ оливийн тостой холин түрхдэг.
-Таргалалт, жирэмслэлттэй холбоотой язралтын үед хэрэглэхэд арьсны гэнэтийн суналтын улмаас үүссэн арьсны давхаргуудын урагдлыг эдгэрүүлснээр, язралтыг бүдэгрүүлнэ.
Арьсны дайвар (үс, хумс, сормуус)
-Сахлын хутгаар сахлаа хусах буюу биеийн үсээ хуссаны дараа түрхэхэд арьсны цочролыг арилгаж, зөөлрүүлнэ. Түүнчлэн химийн найрлагатай крем түрхэхийн оронд Алое вера гелийг түрхэж, биеийн үсээ хусаж болно.
-Хаг арилгах зорилгоор Алое гелийг хуйхандаа түрхэж, 15 минут байлгаад дараа нь шампуниар угаавал хагнаасаа салах боломжтой.
-Үсний ургалтыг сайжруулна. Алое вера гелийг үсэндээ түрхэж, 30 минут массажлах ба үүний дараа усаар зайлна. Алое нь үсний ургалтыг дэмждэг энзимийг идэвхижүүлэх үйлчилгээтэй байдаг.
-Үсний ангижруулагчийн оронд хэрэглэж болно. Дэлгүүрийн ямар ч ангижруулагчаас илүү байдаг. Усаар сайн зайлахаа мартаж болохгүй.
-Алое веранд хийгдсэн судалгаануудаар ууж хэрэглэхэд хумсны ургалтыг эрчимжүүлж, хумсыг бах бөх болгодог нь батлагдсан байдаг.
-Сормуусаа урт, өтгөн болгохын тулд орой унтахынхаа өмнө бага зэргийн хэмжээгээр сормуусандаа түрхэж болно.
-Үс хэлбэржүүлэгчийн оронд Алое вера гелийг ашиглаж болдог.
Гелээ хийхийн өмнө эдгээр чухал зүйлийг мартаж болохгүй
1.Алоеныхоо үндэс хэсгийн навчнаас аваарай. Авахдаа ургамлынхаа ишинд хүртэл тулгаж авна.
2.Тасдаж авсан навчаа шилэн саванд босоогоор нь 10 минут байлгана. Энэ нь алоены хорыг гадагшлуулж байгаа юм.
3.Алое вера гелээ хийхийн өмнө гараа сайтар угаасан байх.
4.Ямар нэгэн найрлага ороогүй алоег нэг долоо хоног хадгалах боломжтой.
Алоегоо тастаад хальсална.
Доторх цагаан гелийг нь хусаж аваад блендэрт хийж 30 секунд блендэрдэнэ.
Ингээд л шинэхэн алое маань бэлэн боллоо.
Хэрвээ алоегоо илүү өтгөн байлгахын хүсвэл блендэрдэх шаардлагагүй.
Алоегоо хальслаад доторх гелийг нь шууд шилэн саванаа хийгээд л боллоо.
Хуйх, үсний маск
Хатаж хуурайшсан, загатнасан хуйханд алое верагаас хэрэгтэй зүйл гэж үгүй. Үсээ будах гэж байгаа бол химийн гаралтай харшилд ч мөн сайн. Энэхүү маскыг үсээ шампундахаас өмнө хэрэглэх ба үсээ хуурай байхад нь түрхэнэ. Ганцхан хуйхандаа түрхэх гэж байгаа бол хуйхандаа түрхэн массажлаад 10 минутын дараа үсээ угаана. Харин гэмтэж хуурайшсан үсэндээ түрхэх бол үснийхээ үзүүрээс дунд хүртэл нь түрхээд 20-25 минут байлгана.
- ½ аяга алое вера гель
- 1 цайны халбага Кокосын сүү
Орцуудаа холиод хуурай үс, хуйхандаа түрхэнэ. Илүү чийгшүүлэхийг хүсвэл халдаг малгай өмсөж болно. Ингээд үсээ шампиунаар угаагаад ангижруулна. 7 хоногт 1 удаа хэрэглэхэд эрүүл чайан үстэй болно.
Батгатай арьсанд
Батгатай хэсэгтээ цагаан гелээ түрхээд 20-30 минут байлгана. Батгаа тэр дор нь арилгахыг хүсвэл өдөрт 1-2 удаа хэрэглэж болно.
